តើត្រីពីរ៉ាន់ញ៉ា ពិតជាស៊ីមនុស្សមែនឬ? តោះមកដឹងការពិតទាំង ១៣យ៉ាងអំពីត្រីដ៏កាចសាហាវនេះ

2023-08-14 03:21:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះនៅកម្ពុជា មានការផ្ទុះរឿងអាជីវកម្មមួយដែលលក់ត្រីដ៏កាចសាហាវ ពីរ៉ាន់ញ៉ា (Piranhas) ដែលនាំឱ្យមានការព្រួយបារម្ភយ៉ាងខ្លាំងចំពោះប្រជាពលរដ្ឋទូទៅ ហើយត្រូវបានរដ្ឋបាលជលផលចាត់វិធានការទាន់ពេលវេលាផងដែរ។

ការពិតទៅ ភាពកាចសាហាវរបស់ត្រីពីរ៉ាន់ញ៉ា ត្រូវបានគេដឹងច្រើនតាមរយៈខ្សែភាពយន្តនាពេលកន្លងមក ដែលបង្ហាញថាវាបង្កគ្រោះថ្នាក់ខ្លាំងដល់មនុស្ស។ ប៉ុន្តែភាពពិតប្រាកដរបស់ត្រីប្រភេទនេះ យ៉ាងណានោះ សូមមើលចំណុចទាំង១៣ខាងក្រោមនេះ។

១. កេរ្តិ៍ឈ្មោះដ៏អាក្រក់របស់ត្រីពីរ៉ាន់ញ៉ា ត្រូវបានផ្សព្វផ្សាយចេញពីអតីតប្រធានាធិបតីអាមេរិក លោក Theodore Roosevelt ក្រោយពេលលោកធ្វើដំណើរទៅអាមេរិកខាងត្បូង (ប៉ារ៉ាហ្គាយ) ក្នុងឆ្នាំ១៩១៣ ហើយបានប្រទះឃើញប្រភេទត្រីពីរ៉ាន់ញ៉ាជាច្រើនប្រភេទ។ លោកបានរៀបរាប់ថា ត្រីឆ្លាមវាយប្រហារតែអ្វីៗដែលតូចជាងវាប៉ុណ្ណោះ ប៉ុន្តែត្រីពីរ៉ាន់ញ៉ា វាយប្រហារនូវអ្វីៗដែលធំជាងវា។ ក្នុងនោះប្រសិនបើយើងលូកដៃចូលក្នុងទឹកទន្លេ ត្រីនេះនឹងអាចត្របាក់ខាំដាច់ម្រាមដៃបាន។

២. ត្រីពីរ៉ាន់ញ៉ា បានរស់នៅអាមេរិកខាងត្បូង រាប់លានឆ្នាំមកហើយ។ ត្រីនេះរស់នៅក្នុងទឹកសាបនៃទ្វីបអាមេរិកខាងត្បូង ចាប់ពីទន្លេ Orinoco ក្នុងប្រទេសវេណេហ្សុយអេឡា រហូតដល់ទន្លេ Parana ក្នុងប្រទេសអាហ្សង់ទីន។ គេប៉ាន់ស្មានថា បច្ចុប្បន្ននេះ មានប្រភេទត្រីពីរ៉ាន់ញ៉ាប្រមាណ ៣០ប្រភេទ កំពុងរស់នៅតាមបឹង និងទន្លេ នៅអាមេរិកខាងត្បូង។

៣. ត្រីពីរ៉ាន់ញ៉ា ដែលរកឃើញនៅក្រៅទ្វីបអាមេរិកខាងត្បូង គឺសុទ្ធតែជាប្រភេទសត្វចិញ្ចឹម ដោយមានតំបន់ខ្លះត្រូវបានអនុញ្ញាតឱ្យចិញ្ចឹម តែហាមដាច់ខាតក្នុងការលែងវាចូលក្នុងធម្មជាតិ។

៤. ធ្មេញរបស់ត្រីពីរ៉ាន់ញ៉ា គឺស្រួចខ្លាំងណាស់ ហើយនេះគឺជាអត្តសញ្ញាណរបស់វាតែម្តង។ សម្រាប់ត្រីធំពេញវ័យ ធ្មេញរបស់វាជាធម្យមមានកម្ពស់ ៤មីលី្លម៉ែត្រ។

៥. កម្លាំងខាំដ៏ខ្លាំងរបស់ត្រីពីរ៉ាន់ញ៉ា។ កាលពីឆ្នាំ២០១២ អ្នកស្រាវជ្រាវបានរកឃើញថា ត្រីពីរ៉ាន់ញ៉ាប្រភេទខ្មៅ ឬ ភ្នែកក្រហម ដែលជាប្រភេទធំជាងគេនៃត្រីពីរ៉ាន់ញ៉ា មានកម្លាំងខាំដ៏ខ្លាំងបំផុត គឺ៧២ផោន ស្មើនឹង៣ដងនៃទម្ងន់របស់វាឯណោះ។

៦. ត្រីពីរ៉ាន់ញ៉ា ស៊ីសាកសពមនុស្ស។ ប្រសិនបើមានមនុស្សស្លាប់ដោយសារលង់ទឹក ឬកត្តាអ្វីផ្សេង ហើយសាកសពមិនត្រូវបានស្រង់ឡើងគោកទេនោះ វានឹងក្លាយជាចំណីរបស់ត្រីពីរ៉ាន់ញ៉ា ជាក់ជាមិនខាន។ គេប៉ាន់ស្មានថា សាច់មនុស្សដែលមានទម្ងន់ ៨០គីឡូ អាចនឹងត្រូវត្រីពីរ៉ាន់ញ៉ាប្រហែល ៣០០ ទៅ ៥០០ក្បាលស៊ីអស់ត្រឹមតែ ៥នាទី។

៧. ពីរ៉ាន់ញ៉ាខ្លះ ស៊ីត្រីប្រភេទដូចគ្នា។ ឧទាហរណ៍ថា ត្រីពីរ៉ាន់ញ៉ាមួយក្បាល ស៊ីចំណីប្រហែល ២,៤៦ក្រាមក្នុងមួយថ្ងៃ ឬប្រហែល ១ភាគ៨នៃរាងកាយរបស់វា។ ដូច្នេះប្រសិនបើវាមិនមានចំណីអ្វីសម្រាប់ស៊ី គឺវានឹងស៊ីត្រីពីរ៉ាន់ញ៉ាគ្នាឯង មិនថាងាប់ ឬរស់នោះទេ។

៨. ត្រីពីរ៉ាន់ញ៉ាប្រភេទខ្លះ មិនស៊ីសាច់នោះទេ គឺវាស៊ីតែគ្រាប់ធញ្ញជាតិ ឬរុក្ខជាតិតែប៉ុណ្ណោះ។

៩. ការសិក្សាស្រាវជ្រាវមួយក្នុងឆ្នាំ១៩៧២ បានរកឃើញថា ត្រីពីរ៉ាន់ញ៉ា មានយុទ្ធសាស្រ្តវាយប្រហារទៅលើត្រីផ្សេងដែលជាគូសត្រូវ មុនគេត្រង់ភ្នែក ឬកន្ទុយ។

១០. ត្រីពីរ៉ាន់ញ៉ា ក៏មានបញ្ចេញសំឡេងគ្រហឹម ដើម្បីគំរាមដល់ត្រីដទៃផងដែរ។

១១. ត្រីពីរ៉ាន់ញ៉ា ហែលជាក្រុម ដែលអាចការពារខ្លួនពីការវាយប្រហារផ្សេងៗ ក្នុងនោះត្រីអាយុច្រើនហែលនៅកណ្តាល ហើយត្រីអាយុតិច នៅគែមសងខាង។

១២. ត្រីពីរ៉ាន់ញ៉ា វាយប្រហារលើមនុស្ស តែក្នុងករណីការពារខ្លួនប៉ុណ្ណោះ។ នៅអាមេរិកខាងត្បូង អ្នកហែលទឹក ក្នុងទន្លេ ឬបឹងដែលមានត្រីពីរ៉ាន់ញ៉ា ហើយពេលងើបឡើងគោកវិញគឺមិនឃើញមានស្លាកស្នាមពីការខាំរបស់ត្រីពីរ៉ាន់ញ៉ាឡើយ។ ប៉ុន្តែប្រសិនបើក្នុងករណីនៅទឹកដែលរាក់ ហើយខ្វះចំណីសម្រាប់ត្រីពីរ៉ាន់ញ៉ា អ្នកហែលទឹកទាំងនោះនឹងប្រឈមពីការខាំប្រហាររបស់ពួកវាជាក់ជាមិនខាន។ ក្នុងករណីភាគច្រើនបំផុត ប្រសិនបើវាខាំមនុស្ស គឺវាខាំតែម្តងប៉ុណ្ណោះ ហើយខាំតែលើជើងប៉ុណ្ណោះ។

១៣. ត្រីពីរ៉ាន់ញ៉ា ក៏ត្រូវបានគេយកមកធ្វើម្ហូបទទួលទានផងដែរ នៅផ្នែកមួយចំនួននៃតំបន់អាម៉ាហ្សូនផងដែរ ក្នុងនោះ ស៊ុបពីរ៉ាន់ញ៉ា គឺមានភាពពេញនិយមនៅតំបន់ Pantanal នៃប្រទេសប្រេស៊ីល៕

ប្រភព៖ Smithsonianmag

អត្ថបទ៖ សំភី