បន្ទាប់ពីចាក់បញ្ចាំងឡើងវិញនូវស្នាដៃរបស់ខ្លួនលើផ្ទាំងសំពត់សម្តងទៀត នៅរាជធានីភ្នំពេញ ក្នុង «ទិវាឈូករ័ត្ន» នៅថ្ងៃទី២១ ខែធ្នូកន្លងទៅ សមាជិក«ក្រុមភាពយន្តឈូករ័ត្ន» ឆ្នាំ២០២៤ បានចុះទស្សនកិច្ចសិក្សា នៅតាម ផលិតកម្មឈានមុខគេ៤កន្លែង។ ហើយក្រុមនេះ ក៏កំពុងបើកឱកាសទទួលសមាជិកឆ្នាំថ្មី២០២៥ខាងមុខនេះ ដែរ។

លោក ស៊ុំ ស៊ីថែន ជាស្ថាបនិករបស់«ក្រុមភាពយន្តឈូករ័ត្ន» បានគូសបញ្ជាក់ថា៖ «ដំណើរទស្សនកិច្ចសិក្សា នេះ ត្រូវបានបញ្ចូលក្នុងកម្មវិធីឆ្នាំនេះ ដោយសារសំណូមពររបស់សមាជិកជំនាន់មុន និងបទពិសោធន៍របស់ខ្ញុំបាទ ផ្ទាល់ ពេលសិក្សាផ្នែកគ្រប់គ្រងការផលិតនៅប្រទេសកូរ៉េ។

លោក​បន្ថែម​ថា "ទស្សនកិច្ច មានគោលបំណងពង្រឹងចំណេះដឹង និងចំណេះធ្វើ របស់សមាជិកគ្រប់រូប តាមរយៈការសង្កេតទិដ្ឋភាព និងសកម្មភាពជាក់ស្តែងរបស់ផលិតកម្ម ឬ ក្រុមហ៊ុនភាពយន្តនានា។ លើសពីនេះ ជំនួបគ្នានេះនឹងអនុញ្ញាត្តឱ្យសមាជិក«ឈូករ័ត្ន» និងតំណាង ផលិតកម្ម ស្វែងយល់ពីតម្រូវការរវាងគ្នា ក្នុងទីផ្សារការងារសោតទស្សន៍"។

កញ្ញា ហេង សុវណ្ជចិន្តា ជាសមាជិកឈូករ័ត្ន ជំនាន់ទី៧ ជំនាញនិពន្ធ បានចាប់អារម្មណ៍ថា៖​ «បន្ទាប់ពីបាន តាមដាន ទស្សនកិច្ច ផលិតកម្ម «សាស្ត្រា» នាងខ្ញុំមានអារម្មណ៍ថា នៅមានកិច្ចការជាច្រើនដែលនាងខ្ញុំត្រូវ បំពេញ ដើម្បីបំពេញការខ្វះខាតផ្នែកបច្ចេកទេស។ ជាក់ស្តែង «សាស្ត្រា» បានរៀបចំសង្វាក់ការងាររបស់ខ្លួន ជាប្រព័ន្ធ ដែលគ្រប់សមាជិកក្រុមការងារ បំពេញតួនាទីរៀងខ្លួន ទៅតាមជំនាញ និងចំណូលចិត្តរបស់ខ្លួន។ ជាពិសេស រាល់ការចេញផ្សាយរឿង មានការត្រួតពិនិត្យគុណភាព ពីអ្នកជំនាញក្នុងក្រុមហ៊ុន ដើម្បីធានា គុណភាពស្តង់ដារ ឱ្យសមនឹងការទស្សនាពេញចិត្តរបស់ទស្សនិកជន។»

លោក ម៉ៅ សម្បត្តិ ជាសមាជិកឈូករ័ត្ន ជំនាន់ទី៧មួយរូបដែរ ជំនាញដឹកនាំរឿង និងជាជ័យលាភីផ្នែកនេះ ពី មហោស្រពភាពយន្តជាតិ ខ្នាតខ្លី ឆ្នាំ២០២៤ បានចាប់អារម្មណ៍ថា៖​ ««កងចក្រ» រៀបចំដំណើរការផលិតមួយ ដោយផ្តោតទៅលើគុណភាព បែបអន្តរជាតិ ហើយទទួលស្គាល់ជាផ្លូវការ ដល់ក្រៅស្រុក។ ហេតុនេះ ខ្ញុំបាទពិត ជាមានទឹកចិត្តផុសផុល នឹងអ្វីដែលក្រុមហ៊ុនវិនិយោគ ជាពិសេស ផ្នែកបច្ចេកទេសសម្លេងចុងក្រោយ គឺ Dolby Atmos។»

សម្រាប់ លោក ស៊ី​ ណាន ប្រធានគ្រប់គ្រងការផលិតរបស់ LD Entertainment បានកត់សម្គាល់ថា៖​ «នេះជាលើកទី១ហើយ ដែលផលិតកម្មយើងខ្ញុំទទួលសិក្ខាកាមរៀបចំវគ្គភាពយន្ត មកអង្កេតសកម្មភាពថត ផ្ទាល់កន្លែងដូច្នេះ។ ក្នុងនាម LD យើងខ្ញុំពិតជាត្រេកអរដែលយុវជនយើង ចាប់អារម្មណ៍ក្នុងការស្វែងយល់ដោយ ផ្ទាល់ពីការផលិតខ្នាតធំ។ យើងខ្ញុំសង្ឃឹមថា ពួកគាត់អាចស្វែងយល់ពីបន្ថែមពីការងារក្នុងវិស័យភាពយន្តបានមួយ កម្រិតទៀត។ ហើយបើពួកគាត់ ចង់ស្វែងយល់បន្ថែម ខាងខ្ញុំក៏ស្វាគមន៍ឱ្យចូលរួម ក្នុងទ្រង់ទ្រាយណាមួយ មិនថា ហាត់ការ ឬចូលធ្វើការជាក់ស្តែង តាមជំនាញតែម្តង។»

គួរបញ្ជាក់ថា នេះការបើកប្រវត្តិសាស្ត្រថ្មី១ រវាង«ឈូករ័ត្ន» និងផលិតកម្មទាំង៤ ដែលបើកទទួលឱ្យមាន ទស្សនកិច្ចសិក្សា និងការដោះដូរបទពិសោធន៍ផ្ទាល់បែបនេះ។ ផលិតកម្មទាំង៤កន្លែងនោះ រួមមាន៖

៣. កងចក្រ ភាពយន្ត

រីឯបេក្ខជនដែលចង់បានអត្ថប្រយោជន៍ដូចគ្នានេះ ហើយចាប់អារម្មណ៍ក្លាយជាសមាជិកជំនាន់ទី៨របស់ឈូករ័ត្ន (ឆ្នាំ២០២៥) អាចគោរពតាម លក្ខខណ្ឌដើម្បីចូលជាសមាជិកងាយៗ ឱ្យតែអ្នកស្រឡាញ់ និងចង់ស្វែងយល់ពី ការផលិតភាពយន្ដ មាន ពេលវេលាគ្រប់គ្រាន់អាចចូលរួមសកម្មភាពជាមួយក្រុម ក្នុងការបណ្ដុះបណ្ដាលជំនាញ ការអនុវត្តន៍ដោយ ផ្ទាល់ជាមួយភាពយន្តខ្លី និងបន្សល់សមិទ្ធផលជាស្នាដៃវិជ្ជមានក្នុងវិស័យភាពយន្តជាមួយគ្នា។ កុំស្ទាក់ស្ទើរ ចុះឈ្មោះចាប់ពីឥឡូវនេះ រហូតដល់៖ ថ្ងៃទី៣១ ខែធ្នូ ឆ្នាំ២០២៤ តាមរយៈតំណនេះ៖ https://forms.gle/Ae2aZjiRRjQN8ibp6 ។

ខុសពីឆ្នាំមុនៗ ឆ្នាំនេះ«ឈូករ័ត្ន» មានការគាំទ្រពីដៃគូក្រៅស្រុកសំខាន់មួយគឺមូលនិធិ Sombat Somphone Memorial Fund (SSMF) និង International Network of Engaged Buddhists (INEB) និងដៃគូក្នុងស្រុករួមមាន៖ ក្រសួងវប្បធម៌ និង វិចិត្រសិល្បៈ, ក្រសួង ព័ត៌មាន, Sabay News, Kiripost, ហាង Camera Hut, សាលាភាពយន្តPSE និង រោងភាពយន្ត Legend Cinema និង Legend Premium Cinema, និង Fable Cinema, ដៃគូសហគមន៍ Factory Phnom Penh ដៃគូផ្គត់ផ្គង់11:11 Coffee និង នំខ្មែរ«នាឡិ៍»។ ភាពជាដៃគូទាំងនេះ សរបញ្ជាក់ពីបំណងរបស់ «ឈូករ័ត្ន» ក្នុង ការភ្ជាប់សម្ព័ន្ធភាពឱ្យ កាន់តែរលូន និងសុខដុម ជាមួយដៃគូនៅក្នុង សហគមន៍ភាពយន្តកម្ពុជាទាំងមូល។

ទោះបីជាយ៉ាងណាក៏ដោយ «ឈូករ័ត្ន»នៅតែបន្តទទួលការចូលរួមជាថវិកាបន្ថែម ដើម្បីសម្រេចសមិទ្ធិផលឆ្នាំថ្មី នេះ ប្រកបដោយភាពរលូនមិនថាតាមរយៈការផលិតភាពយន្ត និងរៀបចំមហោស្រពទេ តាមរយៈ៖​ ABA - SUNFLOWER FILM ORGANIZATION - 000 804 814។

សម្រាប់បច្ចុប្បន្នភាពបន្ថែម សូមចូលមើលតាមប្រព័ន្ធផ្សព្វផ្សាយរបស់យើងខ្ញុំដូចជា៖ ទំព័រហ្វេសប៊ុក៖ https://www.facebook.com/sunflowerfilmalliance

Telegram៖​ https://t.me/sunflowerfilmorg

YouTube៖ https://www.youtube.com/@sunflowerfilmalliance977

អំពី «ក្រុមភាពយន្តឈូករ័ត្ន» ក្រុមភាពយន្តឈូករ័ត្ន ឬ Sunflower Film​ ​Alliance (SFA) គឺជាក្រុមមួយដែលបានបង្កើតឡើង ដោយ អង្គការ ភាពយន្តឈូករ័ត្ន - Sunflower Film Organization (SFO) ។ ក្រុមភាពយន្តឈូករ័ត្ន មាន សមាជិក ចូលរួមដោយ អ្នកស្ម័គ្រចិត្តជាច្រើនរូបទូទាំង ប្រទេសកម្ពុជាដែលពួកគាត់សុទ្ធតែមាន ចំណង់ចំណូលចិត្ត ទៅលើជំនាញ ផលិតភាពយ​ន្ត ដែលមានអាយុ​ចន្លោះពី១៥ឆ្នាំដល់៤០ឆ្នាំ។ អង្គការភាពយន្តឈូករ័ត្នបានចុះឈ្មោះ ជាផ្លូវការ នៅក្រសួងមហាផ្ទៃ ជាអង្គការមិនរកប្រាក់ ចំណញ ចុះថ្ងៃ ទី១៣ ខែមីនា ឆ្នាំ២០១៩ តាមសេចក្តីប្រកាសលេខ ១៣៩៤ ប្រ.ក។

ក្រុមភាពយន្តឈូករ័ត្នក៏បានផលិតគម្រោងខ្លួនឯង និងសហផលិត តាំងពីចុងឆ្នាំ ២០១៧ ដែល រួមមានក ម្មវិធី«កុនខ្ញុំ» សម្រាប់ទូរទស្សន៍ ជាតិ​កម្ពុជា (ទទក) និងភាពយន្តខ្លីៗជាច្រើនទាក់ទងនឹង គ្រួសារ និងសង្គម មិនតិចជាង១០ចំណងជើង ដោយរឿងខ្លះត្រូវបានជ្រើសរើសដោយមហោស្រព ភាពយន្តផ្សេងៗទៀត។

ដោយឡែកក្រុមនេះ ក៏ទទួលបន្ទុករៀបចំ មហោស្រពភាពយន្ត ខ្លីចតុមុខ​ (Chaktomuk Short Film Festival) ជារៀងរាល់ឆ្នាំ ដើម្បីបើកឱកាសឱ្យសមិទ្ធករថ្មីថ្មោងឯទៀតៗ។ តាំងពីឆ្នាំ ២០១៩ ក្រុមនេះក៏ បានរៀបចំ កម្មវិធី«តស់ ថត ឯកសារនៅកម្ពុជា» (Let’s Document Cambodia) ដោយបាន បណ្តុះបណ្តាលយុវជននៅ ភ្នំពេញ និងតាមខេត្តនានាបានមិនតិចជាង ២០០នាក់ទេ។

ក្រុមភាពយន្តឈូករ័ត្ន មានគោលដៅដ៏ចម្បង គឺចង់ឱ្យមាន ការ​យល់ដឹង កាន់តែ ទូលំទូលាយ អំពីការផលិត ភាពយន្ត ដើម្បីកសាងឧស្សាហកម្ម ភាពយន្ត កម្ពុជាឱ្យ រឹងមានដោយ រៀបចំវគ្គ បណ្តុះបណ្តាលខ្លីៗ និង ចាក់បង្ហាញស្នាដៃ តាមប្រព័ន្ធ ផ្សព្វផ្សាយនានា និង រោងភាពយន្ត ឬមហោស្រពនានា ជាមួយ​សម្ព័ន្ធមិត្តតាមបណ្តាខេត្តនៅកម្ពុជា ក៏ដូចជា ដៃគូនៅ ក្រៅស្រុក ដើម្បីនាំស្នាដៃយុវជនខ្មែរ ឱ្យមានការទទួលស្គាល់នៅលើឆាកអន្តរជាតិ៕

អត្ថបទ៖ Chin Sopheak