តារាម៉ូដែលច្រើនដួង ដើរកាត់ភ្លៀងយប់មិញ

2014-09-26 18:21:57
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាម៉ូដែលជាច្រើនដួងមកពីក្រុមម៉ូដក្នុងស្រុកផ្សេងគ្នា បានចូលរួមដើរម៉ូដសំលៀកបំពាក់ក្នុងកម្មវិធីមួយមានឈ្មោះថា Phnom Penh Designers Week 2014 ដោយម៉ូដែលទាំងនោះ បានដើរកាត់ភ្លៀងទាំងអស់គ្នា នៅយប់មិញនេះ។

អានអត្ថបទ៖ ឱក សុគន្ធកញ្ញា ក្រវិល និង ខ្សែក ម៉ាក MOSCHINO ទាំងអស់

កម្មវិធីខាងលើនេះ ព្រឹត្តិទៅនៅសណ្ឋាគារ The Plantation ដែលទីតាំងដើរម៉ូដនោះ រៀបចំឡើងដោយមិនមានដំបូលឡើយ ដូច្នេះហើយ យប់មិញនេះ នៅភ្នំពេញមានភ្លៀងខ្លាំងផង ជាហេតុធ្វើឲ្យ តារាម៉ូដែលទាំងនោះ ដើរកាត់ភ្លៀងតែម្ដង ប៉ុន្តែម្នាក់ៗមានកាន់ឆត្របាំង។

នៅក្រោមដំណក់ទឹកភ្លៀង មានខ្យល់តិចៗផងនោះ តារាម៉ូដែលមានគ្នា ១៥ នាក់ បានដើរបង្ហាញរាង និង ម៉ូដសំលៀកបំពាក់ យ៉ាងស្រស់ស្រាយ ស្ថិតក្រោមក្រសែភ្នែកទស្សនិកជនជាតិ និង អន្តរជាតិរាប់រយនាក់ចាំទស្សនា។

លោក Soap Ke ស្ថាបនិកនៃ Phnom Penh Designers Week បានឲ្យដឹងថា កម្មវិធីនេះធ្វើឡើង ដើម្បីបង្ហាញស្នាដៃច្នៃម៉ូដរបស់អ្នករចនាម៉ូដជាតិ និង អន្តរជាតិ នូវម៉ូដសំលៀកបំពាក់ប្រកបដោយការច្នៃប្រឌិតប្លែកៗ ចែកជូនដល់ទស្សនិកជនបានទស្សនា។

លោក Soap Ke បានប្រាប់ថា កម្មវិធីនេះ ធ្វើរយៈពេល ៣ ថ្ងៃជាប់គ្នាពីថ្ងៃទី ២៥ ដល់ ថ្ងៃទី ២៧ ខែ កញ្ញា ឆ្នាំ ២០១៤ ដោយនៅក្នុងនោះ មានជាងច្នៃម៉ូដជាតិ និង អន្តរជាតិជាច្រើន បានចូលរួមបង្ហាញពីស្នាដៃរបស់ខ្លួនជាមួយ តារាម៉ូដែលជាច្រើនអ្នក។

ស្ថាបនិករូបនេះបានរៀបរាប់ឲ្យដឹងថា នៅថ្ងៃទី ២៥ កញ្ញា បង្ហាញស្នាដៃ ដោយអ្នកច្នៃម៉ូដបី រូប គឺ Jamine, Uber និង Amada ដើរម៉ូដដោយតារាម៉ូដែលច្រើនអ្នក។ ថ្ងៃទី ២៦ កញ្ញា មានការចូលរួមពីអ្នកច្នៃម៉ូដ Kool As U, A.N.D និង Don Protasio ដើរម៉ូដដោយតារាម៉ូដែល ច្រើនអ្នកដូចគ្នា និង ថ្ងៃទី ២៧ កញ្ញា បង្ហាញស្នាដៃពីអ្នកច្នៃម៉ូដដោយ Waterlily, Hello Hello, Coco Wellington & Two Wonders និង Kims&Uno Sky ដើរម៉ូដដោយតារាម៉ូដែលច្រើនអ្នក។ កម្មវិធីនេះ ភ្ញៀវដែលអាចចូលរួមបាន ល្គឹកណាមានលិខិតអញ្ជើញ។

អានអត្ថបទ៖ ទេព បូព្រឹក្ស ម្រាម ១ ពាក់ចិញ្ចៀន ១០

យោងតាមលោក Soap Ke បានបញ្ជាក់ថា នេះជាលើកទី៣ ហើយ ដែល Phnom Penh Designers Week បានប្រារព្ធធ្វើកម្មវិធី។ ឆ្នាំ២០១៤នេះ មានក្រុមហ៊ុនជាច្រើនបានចូលរួមឧបត្ថម្ភ ក្នុងនោះមានក្រុមហ៊ុន Sabay ក៏ជាដៃគួសហការផ្សព្វផ្សាយកម្មវិធីនេះ ដ៏សំខាន់ផងដែរ៕

អត្ថបទ៖ ខុត សីហា