មន្ទីរពេទ្យអន្តរជាតិ ខេមា ប្ដេជ្ញាផ្ដល់សេវាកម្មថែទាំ និងព្យាបាលជំងឺកាន់តែប្រសើរ ក្នុងថ្ងៃសម្ពោធដាក់ឲ្យប្រើប្រាស់អគារថ្មី

2024-08-09 08:23:29
ចំនួនមតិ 0 | ចំនួនចែករំលែក 0

ចន្លោះមិនឃើញ

មន្ទីរពេទ្យអន្តរជាតិ ខេមា បានសម្ភោធដាក់ឱ្យប្រើប្រាស់អគារថ្មីរបស់ខ្លួនជាផ្លូវការ ដែលមានទីតាំងនៅជាប់អគារចាស់ ស្ថិតនៅផ្ទះលេខ១៨ ផ្លូវ៥២៨ សង្កាត់បឹងកក់១ ខណ្ឌទួលគោក រាជធានីភ្នំពេញ ដោយអគារថ្មីនេះ មានបន្ទប់ធំទូលាយ ប្រកបដោយផាសុកភាព អនាម័យខ្ពស់ បំពាក់ដោយប្រព័ន្ធសុវត្ថិភាព និងឧបករណ៍វេជ្ជសាស្ត្រទំនើបៗស្របតាមស្តង់ដាអន្តរជាតិ។

នាយកប្រតិបត្ដិ មន្ទីរពេទ្យខេមា លោកវេជ្ជបណ្ឌិត អ៊ុំ សុភាព បានថ្លែងទៅកាន់អ្នកចូលរួមក្នុងពិធីសម្ពោធដាក់ឲ្យប្រើប្រាស់អគារថ្មីនៅថ្ងៃទី៩ ខែសីហា ឆ្នាំ២០២៤ ថា ខេមា បានក្លាយជាមន្ទីរសម្រាក និងព្យាបាលជំងឺដែលមានស្តង់ដារខ្ពស់ ហើយជាទំនុកចិត្តរបស់អតិថិជនច្រើនឆ្នាំមកហើយ។ ប៉ុន្តែ មន្ទីរពេទ្យនៅតែពង្រីកខ្លួន និងសេវាកម្មថែទាំសុខភាព និងព្យាបាលជំងឺកាន់តែប្រសើរ ដើម្បីឆ្លើយតបទៅនឹងស្ថានភាពជំងឺដែលធ្ងន់ធ្ងរមួយចំនួន ត្រូវបញ្ជូនចេញទៅព្យាបាលនៅក្រៅប្រទេស ងាកមកប្រើសេវាកម្មនៅមន្ទីរពេទ្យអន្ដរជាតិខេមា។

ក្នុងពេលជាមួយគ្នានេះលោកវេជ្ជបណ្ឌិត ក៏បានសង្កត់ធ្ងន់ថា រូបលោកផ្ទាល់ និងបុគ្គលិក ព្រមទាំងដៃគូសុខាភិបាល បានធ្វើ និងបន្ដធ្វើរួមគ្នាឲ្យកាន់តែប្រសើរលើសេវាកម្មមួយចំនួនដែលត្រូវការធ្វើរោគវិនិច្ឆ័យច្បាស់លាស់ ឬការសង្គ្រោះភ្លាមៗប្រកបដោយវិជ្ជាជីវៈខ្ពស់។ ជាក់ស្ដែងដូចជាប្រភេទជំងឺ បេះដូង ដាច់សសៃឈាមខួរក្បាល ដែលត្រូវការសង្គ្រោះភ្លាមៗ មុនគ្រួសារដែលមានលទ្ធភាពច្រើនក្នុងការបញ្ជូនបន្ដទៅព្យាបាលនៅក្រៅប្រទេស ឬត្រូវបន្ដសម្រាកព្យាបាលនៅមន្ទីរពេទ្យអន្ដរជាតិខេមា រហូតដល់បានជាសះស្បើយក៏បាន។

បច្ចុប្បន្ន មន្ទីរពេទ្យអន្តរជាតិខេមា មានគ្រែសម្រាប់ពិនិត្យ ពិគ្រោះ និងសម្រាកព្យាបាលសរុបកើនដល់ចំ៥៤គ្រែ និងមានសេវាកម្មសំខាន់ៗរួមមាន៖ ព្យាបាលរបួស និងសង្គ្រោះបន្ទាន់២៤ម៉ោងរៀងរាល់ថ្ងៃ ឯកទេសជំងឺទូទៅ ជំងឺកុមារ វះកាត់ទូទៅ ជំងឺតម្រងនោម និងលាងឈាម ជំងឺបេះដូង ជំងឺក្រពះ ពោះវៀន និងថ្លើម ជំងឺទឹកនោមផ្អែមនិងជំងឺក្រពេញអ័រម៉ូន ផ្នែកវះកាត់មុខមាត់-ឆ្អឹងថ្គាមនិងបាក់បែកឆ្អឹង និង ឯកទេសជំងឺប្រព័ន្ធប្រសាទ វះកាត់ខួរក្បាលនិងឆ្អឹងខ្នង។

បន្ថែមពីលើនេះ មន្ទីរពេទ្យអន្តរជាតិខេមា បានបំពាក់នូវឧបករណ៏រូបភាពវេជ្ជសាស្ត្រទំនើប CT Scan 128 SLICE សម្រាប់រករោគវិនិច្ឆ័យដើម្បីជាជំនួយដល់គ្រូពេទ្យឯកទេសក្នុងការព្យាបាលជំងឺបានត្រឹមត្រូវ និង ទាន់ពេលវេលា ជាពិសេសអាចថតឆ្លុះដល់ជំងឹសរសៃឈាម បេះដូង និងរកមូលហេតុនៃការស្ទះ ឬដាច់សរសៃឈាមក្នុងខួរក្បាល ។ ដោយសារមានកិច្ចសហប្រតិបត្តិការផ្នែកបច្ចេកទេសពីមន្ទីរពេទ្យបរទេស និង វិនិយោគិនទាំងក្នុង និងក្រៅប្រទេស មន្ទីរពេទ្យអន្តរជាតិខេមា នឹងមានគម្រោងពង្រីកនូវអគារ និងសេវាឯកទេសបន្ថែមទៀតអោយក្លាយជាមន្ទីរពេទ្យដែលអាចមានសមត្ថភាពពេញលេញក្នុងការព្យាបាល និងវះកាត់បេះដូង ខួរក្បាល និង ទារក ដើម្បីឆ្លើយតបទៅនឹងតម្រូវការរបស់ប្រជាពលរដ្ឋទាន់ពេលវេលា ព្រមទាំងកាត់បន្ថយនូវការចំណាយទាំងថវិកា និងពេលវេលាទៅព្យាបាលនៅក្រៅប្រទេស ។

មន្ទីរពេទ្យអន្តរជាតិខេមា សូមថ្លែងអំណរគុណយ៉ាងជ្រាលជ្រៅជាទីបំផុតចំពោះអតិថិជនរបស់ខ្លួនដែលតែងតែជឿជាក់លើការផ្តល់សេវាកម្មពិនិត្យ ព្យាបាល និងថែទាំជូនអតិថិជន ប្រកបដោយក្រមសីលធម៌វិជ្ជាជីវៈខ្ពស់បំផុត និងសូមថ្លែងអំណរគុណយ៉ាងជ្រាលជ្រៅផងដែរដល់ដៃគូរវិនិយោគិន មន្ទីរពេទ្យដែលជា ដៃគួ និងក្រុមហ៊ុនដែលសហការទាំងផ្នែកវេជ្ជសាស្រ្ត និងអមវេជ្ជសាស្ត្រ ដែលតែងតែសហការ និងគាំទ្ររហូតមកទល់ពេលនេះ៕

ជិន សុភ័ក្ដ្រ

ពាក្យទាក់ទង