ក្ដីស្រមៃក្លាយជាការពិត! រង់ចាំអស់ជាយូរ ថ្ងៃបញ្ចាំងរឿង «សង្សារ ១៤ថ្ងៃ» ក៏បានមកដល់

2023-10-19 09:11:26
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃទី ១៨ ខែតុលា ឆ្នាំ ២០២៣ អ្នកនិពន្ធ ក្រុមការងារផលិតរឿង និងតួសម្ដែងក្នុងរឿង «សង្សារ ១៤ថ្ងៃ» បានមកជួបជុំគ្នាយ៉ាងរីករាយ ក្នុងពិធីសម្ពោធបញ្ចាំងជាផ្លូវការរឿង «សង្សារ ១៤ថ្ងៃ» នៅផ្សារទំនើបអ៊ីអនភ្នំពេញ ដោយមានការរៀបចំដោយ Sabay MVP។

ភាពយន្តខ្នាតធំខ្មែរ «សង្សារ ១៤ថ្ងៃ» កើតចេញពីការនិពន្ធដោយផ្ទាល់របស់ លោក សុខ ចាន់ផល អ្នកនិពន្ធរឿងដ៏ឆ្នើមរបស់កម្ពុជា ដែលបានយកឈ្នះចិត្តមិត្តអ្នកអានជាច្រើននាក់ តាមរយៈប្រលោមលោកដ៏សម្បូរបែបនាពេលកន្លងមក។

អាស្រ័យដោយសាច់រឿងគួរឲ្យចាប់អារម្មណ៍ ទើបប្រលោមលោក «សង្សារ ១៤ថ្ងៃ» ត្រូវបានប្រែក្លាយទៅជាភាពយន្តខ្នាតធំជាផ្លូវការ ដោយមានតារាសម្ដែង ស៊ឹម ស្រីនិច្ច និង ហូ សារៈ ជាតួឯក។

ដោយឡែកនៅថ្ងៃសម្ពោធ ក៏មានការផ្ដល់បទសម្ភាសពីសំណាក់ អ្នកនិពន្ធរឿង សុខ ចាន់ផល និងតារាសម្ដែង ស៊ឹម ស្រីនិច្ច ដែលជាតួឯក ដោយអ្នកទាំងពីរ បានបង្ហាញការយល់ឃើញដូចគ្នា ពីក្ដីរំភើបមិនអាចកាត់ថ្លៃបាន ដែលភាពយន្តនេះត្រូវបានដាក់បញ្ចាំង ក្រោយសម្រិតសម្រាំងជាច្រើនឆ្នាំ។

ដូច្នេះជាការគាំទ្រវិស័យភាពយន្តខ្មែរ និងដើម្បីកុំឲ្យខ្សែរឿងដ៏ល្អនេះរំលងផុត លោកអ្នកអាចទៅទស្សនាបាននៅគ្រប់រោងភាពយន្ត ពីថ្ងៃទី ១៩ ខែតុលា ឆ្នាំ ២០២៣ នេះតទៅ៕