Ugarte បានមកដល់អង់គ្លេសហើយ

2024-08-29 11:16:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើ Manuel Ugarte កំពុងពិនិត្យសុខភាពដើម្បីត្រៀមចូលរួមជាផ្លូវការជាមួយក្លឹប Manchester United។

យោងតាមការចុះផ្សាយរបស់ Fabrizio Romano កីឡាករ Ugarte កំពុងនៅទីស្នាក់ការក្លឹបដើម្បីធ្វើការពិនិត្យសុខភាព។

ដោយឡែក បើតាមការចុះផ្សាយរបស់សារព័ត៌មាន BBC ទាំងក្លឹបបិសាចក្រហម និងក្លឹប Paris Saint Germain បានឯកភាពគ្នារឿងតម្លៃផ្ទេរហើយ នោះគឺរង្វង់ ៦៥ លានដុល្លារសហរដ្ឋអាមេរិក។ កីឡាករសញ្ជាតិអ៊ុយរ៉ាហ្គាយវ័យ ២៣ ឆ្នាំ នឹងចុះកុងត្រារយៈពេល ៥ ឆ្នាំជាមួយក្លឹប Manchester United។

ក្លឹបបិសាចក្រហមបានចំណាយពេលជាង ២ ខែ ដើម្បីផ្ទេរបានសម្រេចកីឡាករខ្សែបម្រើការពារវ័យក្មេងរូបនេះ។ តាមពិតទៅ Ugarte ចង់មកលេងឲ្យក្លឹប Manchester United តាំងពីពេលទាក់ទងដំបូង តែបញ្ហាតម្លៃផ្ទេរទៅវិញទេជាមួយ PSG ដែលនាំឲ្យមានការអូសបន្លាយពេលវេលាដ៏យូរបែបនេះ។ ពីដំបូង PSG ចង់បានតម្លៃផ្ទេរប្រមាណជាង ៨០ លានដុល្លារសហរដ្ឋអាមេរិក ហើយបិសាចក្រហមចង់ឲ្យចុះថ្លៃជាងនេះ។ ចុងបញ្ចប់ ក្រោយបញ្ចុះតម្លៃមួយចំនួន ក្លឹបទាំងពីរក៏ឯកភាព។

ការនាំចូល Ugarte ធ្វើឡើងស្របពេល ក្លឹប Manchester United បានសម្រេចផ្ទេរចេញ ខ្សែបម្រើវ័យ ២៦ ឆ្នាំ Scott McTominay ឲ្យ Napoli ក្នុងតម្លៃជាង ៣៥ លានដុល្លារសហរដ្ឋអាមេរិក។

Ugarte បានបង្ហាញទម្រង់លេងយ៉ាងល្អឲ្យ PSG។ កាលពីរដូវកាលកន្លងទៅ កីឡាករលេងសរុបឲ្យក្លឹបចំនួន ៣៧ ប្រកួត។ មុនមកលេងឲ្យ PSG កីឡាករមានបទពិសោធន៍លេងចំនួន ២ រដូវកាលឲ្យក្លឹបព័រទុយហ្គាល់ Sporting CP ហើយលេងនៅទីនោះសរុប ៨៥ ប្រកួត។

នារដូវកាលដោះដូរនេះ បិសាចក្រហមហាក់មានភាពសកម្មយ៉ាងខ្លាំង។ ក្លឹបទើបនាំចូលកីឡាករក្មេងៗ និងកំពុងមានទម្រង់លេងល្អមកលេងឲ្យក្លឹប ក្នុងនោះរួមមាន ខ្សែប្រយុទ្ធសញ្ជាតិហុល្លង់វ័យ ២៣ ឆ្នាំ Joshua Zirkzee ខ្សែការពារបារាំងវ័យ ១៨ ឆ្នាំ Leny Yoro ខ្សែការពារហុល្លង់វ័យ ២៥ ឆ្នាំ Matthjis de Ligt និងខ្សែការពារស្លាបម៉ារ៉ុក ២៦ ឆ្នាំ Noussair Mazraoui៕

ប្រភព៖ BBC អត្ថបទ៖ សេរី មង្គល