សហព័ន្ធកីឡាទោចក្រយាន៖ ជឿជាក់ក្រុមកម្ពុជានឹងធ្វើបានល្អការប្រកួតអន្តរជាតិនៅឡាវ

2023-12-04 06:47:04
ចំនួនមតិ 0 | ចំនួនចែករំលែក 0

ចន្លោះមិនឃើញ

អគ្គលេខាធិការសហព័ន្ធកីឡាទោចក្រយាន មានការជឿជាក់លើក្រុមកីឡាករកម្ពុជាទាំង១៥រូបដែលប្រកួតអន្តរជាតិនៅប្រទេសឡាវនេះនឹងធ្វើបានល្អជាមិនខាន។

លោក នូ ចំរើន អគ្គលេខាធិការសហព័ន្ធ

លោក នូ ចំរើន បានឲ្យដឹងថា តាមរយៈការពិនិត្យមើលឃើញក្រុមកីឡាករកម្ពុជាទាំង១៥រូបដែលចេញទៅប្រកួតនៅប្រទេសឡាវនេះនឹងធ្វើបានល្អជូនជាតិមាតុភូមិ និងម្ចាស់ឧបត្ថម្ភនានា ព្រោះតែការខំប្រឹងហ្វឹកហាត់បានល្អ និងឆន្ទៈខ្ពស់ក្នុងការប្រកួត។

ក្រុមដែលជ្រើសរើសបញ្ជូនទៅនេះគឺបានមកពីបណ្ដាក្លឹបសមាជិកនានាមានទាំងនៅភ្នំពេញ និងបណ្ដាខេត្ត។ នេះជាការផ្ដល់ឱកាសមួយដល់យុវជនមួយពិសេសអ្នកធ្លាប់ជាប់ជម្រើសជាតិ និងអ្នកដែលមិនមែនជាជម្រើសជាតិឲ្យបានចេញប្រកួតលក្ខណៈអន្តរជាតិ និងសន្សំពិសោធ ពង្រឹងសមត្ថភាពផងដែរ។ ក្រុមដែលប្រកួតនេះបានប្រមូលផ្ដុំហ្វឹកហាត់រយៈពេល១ខែក្នុងការត្រៀម។

ទិដ្ឋភាពសន្និសីទសារព័ត៌មាន

ជាមួយគ្នានេះដែរសហព័ន្ធថ្លែងអំរណគុណដល់ម្ចាស់ឧបត្ថម្ភមួយចំនួនដែលជួយគាំទ្រជាថវិកា និងសម្ភារក្ដីដល់ក្រុមកម្ពុជាប្រកួតនៅប្រទេសឡាវនេះ។ ក្នុងនាមសហព័ន្ធអំពាវនាវដល់បណ្ដាក្រុមហ៊ុនផ្សេងៗផងដែរប្រសិនបើចង់ចូលរួមលើកស្ទួយ និងផ្សព្វផ្សាយកីឡាប្រណាំងកង់នៅកម្ពុជាអាចទំនាក់ទំនងសហព័ន្ធដើម្បីឧបត្ថម្ភបាន។

ទិដ្ឋភាពសន្និសីទសារព័ត៌មាន

រំលឹកដែរថា ការប្រកួតនេះគឺបានការអញ្ជើញពីសហព័ន្ធកង់របស់ប្រទេសឡាវ។ ប្រទេសចូលរួមមាន ឡាវ កម្ពុជា និងវៀតណាម។ ក្រុមកម្ពុជាបញ្ជូនកីឡាករទៅ១៥នាក់ និងបែងចែកជា៣ក្រុម។ ព្រឹត្តិការណ៍នេះចាប់ពីថ្ងៃទី៣ ដល់ទី៧ ខែធ្នូ ឆ្នាំ២០២៣ នៅទីក្រុងវៀងចន្ទន៍ ប្រទេសឡាវ៕

SabayOne កម្មវិធីកម្សាន្តថ្មីរបស់ Sabay បើកឲ្យប្រើសាកល្បងពីពេលនេះ! ចុះឈ្មោះតាមរយៈតំណភ្ជាប់នេះ https://bit.ly/3QVlYVB

អត្ថបទ៖ នួន ស៊ីណា