ខ្សែភាពយន្តរឿង “ព្រានស្នេហ៍ ឬ Bad Boy” ដែលជាប្រភេទខ្សែភាពយន្តខ្មែរ បែបមនោសញ្ចេតនា ស្នេហាយុវវ័យ និងកំប្លែង ត្រូវបានសម្ពោធដាក់បញ្ចាំងជាផ្លូវការកាលពីថ្ងៃទី១៧ ខែធ្នូ ឆ្នាំ២០២៤ នៅរោងភាពយន្ត Major Cineplex Aeon Mean Chey ក្រោមវត្តមានផលិតករ តារាល្បីៗ និងទស្សនិកជនជាច្រើននាក់។

លោក ជុំ សុភា អ្នកដឹកនាំរឿង បានលើកឡើងថា ខ្សែភាពយន្ដរឿង “ព្រានស្នេហ៍ ឬ Bad Boy” ត្រូវបានផលិតឡើងយ៉ាងយកចិត្ដទុកដាក់ ដោយផ្តល់ជាគំនិតទៅដល់មិត្តយុវវ័យខ្មែរ ឱ្យពួកគេបានយល់អំពីតម្លៃនៃសេចក្តីស្រឡាញ់ និងភាពឆ្លាតវៃក្នុងការបញ្ចេញនូវអារម្មណ៍ស្រឡាញ់របស់ខ្លួន ក៏ដូចជាទទួលនូវសេចក្តីស្រឡាញ់ពីនរណាម្នាក់ និងកុំចាត់ទុកស្នេហាជាល្បែងសម្រាប់លេងសើចចង់ឈ្នះចង់ចាញ់គ្នា។

ខ្សែភាពយន្ដរឿង “ព្រានស្នេហ៍” ត្រូវបាននិពន្ធ និងផលិតឡើងយ៉ាងសម្រិតសម្រាំងបំផុត ដោយផលិតកម្ម AZ Entertainment និងផលិកម្ម Reahu Production។ ភាពយន្តនេះគឺជាប្រភេទរឿងខ្មែរ ផលិតដោយផលិតករជនជាតិខ្មែរ តួសម្តែងសុទ្ធសឹងជាយុវជន និងយុវនារីខ្មែរ ដែលពេញដោយទេពកោសល្យក្នុងការសម្តែងយ៉ាងស័ក្តិសម។

អ្វីដែលកាន់តែពិសេសនោះផលិតករ បាននាំអារម្មណ៍ទស្សនិកជន ឱ្យប្លែកអារម្មណ៍បន្ថែមទៀត គឺបន្ថែមពីលើជីវិតដ៏ស៊ីវីល័យនាពេលរាត្រីរបស់យុវវ័យសម័យថ្មី និងទិដ្ឋភាពនៅក្នុងទីក្រុងភ្នំពេញដ៏ស្រស់ឆើតឆាយហើយនោះ ក៏មានការបញ្ចូលនូវទស្សនីយភាពដ៏ស្រស់ត្រកាល នៃទីរមណីយដ្ឋានបែបធម្មជាតិនៅក្នុងស្រុកមួយកន្លែងទៀត គឺនៅទីក្រុងកោះរ៉ុង នៃខេត្តព្រះសីហនុ។

ខ្សែភាពយន្ដរឿង “ព្រានស្នេហ៍” នឹងមានចាក់បញ្ចាំងនៅគ្រប់រោងភាពយន្ដចាប់ពីថ្ងៃទី១៩ ខែធ្នូ ឆ្នាំ២០២៤ នេះតទៅ។ បើតាមផលិតករ ខ្សែភាពយន្ដនេះនឹងទទួលបានការគាំទ្រច្រើនពីទស្សនិកជន ដោយអ្នកនិពន្ធបានបញ្ចូលគ្រប់រសជាតិជីវិតពិតនៅក្នុងសាច់រឿងនោះតែម្ដង៕