​ខ្សែ​ការពារ​កណ្ដាល Pau Cubarsi យុវជន​១៧​ឆ្នាំ​របស់ Barcelona ​បាន​និយាយ​ថា ​ខាង​កីឡាករ​ Real Madrid គេ​មិន​ពេញចិត្ត​ចំពោះ​​លទ្ធផល​ ហើយ​គេ​នាំ​គ្នា​មិនទៅ​ចូលរួម​​​កម្មវិធី​ការ​ប្រកាស​លទ្ធផល​អ្នក​ឈ្នះ Ballon D'or កាល​ពី​ពេល​កន្លង​ទៅ​ថ្មី​ៗ​នេះ ខណៈ​ដែល​​​រូប​គេ​​ផ្ទាល់ និង Dani Olmo ទៅ​កាន់​ទី​នោះ​ទាំង​ដែល​គ្មាន​​ឈ្មោះ​ឈ្នះ​ពាន​១​ហ្នឹង​គេ​ផង​​។

កន្លង​មក​មុន​ពេល​ព័ត៌មាន​បែក​ធ្លាយ​ Real Madrid ​​ក៏​មាន​គម្រោង​ទៅ​ចូលរួម​​​កម្មវិធី​ប្រកាស​​ Ballon D'or ដែល​ធ្វើ​ឡើង​នៅ ប៉ារីស ដែរ​ ប៉ុន្តែ​ក្រោយ​ពេល​​​ដែល​បែក​ធ្លាយ​ថា អ្នកដែល​​ឈ្នះ Ballon D'or មិនមែន​ជា Vinicius Jr អធិរាជ​ស​ក៏​បាន​ធ្វើ​ការ​លុប​ចោល​ការ​ហោះហើរ​ទៅ​កាន់​ទី​ក្រុង​ប៉ារីស​ភ្លាម​ៗ​តែ​ម្ដង​។ ខណៈ​ដែល​​ឈ្មោះ​របស់ Vinicius Jr ស្ថិត​នៅ​លេខ​២​ក្រោម​ Rodri របស់​ Manchester City ។

ក្នុង​ការ​​ប្រកាស​មិន​ចូល​រួម​នេះ​​​ ​បាន​បង្កើត​ជា​ប្រធាន​បទ​ថ្មី​មួយ​រហូត​មាន​ការ​សួរ​នាំ​ពី​អ្នក​កាសែត​ទៅ​កាន់​កីឡាករ​​ Pau Cubarsi ដែល​បាន​ទៅ​ចូល​រួ្​ម​ទី​នោះ​ទាំង​គ្មាន​ឈ្មោះ​ឈ្នះ​ពាន​អ្វី​សោះ​។ គេ​បាន​ឆ្លើយ​ថា ​​រូប​គេ​និង Olmo គឺ​គ្មាន​ឈ្មោះ​ឈ្នះ​ពាន​ដូច​គ្នា ប៉ុន្តែ​ចង់​ទៅ​ទីនោះ​​ ព្រោះ​វា​ជា​ពេល​វេលា​ដ៏​សំខាន់​បំផុត​សម្រាប់​កីឡាករ​ផ្សេង​ៗ​ ដែល​គេ​បាន​ឈ្នះ​ពាន​រៀងខ្លួន ​ហើយ​ក៏​ចង់​ចូល​រួម​អបអរ​ទៅ​កាន់​អ្នក​ដែល​បានឈ្នះ​ពាន​ផង​ដែរ​៕