ចូលឆ្នាំខ្មែរជិតមកដល់ហើយ! មកមើលស្ថានភាពផ្លូវ វាលរេញ-ត្រពាំងរពៅ វិញម្តងមើល យ៉ាងណាហើយ
- 2024-04-05 02:33:08
- ចំនួនមតិ 0 | ចំនួនចែករំលែក 0
ចូលឆ្នាំខ្មែរជិតមកដល់ហើយ! មកមើលស្ថានភាពផ្លូវ វាលរេញ-ត្រពាំងរពៅ វិញម្តងមើល យ៉ាងណាហើយ
ចន្លោះមិនឃើញ
ខណៈពិធីបុណ្យចូលឆ្នាំថ្មីប្រពៃណីជាតិខិតជិតមកដល់ មន្ទីរសាធារណការ និងដឹកជញ្ជូនខេត្តព្រះសីហនុ បានធ្វើការជួសជុលកំណាត់ផ្លូវជាតិលេខ៣ វាលរេញ-ត្រពាំងរពៅ ដើម្បីឱ្យប្រជាពលរដ្ឋងាយស្រួលធ្វើដំណើរជាងមុន។
បើតាមការបញ្ជាក់របស់អភិបាលស្រុកព្រៃនប់ លោក អ៊ី ធារិន បានឱ្យដឹងដូច្នេះថា៖ «គិតត្រឹមថ្ងៃទី៤ មេសា ២០២៤ យានយន្តគ្រប់ប្រភេទអាចបើកបរលើកំណាត់ផ្លូវជាតិលេខ៣ (វាលរេញ- ត្រពាំងរពៅ) ក្នុងស្រុកព្រៃនប់ ខេត្តព្រះសីហនុបាន មិនសូវពិបាកដូចមុនទៀតទេក្រោយមន្ទីរសាធារណការនិងដឹកជញ្ជូនខេត្តធ្វើការជួសជុលសម្រួលបណ្តោះអាសន្ន។»
សូមជម្រាបថា កំណាត់ផ្លូវនេះមានប្រវែង ២០គីឡូម៉ែត្រ តែងរងការខូចខាតជាប្រចាំ បន្ទាប់ពីសាងសង់រួចក្នុងរយៈពេលខ្លី ដោយសារតែស្ថានភាពដីនៅតំបន់នេះ ជាប្រភេទដីស្អុយ បៀមទឹកខ្លាំង ហើយដើម្បីឱ្យការស្ថាបនាកំណាត់ផ្លូវនេះឡើងវិញជាប់ធន់បានយូរ ទាមទារការប្រើប្រាស់បច្ចេកសាងសង់ខ្ពស់ ជាពិសេសការសាងសង់គ្រឹះទម្រស្រទាប់កម្រាលផ្លូវតែម្តង។ រាជរដ្ឋាភិបាលកម្ពុជា កំពុងស្វែងរកថវិកាប្រមាណ ៦០លានដុល្លារ ដើម្បីសាងសង់តាមស្តង់ដារ និងរឹងមាំបានយូរ។
យ៉ាងណាមិញ មុននឹងអាចឈានទៅអនុវត្តការងារសាងសង់ជាក់ស្តែងឲ្យស្របទៅតាមបទដ្ឋានបច្ចេកទេសខ្ពស់នាពេលខាងមុខ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ចូន បានណែនាំឲ្យមន្ទីរសាធារណការ និងដឹកជញ្ជូនខេត្តព្រះសីហនុ ជួសជុលស្រាល ថែទាំប្រចាំបណ្តោះអាសន្នកំណាត់ផ្លូវជាតិលេខ៣ (ត្រពាំងរពៅ-វាលវេញ) ប្រវែង២០គីឡូម៉ែត្រនេះ។ ក្រុមការងារបច្ចេកទេស នៃមន្ទីរសាធារណការ និងដឹកជញ្ជូនខេត្តព្រះសីហនុ បានកែលម្អស្ថានភាពផ្លូវ ភ្ជួរ កៀរ កិន បង្ហាប់ ដើម្បីសម្រួលចរាចរណ៍ និងដំណើរឆ្លងកាត់របស់ប្រជាពលរដ្ឋលើកំណាត់ផ្លូវនេះក្នុងល្បឿនមធ្យម៕