​ខ្សែ​ប្រយុទ្ធ​ស្លាប​របស់​ក្លឹប​អ្នក​មាន​បុណ្យ​ Barcelona, Lamine Yamal ​កំពុង​តែ​មាន​មហិច្ឆតា​ចង់​ក្លាយ​ជា​ម្ចាស់​ពាន​១​​ក្នុង​ចំណោម​ពីរ​នេះ​មុន​រូប​គេ​អាច​ឈាន​​ចូល​ជា​បេក្ខភាព​ឈ្នះ​ពាន​ Ballon d'Or ។ ​នេះ​​​បើ​តាម​ការ​លើក​ឡើង​របស់​ខ្សែ​បម្រើ​វ័យ​១៧​ឆ្នាំ​​ប្រាប់​ទៅ​កាន់​អ្នក​​សារព័ត៌មាន​មួយ​នៅ​ប្រទេស​អេស្ប៉ាញ​។

«​មុន​ពេល​ខ្ញុំ​អាច​ឈ្នះ​ពាន Ballon d'Or ខ្ញុំ​ចង់​ឈ្នះ​ពាន​ Champions League ជាមួយ Barcelona ឬ​ក៏​ឈ្នះ​​ពាន World Cup ជាមួយ​ប្រទេស​អេស្ប៉ាញ​របស់​ខ្ញុំ​ឲ្យ​បាន​១​សិន​»។ នេះ​ជា​សម្ដី​របស់​ Lamine Yamal ប្រាប់​ទៅ​កាន់​កាសែត​ Marca ។

Yamal គឺ​ជា​យុវជន​​ម្នាក់​ដែល​មាន​ភាព​លេចធ្លោ​ខ្លាំង​ក្រោយ​​​ពេល​​រូប​គេ​​បង្ហាញ​សមត្ថភាព​ដ៏​អស្ចារ្យ​ក្នុង​ព្រឹត្តិការណ៍ UERO 2024 ហើយ​បាន​ជួយ​អេស្ប៉ាញ​លើក​ពាន​​ធំ​ប្រាំ​ទ្វីប​​អឺរ៉ុប​មួយ​នេះ​។ មិន​ត្រឹម​ប៉ុណ្ណោះ​ពេល​នេះ​គេ​ជា​កម្លាំង​ស្នូល​មួយ​ដ៏​សំខាន់​របស់ Barcelona ក្នុង​ការ​ជួយ​ក្រុម​ឲ្យ​យក​ឈ្នះ​ទៅ​លើ​ក្រុម​ធំ​ៗ​ជា​ច្រើន​នៅ​អឺរ៉ុប​ដូច​ជា​ការ​យក​ឈ្នះ Real Madrid និង Bayern Munich ជា​​​ដើម​។

គិត​ត្រឹម​ពេល​នេះ​គេ​បាន​ចូល​លេង​ឲ្យ​ក្រុម​ Barcelona ​បាន​ចំនួន​៥៤​ប្រកួត​ហើយ​ និង​រក​បាន​១០​គ្រាប់​​ថែម​ទៀ​ត​ផង​។ ចំណែក​ជា​មួយ​ជម្រើស​ជាតិ​​វិញ​គេ​បាន​ចូល​លេង​បាន​​១៧​ប្រកួត ពោល​ក៏​រក​បា​ន​៣​គ្រាប់​ផង​ដែរ​​៕ ​​​​