តានតឹងរហូតទាត់បាល់ ១១ម៉ែទ្រកាត់សេចក្ដី! ទើបរកឃើញជើងឯកពានរង្វាន់ខណ្ឌកំបូល លើកទី៣ ម្សិលមិញ
- 2024-04-04 04:43:57
- ចំនួនមតិ 0 | ចំនួនចែករំលែក 0
តានតឹងរហូតទាត់បាល់ ១១ម៉ែទ្រកាត់សេចក្ដី! ទើបរកឃើញជើងឯកពានរង្វាន់ខណ្ឌកំបូល លើកទី៣ ម្សិលមិញ
ចន្លោះមិនឃើញ
ការប្រកួតវគ្គផ្ដាច់ព្រ័ត្រពានរង្វាន់បាល់ទាត់ខណ្ឌកំបូល រវាងក្រុមបាល់ទាត់សង្កាត់ស្នោរ A និងក្រុមបាល់ទាត់សង្កាត់កំបូល A បុកទៅបុកមកពេញ ៩០នាទីបានត្រឹមលទ្ធផលស្មើ ២-២ ប៉ុណ្ណោះរហូតឈានដល់បាល់កាត់សេចក្ដី ១១ម៉ែត្រទើបរកឃើញក្រុមឈ្នះលើកពានរដូវកាលទី៣នេះ។ ក្រុមបាល់ទាត់សង្កាត់កំបូល A ក្លាយជាជើងឯកបន្ទាប់ពីឈ្នះលើការទាត់បាល់ ១១ម៉ែត្រ កាត់សេចក្ដីដោយលទ្ធផល ៤-២ កាលពីរសៀលម្សិលមិញនេះ។
លោក ឃឹម ស៊ុនសូដា អភិបាលខណ្ឌកំបូល បានឲ្យដឹងក្រោយបញ្ចប់ការប្រកួតថា ពានរង្វាន់ខណ្ឌកំបូលនេះគឺបង្កើតឡើងតាំងពីឆ្នាំ២០១៩ មកម្ល៉េះ។ ការពិតត្រូវរៀបចំការប្រកួតជារៀងរាល់ឆ្នាំ ប៉ុន្តែដោយវិបត្តិកូវីដជាសកលធ្វើឲ្យពានរង្វាន់មួយនេះខកខាន និងរៀបចំទើបតែបាន ៣លើកប៉ុណ្ណោះ។
អភិបាលខណ្ឌខាងលើលើកឡើងទៀតថា មូលហេតុបង្កើតឲ្យមានពានរង្វាន់នេះឡើងគោលបំណងសំខាន់ឲ្យយុវជនទាំង៧សង្កាត់ក្នុងខណ្ឌកំបូលនេះបានលេខកីឡា បង្កើនមិត្តភាពឲ្យបានស្គាល់គ្នាទៅវិញទៅមក។ បន្ថែមពីនេះទៅទៀតគឺបំផុសគំនិតយុវជនបន្ទាប់ពីការសិក្សាត្រូវលេងកីឡា ពិសេសក្នុងដំណើរជីវិតយុវជនម្នាក់ៗត្រូវមានកីឡាមួយប្រភេទក្នុងខ្លួនដើម្បីសុខភាពផង និងចៀសឆ្ងាយពីគ្រឿងញៀនផង។
ស្ថាបនិកពានរង្វាន់ខណ្ឌកំបូលបញ្ជាក់ទៀតថា ការប្រកួតនេះក៏ជាឱកាសសម្រាប់ខណ្ឌផ្ទាល់អាចជ្រើសរើសកីឡាករឆ្នើមចំនួន ២២នាក់ ដើម្បីហ្វឹកហាត់ត្រៀមចូលរួមប្រកួតប្រជែងពានរង្វាន់បាល់ទាត់អន្តរក្រសួងដែលរៀបចំឡើងដោយ ស.ស.យ.ក។
រំលឹកដែរថា ពានរង្វាន់បាល់ទាត់ខណ្ឌកំបូល លើកទី៣ នេះបានបិទបញ្ចប់ជាផ្លូវការហើយកាលពីម្សិលមិញនៅទីលានបាល់ទាត់ក្នុងបន្ទាយឆត្រយោង ៩១១ ក្រោយចំណាយពេលអស់ ១៨ថ្ងៃកន្លងទៅ។ ក្រុមបាល់ទាត់សង្កាត់កំបូល A ក្លាយជាជើងឯក ទទួលបានពាន១ និងថវិកាលើកទឹកចិត្ត ៦លានរៀល លេខ២ បានលើក្រុមបាល់ទាត់សង្កាត់ស្នោរ A ទទួលបានថវិកាលើកទឹកចិត្តចំនួន ៤លានរៀល និងលេខ៣ បានលើក្រុមបាល់ទាត់សង្កាត់បឹងធំ ទទួលបានថវិកាលើកទឹកចិត្ត ២លានរៀល៕