ស្ដេចប្រដាល់ភូមា Dave Leduc ដែលចង់ប៉ះ ព្រំ សំណាង សរសេរសារយ៉ាងវែងបកអាក្រាត ថៃថាប្រឌិត ប្រវត្តិ Mouy Thai
- 2023-04-05 02:30:00
- ចំនួនមតិ 0 | ចំនួនចែករំលែក 0
ស្ដេចប្រដាល់ភូមា Dave Leduc ដែលចង់ប៉ះ ព្រំ សំណាង សរសេរសារយ៉ាងវែងបកអាក្រាត ថៃថាប្រឌិត ប្រវត្តិ Mouy Thai
ចន្លោះមិនឃើញ
មួយរយៈនេះ មានលេចនូវព័ត៌មានដ៏ភ្ញាក់ផ្អើលជាច្រើនអំពីការចាប់គូរវាងស្ដេចប្រដាល់ភូមា Dave Leduc និងកំពូលអ្នកប្រដាល់កម្ពុជា ព្រំ សំណាង ហើយគ្រប់យ៉ាងអាចនឹងកើតឡើងពិតៗក្រោយ កំពូលអ្នកប្រយុទ្ធទាំងពីរយល់ព្រមលើជំនួបនេះ។
Dave Leduc បានសរសេរយ៉ាងវែងពីការត្រៀមប៉ះ ព្រំ សំណាង និងបកអាក្រាតពីប្រវត្តិមួយថៃ ដែលរូបគេហៅថាជាការកាឡៃប្រវត្តិសាស្ត្រ។ ខាងក្រោមគឺជាសំណេររបស់ស្ដេចប្រដាល់កូនកាត់ភូមារូបនេះ៖ ជាបឋម ខ្ញុំសូមថ្លែងអំណរគុណដល់អ្នកទាំងអស់គ្នា ខ្ញុំសូមអបអរសាទរ លោក ព្រំ សំណាង សម្រាប់ការទទួលជ័យជម្នះរបស់ខ្លួនលើគូប្រគួតជាមួយនឹងជនជាតិរុស្ស៊ីដ៏ខ្លាំងម្នាក់ កាលពីថ្ងៃសៅរ៍កន្លងទៅ។
ដូចអ្នកទាំងអស់គ្នាដឹងស្រាប់ហើយថា ខ្ញុំត្រូវបានគេស្នើឲ្យជួបជាមួយនឹង លោក សំណាង នៅការប្រកួតលើកក្រោយរបស់ខ្ញុំ។ យើងទាំងពីរបានទទួលយកការប្រគួតនេះ។ ខ្ញុំបានទទួលយកការប្រគួតនេះ ដោយសារតែ លោក ព្រំ សំណាង ជាជើងឯក គុនខ្មែរច្រើនឆ្នាំមកហើយ គាត់មានប្រវត្តិប្រកួតជាង ១៥០ ដង ដោយវាយឈ្នះឱ្យសន្លប់ច្រើនដង ហើយថ្មីៗនេះគាត់ក៏ទទួលបានជោគជ័យនៅ Bareknuckle Muaythai នៅប្រទេសថៃ ដោយប្រើស្នៀតជង្គង់ហោះយ៉ាងល្អ។
សហព័ន្ធ Lethwei អន្តរជាតិ បានចាត់ទុករូបគាត់ថាជាកីឡាករដណ្តើមដំណែងជើងឯក Lethwei អន្តរជាតិដ៏សក្ដិសមមួយរូប សម្រាប់ខែឧសភា ឆ្នាំ 2023។ តោះមើលថាតើអ្នកណាវៃបានល្អបំផុត។ យើងនឹងប្រដាល់ដូចអ្នកចម្បាំងអាស៊ីអាគ្នេយ៍ពីបុរាណ ហើយសង្ឃឹមថានឹងនាំប្រទេសទាំងពីរមានមោទនភាពយ៉ាងក្រៃលែង។
អ្នករៀបចំកម្មវិធី មានសេចក្តីរំភើបចិត្តយ៉ាងខ្លាំងចំពោះការប្រកួតនេះ ដោយសារតែប្រវត្តិដែលខ្លួនបានរៀបចំពីមុនមក។ ខ្ញុំគិតថា ការប្រដាល់នេះអាចផ្តល់ប្រយោជន៍ដល់ភាពជាបងប្អូនរវាងមីយ៉ាន់ម៉ា និងកម្ពុជា ដែលតែងតែគោរពគ្នាទៅវិញទៅមក ។ យើងអាចផ្សព្វផ្សាយក្បាច់គុនទាំងពីរដល់ពិភពលោក។
អ្នករៀបចំកម្មវិធី កំពុងរៀបចំកីឡាប្រដាល់ Lethwei មីយ៉ាន់ម៉ា ទៅប្រគួតនៅខែឧសភា នៅអឺរ៉ុបសម្រាប់ការប្រកួតជើងឯក Lethwei អន្តរជាតិ។ ដើម្បីឱ្យមានភាពយុត្តិធម៌ បន្ទាប់មកខ្ញុំនឹងមកកាន់ប្រទេសកម្ពុជា ហើយប្រកួតក្រោមកីឡាប្រដាល់គុនខ្មែរ (Kun Khmer) ដែលនឹងក្លាយជាព្រឹត្តិការណ៍ធំបំផុតមិនធ្លាប់មានក្នុងប្រវត្តិសាស្ត្រកម្ពុជា ខ្ញុំចង់ឱ្យប្រទេសទាំងមូល គ្រប់ភូមិ គ្រប់ក្រុងចូលរួមអបអរចំពោះរូបខ្ញុំ និងលោក ព្រំ សំណាង។
ជាធម្មតា ខ្ញុំមិនប្រដាល់ដោយប្រើហ្គង់ប្រដាល់ទេ ហើយបាននិយាយទៅកាន់អ្នកគាំទ្ររបស់ខ្ញុំថា ខ្ញុំមិនដែលប្រដាល់កីឡាមួយថៃ (Muaythai) ទេ ដោយសារតែថៃបានធ្វើដាក់មកលើរូបខ្ញុំជាច្រើនឆ្នាំមកនេះ ប៉ុន្តែខ្ញុំទទួលយកការប្រដាល់គុនខ្មែរ (Kun Khmer) ព្រោះប្រវត្តិពិត និងសេចក្តីគោរព ដែលខ្ញុំមានសម្រាប់កម្ពុជា។ ខ្ញុំគិតថាការប្រដាល់ស្មើភាពគ្នាដោយសារ៖ 1 កីឡាប្រដាល់ Lethwei មីយ៉ាន់ម៉ា - 1 កីឡាប្រដាល់គុនខ្មែរ។
ខ្ញុំជាអ្នកគាំទ្រក្បាច់គុនខ្មែរដ៏ធំម្នាក់ ខ្ញុំគិតថាវាដូចកូនក្មេងដែលប្រទេសថៃកំពុងធ្វើ។ ខ្ញុំក៏ត្រូវបានក្រសួងវប្បធម៌ហាមមិនឲ្យចូលប្រទេសថៃផ្ទាល់ផងដែរ ព្រោះខ្ញុំបានលាតត្រដាងការភូតភរដែលថៃបាននិយាយរាប់សតវត្សមកហើយអំពីមីយ៉ាន់ម៉ា និងបង្កើតរឿងប្រឌិតដូចជារឿងក្លែងក្លាយរបស់ស្តេចប្រដាល់ថៃ ណៃ ខាណុមទុំ (Nai Khanomtom) ជាដើម។ នៅឆ្នាំ 1767 ប្រទេសថៃបានចាញ់ភូមា (មីយ៉ាន់ម៉ា) ក្នុងសង្គ្រាមភូមា-សៀម ហើយភ្លាមៗបន្ទាប់ពីការចាញ់ដោយមានការបំផ្លិចបំផ្លាញនេះ ប្រជាជនថៃបានចាប់ផ្តើមនិទានរឿងមួយថា កន្លែងដែលអ្នកប្រដាល់ថៃបានវាយអ្នកប្រដាល់មីយ៉ាន់ម៉ាចំនួន 9 នាក់ផ្ទួនៗគ្នា ដោយមិនមានពេលសម្រាក។ រឿងដ៏គួឱ្យរវើរវាយមែនទែន។
រឿងនេះចាប់ផ្ដើមលេចចេញក្នុងរឿងនិទានថែតែប៉ុណ្ណោះ ព្រោះប្រជាជនថៃមានមោទនភាពខ្លាំងពេកមិនអាចទទួលស្គាល់បរាជ័យ។ រឿងដដែលនេះកំពុងកើតឡើងនាពេលថ្មីៗនេះ ខណៈដែលប្រទេសថៃបានធ្វើពហិការមិនចូលរួមការប្រកួតកីឡាស៊ីហ្គេម ដោយសារពួកគេមិនព្រមហៅកីឡាប្រដាល់គុនខ្មែរ ឱ្យបានត្រឹមត្រូវ។ តាមត្រង់ទៅ មេដឹកនាំនៅប្រទេសថៃធ្វើឱ្យខូចកិត្ដិយសខ្លួនឯង។ ដំបូងគេហាមឃាត់ និងដាក់ខ្ញុំក្នុងបញ្ជីខ្មៅ ព្រោះខ្ញុំនិយាយការពិតអំពីរឿងមិនស្មោះត្រង់ និងការប្រមាថរបស់ពួកគេអំពីប្រទេសមីយ៉ាន់ម៉ា ហើយឥឡូវនេះពួកគេបានចុះក្នុងបញ្ជីខ្មៅ ហើយបដិសេធមិនបញ្ជូនកីឡាកររបស់ពួកគេមកប្រទេសកម្ពុជាទៀត។ ត្រង់ចំណុចនេះ ខ្ញុំគិតថាប្រទេសថៃច្បាស់ជាកូនង៉ែតដ៏ធំម្នាក់ដែលយំពេលដែលខ្លួនមិនទាន់ចូលប្រគួត។
ខ្ញុំគិតថាប្រទេសមីយ៉ាន់ម៉ា និងកម្ពុជាមានលក្ខណៈដូចគ្នាច្រើន ហើយភាពជាបងប្អូនអាចត្រូវបានប្រារព្ធនៅក្នុងព្រឹត្តិការណ៍ដ៏ធំមួយនៅក្នុងប្រទេសកម្ពុជានៅចុងឆ្នាំនេះ។ ប៉ុន្តែដំបូងខ្ញុំត្រូវបំពេញកាតព្វកិច្ចរបស់ខ្ញុំក្នុងនាមជាម្ចាស់ជើងឯកមីយ៉ាន់ម៉ា និងទទួលយកការការពារតំណែងជើងឯក Lethwei នៅខែឧសភា។ ដោយសារលោក ព្រំ សំណាង ទទួលបានឱកាសឡើងសង្វៀនជើងឯក Lethwei អន្តរជាតិ ខ្ញុំក៏ចង់មានឱកាសឡើងដណ្តើមតំណែងជើងឯក គុនខ្មែរ អន្តរជាតិ ផងដែរ ពេលមកកម្ពុជា។ កិត្តិយស ភាពក្លាហាន និងការគោរព៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
