ខ្សែភាពយន្ដភាគ រឿង”តាមចាប់ស្នេហ៍” បានបង្ហោះភាគទី១ នៅលើបណ្ដាញសង្គមទទួលបានការចាប់អារម្មណ៍ខ្លាំងពីមហាជន។ ជាក់ស្ដែងទំព័រហ្វេសប៊ុកលោកស្រី ទ្រី ដាណា ដែលបានដាក់បង្ហោះនូវខ្សែភាពយន្ដបាននេះកាន់តែផ្ទុះការគាំទ្រខ្លាំង ដោយក្នុងរយៈពេលមិនដល់២៤ម៉ោងផង ស្រាប់តែមានអ្នកចូលទស្សនារហូតដល់ជិត ២លានដង(1.7 M)។

ក្រោយពីមានការគាំទ្របែបនេះ ក៏មានប្រិយមិត្ដខ្លះបានកោតសរសើរនូវទឹកដៃនិពន្ធសាច់រឿង អមដោយបទចម្រៀងមួយបទក្រោមចំណងជើងថា “តាមចាប់ស្នេហ៍” យ៉ាងពីរោះ ខណៈដែលអ្នកបានចូលទស្សនាខ្សែភាពយន្ដនេះក៏ចង់ឃើញមុខអ្នកនិពន្ធផងនោះ។ ដើម្បីឆ្លើយតបនឹងការចង់ឃើញរបស់ប្រិយមិត្ដ លោក យន ប៊ុនរាជ ដែលជាអ្នកនិពន្ធវ័យក្មេងម្នាក់ បានចេញមុខមកបញ្ជាក់ច្បាស់ៗ។

លោក យន ប៊ុនរាជ បានប្រាប់Sabay ថា ខ្សែភាពយន្ដភាគ និងបទចម្រៀង “តាមចាប់ស្នេហ៍” គឺជាស្នាដៃនិពន្ធរបស់លោក ហើយមុនរឿងនេះត្រូវបានចេញជាផ្លូវការរូបលោកបានចូលរួមយ៉ាងសកម្មជាមួយអ្នកដឹកនាំរឿង។ សម្រាប់រូបលោកផ្ទាល់ ពិតជាមានមោទនភាព ក្រោយពីឃើញស្នាដៃនេះមួយនេះទទួលបានគាំទ្រខ្លាំងពីមហាជន។

ខ្សែភាពយន្ដភាគ រឿង”តាមចាប់ស្នេហ៍”របស់ផលិតកម្ម MKF ទើបចេញភាគទី១ នៅដើមខែសីហា ឆ្នាំ២០២៣។ ខ្សែភាពយន្ដបែបកំប្លែង លាយឡំឈុតឆាកស្នេហាដ៏ជក់ចិត្ដ ត្រូវបានសម្ដែងដោយតារាសម្ដែងល្បីៗ គឺមានលោកជំទាវឧកញ៉ា ទ្រី ដាណា លោក សេង មង្គល អ្នកនាង សួស វីហ្សា លោក ឆឹម សក្កដា លោក ឡៅ បញ្ញា និងលោក ប៊ុន លីម៉ៅ ជាដើម៕