Mbappe ទទួលខុសគ្រប់យ៉ាង ពេល PSG ចាញ់ Dortmund

2024-05-08 11:24:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធបារាំង Kylian Mbappe សុខចិត្តទទួលខុសគ្រប់យ៉ាង នៅពេលក្លឹបយក្សបារាំង Paris Saint-Germain ចាញ់ក្លឹបអាល្លឺម៉ង់ Borussia Dortmund នៅក្នុងវគ្គពាក់កណ្ដាលផ្ដាច់ព្រ័ត្រក្របខ័ណ្ឌកំពូលអឺរ៉ុប UEFA Champions League។

Dortmund បានយកឈ្នះ Paris Saint-Germain ទាំងពីរជើង ដោយទាំងលេងនៅស្រុកបារាំង និងស្រុកអាល្លឺម៉ង់ ក្លឹបនេះយកឈ្នះក្នុងលទ្ធផល ១ ទល់នឹង ០ ទាំងពីរជើង។ Dortmund បានកក់កៅអីទៅលេងវគ្គផ្ដាច់ព្រ័ត្រ Champions League ដែលនឹងប្រព្រឹត្តិទៅនៅរាជធានីឡុងដុង ប្រទេសអង់គ្លេសនៅខែក្រោយនេះ។

ទាក់ទិននឹងបរាជ័យនេះដែរ ខ្សែប្រយុទ្ធបារាំង Kylian Mbappe បានប្រាប់អ្នកសារព័ត៌មានថា មកពីខ្លួនមិន «អារកាត់» គ្រប់គ្រាន់ ពេលចំមុខទី Dortmund ទើបបណ្ដាលឱ្យខាង ក្លឹបប៉ារីសចាញ់ និងធ្លាក់ពី Champions League ដូច្នេះ។

កីឡាករកើតឆ្នាំ ១៩៩៨រូបនេះបាននិយាយថា៖ «ខ្ញុំព្យាយាមជួយក្រុមរបស់ខ្ញុំអស់ពីចិត្តហើយ តែខ្ញុំធ្វើមិនបានគ្រប់គ្រាន់... ខ្ញុំគួរតែជាមនុស្សដែលត្រូវស៊ុតចូលឱ្យបានច្រើន និងត្រូវចេះអារកាត់ជាងនេះ»។

«នៅពេលក្រុមឈ្នះ ខ្ញុំមានមុខមាត់ ហើយនៅពេលក្រុមចាញ់ ខ្ញុំត្រូវតែរ៉ាប់រ៉ងផងដែរ។ ខ្ញុំគួរតែស៊ុតឱ្យបានច្រើនជាងនេះ»។ នេះបើតាមការបន្ថែមរបស់ Mbappe។

សូមជម្រាបផងដែរថា បើតាមស្ថិតិក្នុងការប្រកួតរវាង PSG និង Dortmund កាលពីយប់ថ្ងៃអង្គារ ខាងក្លឹបបារាំងស៊ុតឡើង ៣០ជើងឯណោះ តែត្រូវគោលដៅ ៥ដង ចំណែកឯ Dortmund ស៊ុត ៧ជើង ត្រូវគោលដៅ ៣ដង ហើយចូលទីបាន ១គ្រាប់៕