KhmerCare និង Camsoc ប្រកាសយុទ្ធនាការ ១លានដុល្លារ ទ្រទ្រង់កីឡាជម្រើសជាតិកម្ពុជា

2023-02-15 04:15:34
ចំនួនមតិ 0 | ចំនួនចែករំលែក 0

ចន្លោះមិនឃើញ

KhmerCare និង Camsoc បានបើកយុទ្ធនាការដើម្បីស្វែងរកប្រាក់១លានដុល្លារជួយដល់កីឡាជម្រើសជាតិកម្ពុជា ក្នុងដំណើរឆ្ពោះទៅស៊ីហ្គេម អាស៊ានប៉ារ៉ាហ្គេម ២០២៣ នៅកម្ពុជា។

ការសម្ពោធកម្មវិធីសប្បុរសធម៌នេះ ធ្វើឡើងនៅអគារវឌ្ឍនៈ ក្រោមវត្តមានឯកឧត្តម វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការ CAMSOC-CAMAPGOC និងលោក Steven Path ស្ថាបនិក និងជានាយកប្រតិបត្តិ KhmerCare ព្រមទាំងថ្នាក់ដឹកនាំក្រុមហ៊ុនដៃគូជាច្រើនទៀត ដែលបានចូលរួមអបអរសាទរ និងបានចូលរួមបរិច្ចាគគាំទ្រមូលនិធិនេះផងដែរ ។

ឯកឧត្តម វ៉ាត់ ចំរើន មានប្រសាសន៍ថា នេះគឺជាដំណាក់ការចាប់ផ្ដើមមួយ ដើម្បីកៀរគរថវិកា ១លានដុល្លារជួយដល់ “ក្រុមកម្ពុជា ឬ Team Cambodia” ក្រោមកិច្ចសហការជាមួយក្រុមហ៊ុនឯកជន ដែលមានរូបមន្ដច្បាស់លាស់ ក្នុងកិច្ចការសប្បុរសធម៌នេះ បន្ថែមពីលើការខិតខំ និងយកចិត្តទុកដាក់ខ្ពស់របស់រាជរដ្ឋាភិបាល ព្រោះកីឡាករ កីឡាការិនី ត្រូវការការលើកទឹកចិត្តបន្ថែម និងរៀងរាល់ពេល ពិសេសការហ្វឹកហាត់ ទាំងសម្ភារ និងការថែទាំសុខភាពជាដើម ។

លោក Steven Path បានបញ្ជាក់ថា នេះជាលើកដំបូងហើយ ដែលកម្មវិធី KhmerCare បានបើកយុទ្ធនាការធំជាងគេ ក្នុងការរៃអង្គាសមូលនិធិសប្បុរសធម៌ ១លានដុល្លារ សម្រាប់ជួយដល់ក្រុមអត្តពលិកកម្ពុជា ខណៈកម្ពុជា ត្រៀមធ្វើម្ចាស់ផ្ទះការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នាពេលដ៏ខ្លីខាងមុខ ។ ជាមួយមូលនិធិមហាជននេះ អ្នកណាក៏ដោយ នៅគ្រប់ទីកន្លែង សុទ្ធតែអាចចូលរួមបាន ដើម្បីគាំទ្រក្រុមជម្រើសជាតិកម្ពុជា និងលើកទឹកចិត្តពួកគេ ដើម្បីដណ្ដើមជោគជ័យជូនជាតិ ។

ឯកឧត្តម វ៉ាត់ ចំរើន បានអំពាវនាវដល់វិស័យឯកជន សហគ្រាស ប្រជាពលរដ្ឋ ទាំងក្នុង និងក្រៅស្រុក គឺអាចចូលរួមឧបត្ថម្ភគាំទ្រដល់ក្រុមកីឡាករ កីឡាការិនីជម្រើសជាតិកម្ពុជា នៅលើផ្លែតហ្វម KhmerCare តាមរយៈ https://khmercare.com ៕

អត្ថបទ៖ ប្រុស យុទ្ធ