Leverkusen ឡើងវគ្គផ្ដាច់ព្រ័ត្រ Europa League ជាមួយនឹងកំណត់ត្រាថ្មីនៅអឺរ៉ុប

2024-05-10 10:51:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹប Bayer Leverkusen បានកក់កៅអីនៅវគ្គផ្ដាច់ព្រ័ត្រនៃក្របខ័ណ្ឌលំដាប់ទី២ អឺរ៉ុប UEFA Europa League ក្រោយពីប្រកួតស្មើគ្នាជាមួយនឹងក្លឹបអ៊ីតាលី AS Roma ក្នុងលទ្ធផល ២ ទល់នឹង ២ នៅក្នុងជើងទី២នៃវគ្គពាក់កណ្ដាលផ្ដាច់ព្រ័ត្រកាលពីថ្ងៃព្រហស្បត្តិ៍កន្លងទៅ។ កាលពីជើងទី១ ក្លឹបនេះយកឈ្នះខាងអ៊ីតាលី ២-០។

ក្លឹបអាល្លឺម៉ង់នេះនឹងប៉ះជាមួយនឹងក្លឹបអ៊ីតាលី Atalanta នៅវគ្គផ្ដាច់ព្រ័ត្រ ដែលនឹងប្រព្រឹត្តិទៅនៅរដ្ឋធានីឌូប្លីន ប្រទេសអៀរឡង់ នៅយប់រំលងអធ្រាត្រថ្ងៃពុធ ២២ ឧសភា ឬ ព្រឹកថ្ងៃទី២៣ ឧសភា វេលាម៉ោង ២យប់ (ម៉ោងនៅកម្ពុជា)។

កាន់តែពិសេសទៅទៀត ក្លឹបនេះបានបំបែកកំណត់ត្រាជាក្លឹបដែលលេងមិនដែលចាញ់សោះយូរជាងគេនៅទ្វីបអឺរ៉ុប ដោយក្លឹបនេះលេងមិនដែលចាញ់ជាប់គ្នា ៤៩ប្រកួត។ កំណត់ត្រាចាស់កាន់កាប់ដោយក្លឹបព័រទុយហ្គាល់ Benfica តាំងពីទសវត្ស ១៩៦០ ឯណោះ។

Leverkusen នៅពេលនេះកំពុងតែដឹកនាំដោយលោក Xabi Alonso ដែលជាអតីតកីឡាករជម្រើសជាតិអេស្ប៉ាញ ធ្លាប់លេងនៅ Real Madrid និងLiverpool។ ក្លឹបនេះបានបំបាក់ Bayern Munich ហើយយកឈ្នះពានលីគកំពូលអាល្លឺម៉ង់នៅក្នុងរដូវកាល ២០២៣/២៤នេះ៕