Kane អាចមិនបានឈ្នះពានក្នុងរដូវកាលនេះ ទោះមានទម្រង់លេងល្អ

2024-03-06 11:28:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Harry Kane អាចបន្តកំណត់ត្រាមិនដែលឈ្នះពានជាក្រុមក្នុងរដូវកាលនេះ បើទោះជាមានទម្រង់លេងល្អក្ដី។

មូលហេតុគឺដោយសារ Bayern Munich ក្នុងលក្ខណៈជាក្រុម បានធ្លាក់ទម្រង់លេងក្នុងរដូវកាល ២០២៣/២០២៤។ បច្ចុប្បន្ន ក្នុងលីគកំពូលអាល្លឺម៉ង់ ក្លឹបកំពុងឈរ ២ មាន ៥៤ ពិន្ទុក្នុងដៃ ឃ្លាតចំនួន ១០ ពិន្ទុពីក្លឹបកំពូលតារាង Bayer Leverkusen ដែលមាន ៦៤ ពិន្ទុ។ បើសិនជាស្ថានភាពបែបនេះនៅតែបន្ត រដូវកាលនេះអាចជារដូវកាលដំបូងក្នុងរយៈពេល ១២ រដូវកាលចុងក្រោយ ដែល Bayern មិនបានឈ្នះពានលីគកំពូលអាល្លឺម៉ង់ Bundesliga។

លើសពីនេះ កាលពីខែវិច្ឆិកា ឆ្នាំ២០២៣ Bayern Munich បានធ្លាក់ពីកម្មវិធី German Cup ក្រោយចាញ់ក្លឹបលីគលំដាប់ ៣ FC Saarbrücken ក្នុងលទ្ធផល ២ ទល់នឹង ១។

ក្នុងកម្មវិធី Champions League បើទោះជា Bayern ទើបឈ្នះបានឡើងទៅវគ្គ ៨ ក្រុមចុងក្រោយ តែមជ្ឈដ្ឋានបាល់ទាត់ជាច្រើនយល់ថា ជាមួយទម្រង់លេងបច្ចុប្បន្នរបស់ Bayern ក្លឹបមានឱកាសតិចក្នុងការយកឈ្នះ Champions League ជាពិសេសនៅពេលក្លឹបខ្លាំងៗដូចជា Real Madrid និង Manchester City កំពុងឡើងទម្រង់លេង។

ហេតុដូច្នេះ លទ្ធភាពដែល Bayern អាចមិនឈ្នះពានអ្វីសោះក្នុងរដូវកាលនេះគឺអាចក្លាយជាការពិត។ នេះអាចជាមូលហេតុសំខាន់មួយដែលនាំឲ្យក្លឹបបានប្រកាសចែកផ្លូវជាមួយអ្នកចាត់ការ Thomas Tuchel នៅចប់រដូវកាលនេះ។

បើសិន Bayern មិនឈ្នះពានមែនក្នុងរដូវកាលនេះ មានន័យថា Harry Kane បានបន្តកំណត់ត្រាមិនដែលឈ្នះពានជាក្រុមក្នុងរដូវកាលនេះ។

Kane មិនដែលឈ្នះពានធំៗជាមួយក្លឹបនោះទេ បើទោះជាតែងបង្ហាញទម្រង់លេងយ៉ាងល្អក្នុងកម្រិតបុគ្គលយ៉ាងណាក្ដី។ មុនមកចូលរួម Bayern កាលពីរដូវកាលមុន ក្នុងតម្លៃប្រមាណ ១០០ លានអឺរ៉ូ ខ្សែប្រយុទ្ធវ័យ ៣០ ឆ្នាំ Kane បានចំណាយពេលដល់ទៅ ១៣ រដូវកាលលេងឲ្យក្លឹបអង់គ្លេស Tottenham Hotspur។ ក្នុងអំឡុងពេលនោះ កីឡាករលេងសរុប ៤៣៥ ប្រកួត និងស៊ុតចូល ២៨០ គ្រាប់ ហើយបានឈ្នះពានឯកជនជាច្រើន ដូចជាឈ្នះស្បែកជើងមាស Premier League ដល់ទៅ ៣ ដង។ ទោះជាយ៉ាងណា កីឡាកររូបនេះ មិនដែលធ្លាប់ស្គាល់រសជាតិឈ្នះពានជាក្រុមឡើយ។

កាលពីខែសីហា ឆ្នាំ ២០២៣ កីឡាករបានសម្រេចចេញពី Spurs មកចូលរួមជាមួយ Bayern ដោយចុះកុងត្រារយៈពេល ៤ ឆ្នាំ។ កីឡាករបានបន្តបង្ហាញទម្រង់លេងយ៉ាងល្អ ក្នុងនោះលេងសរុប ៣៣ ប្រកួត និងស៊ុតចូល ៣៣ គ្រាប់។ យ៉ាងនេះក្ដី បើ Bayern មិនអាចឈ្នះពានអ្វីសោះក្នុងរដូវកាលនេះ មានន័យថា Kane ប្រមាណត្រូវរង់ចាំរដូវកាលក្រោយៗដើម្បីមានឱកាសឈ្នះពានជាក្រុមជាមួយ Bayern ដែលជាបណ្ដាពានជាក្រុមដំបូងដែលខ្សែប្រយុទ្ធរូបនេះអាចឈ្នះក្នុងអាជីពរបស់ខ្លួន៕

ប្រភព៖ Goal អត្ថបទ៖ សេរី មង្គល