លោក Tim Cook នាយកប្រតិបត្តិនៃក្រុមហ៊ុន Apple Inc បាននិយាយថា លោកមានការរំពឹងទុកខ្ពស់ចំពោះអ្នកបង្កើតកម្មវិធី App របស់ចិន ដើម្បីទទួលបានជោគជ័យក្នុងយុគសម័យ ជាមួយនឹងឧបករណ៍ Vision Pro របស់ក្រុមហ៊ុនខ្លួន។

Tim Cook បាននិយាយនៅក្នុងបទសម្ភាសន៍មួយថា "យើងមានក្រុមអ្នកអភិវឌ្ឍន៍កម្មវិធី ដែលធ្វើការចេញពីទីក្រុងស៊ាងហៃ (សម្រាប់ Vision Pro)។ យើងបានឃើញរឿងមួយចំនួនចេញមកហើយ ហើយពួកគេនឹងធ្វើឱ្យ App ផ្ទុះឡើង”។ វែនតា Vision Pro ដែលបង្ហាញក្នុងខែមិថុនាកន្លងទៅ ដោយ Apple គឺជាប្រភេទផលិតផលថ្មីដ៏សំខាន់ដំបូងគេដែលក្រុមហ៊ុនអាមេរិកបានដាក់ឱ្យដំណើរការក្នុងរយៈពេលជិតមួយទសវត្សរ៍មកនេះ។

CEO របស់ Apple រូបនេះ បានធ្វើដំណើរទៅទស្សនាផ្ទាល់ នៅក្នុងហាង Apple មួយក្នុងទីក្រុង Chengdu ខេត្ត Sichuan ដែលនេះជាដំណើរលើកទីពីរដែលនាយកប្រតិបត្តិជាន់ខ្ពស់បាន ទៅកាន់ប្រទេសចិនក្នុងឆ្នាំ 2023នេះ ដោយបានបង្ហាញពីសារៈសំខាន់របស់ប្រទេសចិន ចំពោះបច្ចេកវិទ្យាលំដាប់ខ្ពស់ របស់សហរដ្ឋអាមេរិកដែលជាទីផ្សារដ៏សំខាន់ និងជាមជ្ឈមណ្ឌលផ្គត់ផ្គង់ខ្សែសង្វាក់ដែលមិនអាចខ្វះបាន។

យោងទៅតាម Tim Cook អ្នកបង្កើតកម្មវិធីចិនមានសក្តានុពលក្នុងការធ្វើ រឿងជោគជ័យជាសកលរបស់ពួកគេនៅលើវេទិកា visionOS របស់ក្រុមហ៊ុននាពេលអនាគត ដូចគ្នានឹងរបៀបដែលពួកគេបានធ្វើរួចនៅលើ App Store របស់ Apple ដែរ។ ការកត់សម្គាល់នេះបង្ហាញថាអ្នកអភិវឌ្ឍន៍ជនជាតិចិនមិនត្រឹមតែមានសារៈសំខាន់ចំពោះប្រព័ន្ធអេកូឡូស៊ី iPhone បច្ចុប្បន្នរបស់ក្រុមហ៊ុន Apple ប៉ុណ្ណោះទេ ថែមទាំងជាគន្លឹះដល់ប្រព័ន្ធអេកូឡូស៊ី AR នាពេលអនាគតរបស់ក្រុមហ៊ុនផងដែរ៕