ភ្នំវល្លិ៍នៅខេត្តកែប នឹងត្រូវប្រែក្លាយជាតំបន់ទេសចរណ៍ប្រវត្តិសាស្រ្តសង្គ្រាម ទេសចរផ្សងព្រេង និងកសិទេសចរណ៍

2023-08-11 02:28:48
ចំនួនមតិ 0 | ចំនួនចែករំលែក 0

ចន្លោះមិនឃើញ

តំបន់ភ្នំវល្លិ៍ មានសក្តានុពលជាគោលដៅទេសចរណ៍តំបន់ភ្នំ ដែលមានប្រវត្តិជាអតីតមូលដ្ឋានទ័ពរបស់ខ្មែរក្រហម និងជាតំបន់កសិកម្មដ៏សំខាន់របស់ខេត្តកែប ដែលសម្បូរទៅដោយចម្ការម្រេច និងដំណាំគួបផ្សំជាច្រើនទៀត។ រាជរដ្ឋាភិបាលនឹងប្រែក្លាយជាប៉ូលទេសចរណ៍ធម្មជាតិតំបន់ភ្នំវល្លិ៍ជា តំបន់កសិទេសចរណ៍ ទេសចរណ៍ប្រវត្តិសាស្រ្តសង្គ្រាម និងទេសចរណ៍ផ្សងព្រេង។ នេះបើយោងតាមឯកសារផែនការមេអភិវឌ្ឍន៍វិស័យទេសចរណ៍ខេត្តកែប ២០២៣-២០៣៥។

១. ការអភិវឌ្ឍកសិទេសចរណ៍តំបន់ភ្នំវល្លិ៍

-សិក្សា និងរៀបចំចងក្រងទីតាំងដែលមានសក្តានុពលសម្រាប់ការអភិវឌ្ឍវិស័យកសិទេសចរណ៍ ជាពិសេសនៅតំបន់ចំការម្រេច និងចំការទុរេន ដោយមានកិច្ចសហការឱ្យបានជិតស្និតជាមួយម្ចាស់ចំការ និងប្រជាជនក្នុងមូលដ្ឋាន ដើម្បីរៀបចំសម្បទាទេសចរណ៍ចាំបាច់នានា និងកំណត់ប្រភេទសេវាកម្ម និងផលិតផលទេសចរណ៍ដែលមាននៅតាមទីតាំងនីមួយៗ។

-បង្កើនផលិតភាព និងធ្វើពិពិធកម្មផលិតផលកសិកម្មក្នុងខេត្តកែប សំដៅធានានូវការផ្គត់ផ្គង់ផលិតផលកសិកម្មក្នុងស្រុកក្នុងកម្រិតអតិបរមា ដល់ភ្ញៀវទេសចរ ក៏ដូចជាប្រជាពលរដ្ឋក្នុងខេត្តកែបទាំងមូល។

-ពិនិត្យលទ្ធភាពក្នុងការរៀបចំបង្កើតផ្សារផលិតផលកសិកម្មសម្បូរបែប សំដៅទាក់ទាញភ្ញៀវទេសចរ និងផ្សព្វផ្សាយនូវផលិតផលកសិកម្ម និងកសិឧស្សាហកម្ម ជាពិសេសផលិតផលដែលមានសក្តានុពលក្នុងខេត្តកែប។

២. ទេសចរណ៍តំបន់ប្រវត្តិសាស្រ្តសង្គ្រាម៖ ធ្វើការសិក្សាស្រាវជ្រាវលម្អិតអំពីប្រវត្តិសាស្រ្តសង្គ្រាម គួបផ្សំជាមួយនឹងការប្រមូលនូវវត្ថុបុរាណ ដូចជាគ្រឿងយុទ្ធភ័ណ្ឌ និងគ្រឿងសព្វាវុធចាស់ៗ និងរៀបចំបង្កើតភូមិទេសចរណ៍ប្រវត្តិសាស្រ្ត ក្នុងភូមិចំការបីនៃស្រុកដំណាក់ចង្អើរ។

៣. ទេសចរណ៍ផ្សងព្រេងតំបន់ភ្នំវល្លិ៍៖ ពង្រឹងសមត្ថភាពសហគមន៍ព្រៃឈើនៅក្នុងតំបន់ភ្នំវល្លិ៍ និងសិក្សា កំណត់តំបន់ និងផ្លូវខ្សែទស្សនកិច្ចទេសចរណ៍សម្រាប់សកម្មភាពផ្សងព្រេងកម្សាន្តក្នុងព្រៃ និងរៀបចំបង្កើតសម្បទាទ្រទ្រង់ការធ្វើពិពិធកម្មផលិតផលទេសចរណ៍កម្សាន្តក្នុងព្រៃឱ្យកាន់តែសម្បូរបែប៕