ហេតុផលនាំចិត្តអ្នកនិពន្ធ សុខ ចាន់ផល ជ្រើស ស៊ឹម ស្រីនិច្ច និងហូ សារៈ ជាតួឯករឿង «សង្សារ១៤ថ្ងៃ»

2023-10-27 03:14:21
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿង «សង្សារ ១៤ថ្ងៃ» ជាភាពយន្តខ្នាតធំ ដែលជាស្នាដៃនិពន្ធរបស់លោក សុខ ចាន់ផល អ្នកនិពន្ធដែលបានសាងភាពល្បីល្បាញក្នុងវិស័យនេះជាច្រើនឆ្នាំ។ នេះជារឿងដែលបានដកស្រង់ចេញពីប្រលោមលោកស្នេហាដែលមានចំណងជើងដូចគ្នានេះដែរ។

ក្រៅពីសាច់រឿងស្នេហា បង្ហាញពីដំណើរជីវិតរបស់កំលោះក្រមុំមួយគូ «សង្សារ១៤ថ្ងៃ» ក៏បានធ្វើឲ្យអ្នកទស្សនាជក់ចិត្តនឹងការសម្ដែងរបស់ តួអង្គទាំងអស់ដែរ ដោយក្នុងនោះតួឯកប្រុសស្រីធ្វើឲ្យគ្រប់គ្នាតាមដានជាងគេ។

ស៊ឹម ស្រីនិច្ច ត្រូវសម្ដែងជាតួ យ៉ានី យុវតីវ័យក្មេងដែលមានបេះដូងបរិសុទ្ធ និងទន់ភ្លន់ តែត្រូវខកចិត្តដោយសារតែស្នេហាគ្រាដំបូងរបស់នាងកាលពីនៅសិក្សា។ ដោយសារតែភាពឈឺចាប់នេះបានបានធ្វើឲ្យនាង កែប្រែជីវិតក្លាយជានារីដែលមានភាពរឹងមាំ និងមិនចេះចុះចាញ់នឹងជីវិតដែលព្រហ្មលិខិតតាក់តែងមក។

មាសា គឺជាតួឯកប្រុសដែលបានក្លាយជាហេតុផលដែលធ្វើឲ្យបេះដូងយុវតី **យ៉ានី**ត្រូវគ្រាំគ្រា។ ប៉ុន្តែដោយសារនិស្ស័យគូ ចិត្តស្រឡាញ់របស់គេមិនបានទៅណាឡើយ ពោលគឺនៅដក់ជាប់នឹងតួស្រីរហូតមករាប់ឆ្នាំ។ តួ មាសា ត្រូវបានសម្ដែងដោយលោក ហូ សារៈ។

ដោយឡែក តើមានមូលហេតុអ្វី ទើបអ្នកនិពន្ធ សុខ ចាន់ផល ដែលក៏ជាអ្នកជ្រើសតួ សម្រេចយកតារាប្រុសស្រីទាំងពីរមកសម្ដែងនៅក្នុងភាពយន្តខ្នាតធំមួយនេះ?

ផ្អែកតាមការផ្ដល់បទសម្ភាសផ្ទាល់ជាមួយនឹងក្រុមការងារ Sabay អ្នកនិពន្ធឆ្នើមរូបនេះបានឲ្យដឹងថា ហេតុផលដែលលោកជ្រើសតារាសម្ដែង ស៊ឹម ស្រីនិច្ច ក៏ព្រោះនៅពេលលោកសរសេររឿងនេះ លោកបាននឹកឃើញដល់នាងភ្លាម។ ចរិតបែបកាច រឹងមាំរបស់តួ ប៉ុន្តែបង្កប់នូវអារម្មណ៍អ្វីម្យ៉ាងដែលគ្មានអ្នកណាស្មានដល់ ពិតជាត្រូវនឹង ចរិតរបស់ ស្រីនិច្ច ទើប លោក សុខ ចាន់ផល លែងស្ទាក់ស្ទើរ និងសម្រេចយកនាងជាតួឯកស្រីតែម្ដង។ បន្ថែមពីលើនេះ សមត្ថភាពរបស់ ស៊ឹម ស្រីនិច្ច ពិតជាមិនធម្មតា ពោរពេញទៅដោយភាពប៉ិនប្រសប់ និងគយរឲ្យសរសើរ។

ហូ សារៈ ដែលគ្រប់គ្នាស្គាល់ច្បាស់ជា អតីត Freshie Boy លេខ១ ប្រចាំឆ្នាំ ២០១១ វិញ ទទួលតំណែងតួឯកប្រុសក្នុងរឿង «សង្សារ១៤ថ្ងៃ»។ បើតាមអ្នកនិពន្ធដដែលបានបញ្ជាក់ថា តារាប្រុសរូបនេះពុំសូវជាបង្ហាញមុខច្រើនទេក្នុងវិស័យសិល្បៈនាពេលកន្លងមក។ ប៉ុន្តែហេតុផលដែលលោក សុខ ចាន់ផល ជ្រើស សារៈ ក៏ដោយសារមុខមាត់ និងចរិតដែលពិតជាស័ក្តិសមនឹងតួ មាសា បំផុត។

ដូច្នេះ ដើម្បីកាន់តែជ្រាបច្បាស់ថាតើភាពយន្តខ្នាតធំ បម្លែងខ្លួនពីប្រលោមលោកស្នេហា «សង្សារ១៤ថ្ងៃ» មានរសជាតិយ៉ាងណា ប្រិយមិត្តអាចទៅទស្សនាបាន នៅគ្រប់រោងភាពយន្តក្នុងប្រទេសកម្ពុជា ចាប់ពីថ្ងៃទី ១៩ ខែតុលា ឆ្នាំ២០២៣ តទៅ៕

អត្ថបទ៖ ធារី