ផ្លូវជាតិដ៏សំខាន់បំផុត២ខ្សែ គឺផ្លូវជាតិលេខ៤ ទៅកាន់ខេត្តព្រះសីហនុ និងផ្លូវជាតិលេខ៧ ទៅដល់​ទីរួមខេត្តកំពង់ចាម នឹងសាងសង់រួចរាល់​នៅត្រឹមឆ្នាំ២០២៦។

គម្រោងស្តារ និងលើកកម្រិតគុណភាពផ្លូវជាតិលេខ៤ (ភ្នំពេញ-ព្រះសីហនុ) សម្រេចបាន ៥៤,៨០% គិតត្រឹមដំណាច់ខែមិថុនា ឆ្នាំ២០២៤ និងគ្រោងបញ្ចប់នៅថ្ងៃទី៣១ ខែធ្នូ ឆ្នាំ២០២៦។

ផ្លូវនេះ​ស្ថិតនៅក្រោមការអនុវត្តគម្រោង និងកម្មវិធីហិរញ្ញប្បទានដោយធនាគារពិភពលោក ដែលមានទឹកប្រាក់ចំនួន ១១០លានដុល្លារអាមេរិក ដោយ​អនុវត្តចំនួន០៨ឆ្នាំ (២០១៨-២០២៦)។ ហិរញ្ញប្បទាននេះ ប្រើប្រាស់សម្រាប់ជួសជុល និងថែទាំផ្លូវជាតិលេខ៤ ប្រវែង១៩៦,១០គីឡូម៉ែត្រ ដោយពង្រីកតួផ្លូវ ជីកប្រឡាយ និងជួសជុលស្ពានចាស់ សាងសង់ស្ពានថ្មី និងប្រើប្រាស់សម្រាប់ធ្វើបច្ចុប្បន្នភាពប្រព័ន្ធគ្រប់គ្រងទិន្នន័យផ្លូវថ្នល់ ព្រមទាំងបណ្តុះបណ្តាបច្ចេកទេសដល់ស្ថាប័នរដ្ឋ។

ចំណែក​គម្រោង​ពង្រីក និងលើកកម្រិតគុណភាពកំណាត់ផ្លូវជាតិលេខ៧ មានប្រវែងសរុបជាង ៤៥គីឡូម៉ែត្រ ចាប់ផ្តើមពីរង្វង់មូលស្គន់ ទីរួមស្រុកជើងព្រៃ ទៅដល់រង្វង់មូលគល់ស្ពានគីហ្សូណា ក្រុងកំពង់ចាម ខេត្តកំពង់ចាម សម្រេចបាន​២០% និងដោះស្រាយផលប៉ះពាល់បាន ៨៥% គិតត្រឹមដើមខែ​កក្កដា ឆ្នាំ​២០២៤។

ផ្លូវនេះនឹងត្រូវស្ថាបនាជាប្រភេទផ្លូវក្រាលបេតុងកៅស៊ូ (AC) និងពង្រីកទទឹងតួផ្លូវពី ២គន្លង ទៅ ៤គន្លង ដោយប្រើប្រាស់រយៈពេលសាងសង់ចំនួន ៤០ខែ ហើយការដ្ឋាននឹងបញ្ចប់នៅក្នុងឆ្នាំ ២០២៦។ ផ្លូវនេះ នឹងរួមបញ្ចូលនូវការសាងសង់ស្ពានថ្មី ចំនួន ១កន្លែង ប្រវែង ៤០ម៉ែត្រ មានទទឹង ២៤ម៉ែត្រ ស្ពានថ្មីចំនួន ៦កន្លែងផ្សេងទៀត ប្រវែងសរុប ១០៦ម៉ែត្រ មានទទឹង ១២ម៉ែត្រ និងពង្រីកបន្ថែមស្ពានចាស់ដែលមានស្រាប់ចំនួន ១កន្លែង ទទឹង ១០,៥ម៉ែត្រ៕

អត្ថបទ៖ សំភី