ប្រែប្រួលលឿនពេកហើយ! គន្ធ តារាវណ្ណ ធ្លាក់បាត់អស់សម្រស់ជាតារាល្បី

2023-02-15 09:39:04
ចំនួនមតិ 0 | ចំនួនចែករំលែក 0

ចន្លោះមិនឃើញ

វាជារឿងធម្មតាដែលរូបកាយ និងសម្រស់មនុស្សគ្រប់គ្នា ត្រូវប្រែប្រួលទៅតាមវ័យ។ ប៉ុន្ដែតារាសម្ដែងល្បីឈ្មោះតាំងពីអំឡុងឆ្នាំ១៩៨៦ គឺលោក គន្ធ តារាវណ្ណ បានធ្លាក់ខ្លួនឈឺ ស្រកគីឡូ រាងកាយស្គមស្គាំងមើលមុខស្ទើតែមិនស្គាល់ ថាលោកជាតារាប្រុសល្បី មានមាឌធំ សាច់ឈាមស្រស់ថ្លា។

ទើបតែរយៈពេលប្រមាណ ១ឆ្នាំចុងក្រោយនេះទេ ដែលរូបកាយរបស់លោកប្រែប្រួលខ្លាំង ក្រោយពីលោកមានជំងឺលើសឈាម និងរលាកថង់ប្រម៉ាត់ ហើយធ្លាប់ដួលសន្លប់កូនៗបញ្ជូនទៅសង្គ្រោះពីរលើរួចមក។ មុននេះ ទំព័រហ្វេសប៊ុកឈ្មោះ Amazing Cambodiaដែលតែងតែគាស់រំលើងនូវរឿងរ៉ាវចាស់ៗរបស់តារាភាពយន្ដ បានបង្ហោះរូបថតលោកពីរសន្លឹកដោយមួយសន្លឹកថតកាលពីឆ្នាំ២០០០ និងមួយសន្លឹកទៀតទើបថតនៅឆ្នាំ២០២៣ នេះ។

ប្រភពដដែលនេះ បានសរសេរអមរូបថតទាំងពីរសន្លឹកនោះថា "រូបថ្មីបំផុតពីអតីតតួអង្គសម្ដែងស្ដេចដ៏ល្អបំផុតនៅដើមទសវត្សរ៍ឆ្នាំ២០០០ អ្នកណាបានទស្សនាខ្មែរកាលណោះ ច្បាស់ទទួលស្គាលរឿងព្រេងនេះ"។

ក្រោយពីបញ្ចេញរូប និងឃ្លាដ៏គួរឲ្យអាណិតនេះ មានអ្នកលេងបណ្ដាញសង្គមជាច្រើន បានបង្ហាញការអាណិតអាសូចំពោះលោកដែលធ្លាក់ខ្លួនឈឺ ស្គមខ្លាំងស្ទើតែមើលមិនស្គាល់។ អ្នកខ្លះក៏បានជូនពរឲ្យលោកឆាប់បានជាសះស្បើយពីជំងឺ ហើយបើលោកលែងសម្ដែងដោយខ្លួនឯងកើត សូមឲ្យលោកជួយបណ្ដុះក្មេងជំនាន់ក្រោយៗ។

Sabay មិនទាន់អាចទាក់ទងឧត្ដមសេនីយទោ គន្ធ តារាវណ្ណ និងកូនៗ ដើម្បីធ្វើបច្ចុប្បន្នភាពសុខភាពរបស់លោកបានទេ គិតត្រឹមល្ងាចថ្ងៃទី១៥ ខែកុម្ភៈ ឆ្នាំ២០២៣។ ប៉ុន្ដែកន្លងទៅទាំងលោក គន្ធ តារាវណ្ណ និងកូនប្រុសរបស់លោក ធ្លាប់ប្រាប់Sabay ថា ជំងឺរបស់លោកត្រូវការមើលថែខ្ពស់ ហើយចំណាយច្រើន៕

ជិន សុភ័ក្ដ្រ