ឡូយយុវតីកម្ពុជា ៣រូប ត្រូវបានជ្រើសរើសចូលសិក្សាជំនាញសរសេរកូដមនុស្សយន្តនៅអាមេរិក

2022-11-14 04:41:23
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវតីវ័យក្មេង ៣រូបរបស់កម្ពុជា ត្រូវបានជ្រើសរើសឲ្យជាប់ចូលសិក្សាក្នុងកម្មវិធី "Tech Girl 2022" ជំនាញសរសេរកូដបង្កើតកម្មវិធីកុំព្យូទ័រ និងមនុស្សយន្ត នៅសហរដ្ឋអាមេរិក។ នេះបើតាមការបញ្ចេញឲ្យដឹងរបស់ស្ថានទូតអាមេរិកប្រចាំនៅកម្ពុជា។

យុវតីទាំង៣របស់កម្ពុជានោះមាន កញ្ញា ម៉េងហ័ង កញ្ញារតនាទេពី និង វដ្ឍនា។ មិនត្រឹមតែសិក្សាលើជំនាញបច្ចេកទេសខាងលើនេះ ប៉ុន្តែវគ្គសិក្សានេះ ក៏មានបង្រៀនពីភាពជាអ្នកដឹកនាំផងដែរ ដែលសិក្សានៅសាកលវិទ្យាល័យ Virginia Tech របស់សហរដ្ឋអាមេរិក។ ពួកគេបានចាកចេញពីកម្ពុជាកាលពីខែកក្កដា ២០២២។

ក្រោយទៅដល់សហរដ្ឋអាមេរិកជាលើកទី១ដូចគ្នាក្នុងចំណោមពួកគេទាំង៣ យុវតីកម្ពុជាបានថតវីដេអូបង្ហាញពីសាកលវិទ្យាល័យដែលពួកគេត្រូវសិក្សា គឺ Virginia Tech ដែលមានទីធ្លាធំទូលាយ បរិយាកាសល្អ មានផាសុកភាព។ អ្វីដែលពិសេស យុវតីកម្ពុជា បញ្ជាក់ថា ពួកគេមានឱកាសបានជួបដោយផ្ទាល់ជាមួយអ្នកជំនាញរបស់អង្គការអវកាស NASA សហរដ្ឋអាមេរិកថែមទៀត។

យុវតីរបស់កម្ពុជា ២នាក់បានរើសយកជំនាញ “Problem Solving in Computing Using Python” ដែលជំនាញនេះ មានរយៈពេលសិក្សា ៤០ម៉ោង ផ្ដោតទៅលើការដោះស្រាយបញ្ហាជាមួយបច្ចេកវិទ្យាដូចជា ប្រូក្រាមដែលយើងបង្កើតបានតាមរយៈកូដ។ ដោយឡែកម្នាក់ទៀត រើសយកជំនាញ Awesome Automatic System ដែលត្រូវសិក្សារយៈពេល ៣០ម៉ោង។

តាមគេហទំព័រ techgirlsglobal.org កម្មវិធី "Tech Girl” បានចាប់ផ្ដើមដំបូងនៅឆ្នាំ ២០១២ មានគោលដៅលើកកម្ពស់អ្នកដឹកនាំស្ត្រីជំនាន់ក្រោយក្នុងផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ដោយផ្តល់ឱ្យពួកគេនូវលទ្ធភាព និងឱកាសដើម្បីជំរុញជំនាញ និងបន្តក្តីសុបិនរបស់ពួកគេ។មកដល់បច្ចុប្បន្ន បានផ្ដល់ការបណ្ដុះបណ្ដាលយុវតីមកពីជុំវិញពិភពលោកចំនួន ៥២៨នាក់។

សម្រាប់ "Tech Girl 2023” បានបើកទៀតហើយ ដោយគ្រោងនឹងជ្រើសរើសយកយុវតីចំនួន ១១១នាក់ថែមទៀត មកពីប្រទេសចំនួន ៣៥។ ដូច្នេះសម្រាប់យុវតីកម្ពុជា ដែលចាប់អារម្មណ៍វគ្គសិក្សានេះ អាចចុចលើតំណរនេះ ដើម្បីបំពេញបែបបទសម្រាប់ដាក់ពាក្យទាំងអស់គ្នា៕

អត្ថបទ៖ ទារិកា