ប្រើឡានអគ្គិសនីគឺល្អទាំងបរិស្ថាន និងសន្សំសំចៃ តែកំពុងគំរាមដល់ថាមពលរបស់អាមេរិកហើយ

2023-07-28 04:17:59
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្តថ្មីៗជាងពាក់កណ្តាលដែលលក់នៅសហរដ្ឋអាមេរិក ក្នុងឆ្នាំ២០២៣ ត្រូវបានរំពឹងថា ជាប្រភេទរថយន្តអគ្គិសនី ដែលនោះហើយវានឹងក្លាយជាប្រភពនៃការគំរាមកំហែងដល់ការខ្វះខាតថាមពលប្រើប្រាស់ ក្នុងប្រទេសមមហាអំណាចមួយនេះ។

យោងតាមការវិភាគរបស់គម្រោងស្រាវជ្រាវ REPEAT នៃសាកលវិទ្យាល័យ Princeton បង្ហាញថា តម្រូវការអគ្គិសនីក្នុងស្រុករបស់អាមេរិក នៅឆ្នាំ២០២២ ត្រូវបានរំពឹងថា នឹងកើនឡើងដល់ ១៨% ត្រឹមឆ្នាំ២០៣០ និង ៣៨% ត្រឹមឆ្នាំ២០៣៥។ ការកើនឡើងនេះ ដោយសារផ្នែកខ្លះបានផ្លាស់ប្តូរថាមពលពីឥន្ធនៈហ្វូស៊ីលទៅអគ្គិសនី វិស័យដឹកជញ្ជូន និងរថយន្តធុនស្រាល សុទ្ធតែបានបង្វែរទៅការប្រើអគ្គិសនី។

លោក Rob Gramlich ប្រធានក្រុមហ៊ុន Grid Strategies បាននិយាយថា «យើងនឹងមានតម្រូវការថាមពលច្រើន នៅពេលដែលយើងមិនមានគ្រប់គ្រាន់ សម្រាប់រយៈពេល ២៥ឆ្នាំឡើយ»។ លោកថា រថយន្តអគ្គិសនី បានត្រឹមតែជួយដោះស្រាយការមិនបញ្ចេញផ្សែងប៉ុណ្ណោះ តែការផ្គត់ផ្គង់ និងតម្រូវការថាមពល គឺកើនឡើងធំ។

តម្រូវការថាមពលទាំងនោះហើយ ដែលត្រូវឱ្យមានការផ្លាស់ប្តូរខ្សែបណ្តាញមេដែលមានវ៉ុលកាន់តែខ្ពស់ ដើម្បីអាចបញ្ជូនថាមលអគ្គិសនីពីខ្យល់ និងសូឡា ទៅមជ្ឈមណ្ឌលចែកចាយ ខ្សែចែកចាយតូចៗ និងការបម្លែងថាមពលសម្រាប់ស្ថានីយសាកអាគុយរថយន្តអគ្គិសនីជាដើម។

វាមិនមែនចំណាយតិចនោះទេ សម្រាប់ការបង្កើនខ្សែបណ្តាញមេបែបនេះ។ ក្នុងការសិក្សាមួយដែលធ្វើឡើងដោយ California Public Utilities Commission និងក្រុមហ៊ុន Kevala បានព្យាករថា គ្រាន់តែរដ្ឋ California មួយ នឹងត្រូវចំណាយដល់ ៥០ពាន់លានដុល្លារឯណោះនៅត្រឹមឆ្នាំ២០៣៥ ដើម្បីបំពេញតម្រូវការអគ្គិសនីខាងលើនេះ ជាពិសេសគឺសម្រាប់គាំទ្រដល់គោលដៅលក់រថយន្តអគ្គិសនីរបស់រដ្ឋាភិបាលអាមេរិក។

បើតាមវិបសាយមួយដែលបង្ហាញពីការប្រើប្រាស់អគ្គិសនី Verifythis រកឃើញថា បើម្ចាស់រថយន្ត Tesla Model 3 ដែលបើកបរជាមធ្យមប្រហែល ១ម៉ឺន ៤ពាន់ម៉ាយល៍ ក្នុងមួយឆ្នាំ នោះវានឹងប្រហាក់ប្រហែលនឹង ១០ដង នៃការស៊ីភ្លើងរបស់ទូរទឹកកកមួយគ្រឿង។ ហើយប្រសិនបើរថយន្តអគ្គិសនីកាន់តែធំទៀតនោះ ដូចជា Ford F-150 Lightning នោះវាក៏ត្រូវភ្លើងច្រើនជាងនេះផងដែរ៕

ប្រភព៖ CNBC

អត្ថបទ៖ សំភី