ពិធីចុះហត្ថលេខាលើកិច្ចសហប្រតិបត្តិការ រវាង វិទ្យាស្ថានមគ្គុទ្ទេសក៍ និងវិទ្យាស្ថានភាសាបរទេស សាខាអូប្ញស្សី នៃសាកលវិទ្យាល័យបញ្ញាសាស្ត្រកម្ពុជា ជាមួយនិង មន្ទីរពហុព្យាបាល អេគីប មេឌី ខល សេនធើ (Ekip Medical Centre) និង ក្រុមហ៊ុន ហ៊ួ អ៊ិចប្រេស ខូអិលធីឌី (Hou Express Co., Ltd)

គោលបំណងនៃកិច្ចសហប្រតិបត្តិការ៖

ផ្តល់អាហារូបករណ៍ប្រចាំឆ្នាំជូនដល់សិស្សក្រីក្រ និងសិស្សមកពីគ្រួសារពលី និងគ្រួសារភាសសឹក ពិធីចុះហត្ថលេខាលើកិច្ចសហប្រតិបត្តិការបានប្រារព្ធឡើងជាផ្លូវការរវាងស្ថាប័ន និងក្រុមហ៊ុនចំនួនបួនខាងក្រោម៖

• វិទ្យាស្ថានមគ្គុទ្ទេសក៍ នៃសាកលវិទ្យាល័យបញ្ញាសាស្ត្រកម្ពុជា

• វិទ្យាស្ថានភាសាបរទេស នៃសាកលវិទ្យាល័យបញ្ញាសាស្ត្រកម្ពុជា សាខាអូប្ញស្សី

• មន្ទីរពហុព្យាបាល អេគីប មេឌី ខល សេនធើ (Ekip Medical Centre)

• ក្រុមហ៊ុន ហ៊ួ អ៊ិចប្រេស ខូអិលធីឌី Hou Express Co., Ltd

គោលបំណងនៃកិច្ចសហការនេះ គឺដើម្បីផ្តល់អាហារូបករណ៍ប្រចាំឆ្នាំជូនសិស្សដែលកំពុងប្រឈមនឹងស្ថានភាពលំបាក ជាពិសេសសិស្សមកពីគ្រួសារក្រីក្រ គ្រួសារពលី និងគ្រួសារភាសសឹក។

ដោយមើលឃើញពីភាពចាំបាច់ និងតម្រូវការ របស់ប្រទេសជាតិកំពុងជួបការលំបាកដែលរងផលប៉ះពាល់ពីសង្គ្រាម ស្ថាប័នទាំងបួនខាងលើបានយល់ឃើញថា ការអប់រំជាកត្តាចម្បងក្នុងការអភិវឌ្ឍន៍សង្គមជាតិវែងឆ្ងាយ។ ប្រសិនបើយើងអាចជួយឲ្យសិស្សានុសិស្ស និងយុវជនបានបន្តការសិក្សា ពួកគេនឹងអាចមានជីវភាពល្អប្រសើរ កាត់បន្ថយភាពក្រីក្រក្នុងសង្គម និងបង្កើតឱកាសថ្មីៗសម្រាប់ជីវិតពួកគេ ជាពិសេសនិងអាចក្លាយជាធនធានពិតប្រាកដដើម្បីជួយគ្រួសារ សហគមន៍ និងប្រទេសជាតិយើងនាពេលខាងមុខ។

ការផ្តល់អាហារូបករណ៍នេះ មិនត្រឹមតែជាជំនួយសម្រាប់ការសិក្សាទេ ប៉ុន្តែបង្ហាញពីទឹកចិត្តសប្បុរសធម៍ កតញ្ញូចំពោះជាតិ និងស្មារតីរួបរួមសាមគ្គី។

កន្លងមកនេះ វិទ្យាស្ថានមគ្គុទ្ទេសក៍ និងវិទ្យាស្ថានភាសាបរទេស បានចូលរួមយ៉ាងសកម្មក្នុងសកម្មភាពសង្គមដោយឧបត្ថម្ភ និងជួយយុវជនជំនាន់ក្រោយ តាមរយៈកម្មវិធីអាហារូបករណ៍ សិក្លាសាលាអប់រំ វគ្គបណ្តុះបណ្តាល និងគម្រោងចុះកិច្ចការសហគមន៍ជាច្រើននាពេលកន្លងមក។

ស្ថាប័នទាំងបួនបានឯកភាពគ្នាយ៉ាងមុតមាំថា នេះជាការចូលរួមតាមជំនាញ និងធនធានដែលខ្លួនមាន ព្រោះក្នុងកាលៈទេសៈនេះ ការចូលរួមជួយជាតិមាតុភូមិពិតជាចាំបាច់ណាស់។

ទន្ទឹមនឹងនេះ ស្ថាប័នទាំងបួនមានការប្ដេជ្ញាចិត្តថា៖

• ធ្វើការជាដៃគូដោយមានភាពស្មោះត្រង់ និងគោរពគ្នាទៅវិញទៅមក;

• រក្សាការទំនាក់ទំនងបើកចំហសម្រាប់ការសម្របសម្រួល និងការរីកចម្រើននៃកិច្ចសហប្រតិបត្តិការ

• ប្រាកដថាកិច្ចសហប្រតិបត្តិការនេះនឹងអាចផ្តល់អត្ថប្រយោជន៍ដល់សិស្ស-និស្សិត សហគមន៍ និងសង្គមជាតិទាំងមូល។

ដូច្នេះ សូមសិស្សានុសិស្សដែលមានជីវភាពលំបាក និងប្អូនៗដែលមកពីគ្រួសារពលី និងភៀសសឹក អាចមកដាក់ពាក្យស្នើរសុំអាហារូបករណ៍នៅវិទ្យាស្ថានភាសាបរទេស នៃសាកលវិទ្យាល័យបញ្ញាសាស្ត្រកម្ពុជា សាខាអូប្ញស្សី ដែលមានការផ្តល់ជូនអាហារូបករណ៍ដោយស្ថាប័នពីរធំៗខាងលើ គឺមន្ទីរពហុព្យាបាល អេគីប មេឌីខល សេនធើ (Ekip Medical Centre) និងក្រុមហ៊ុន ហ៊ួ អ៊ិចប្រេស ខូអិលធីឌី (Hou Express Co., LTD)។ ការផ្តល់ជូននេះនឹងធ្វើទៅតាមកម្រិតជាក់ស្ដែង និងមានតែតាមរយៈ វិទ្យាស្ថានភាសាបរទេស នៃសាកលវិទ្យាល័យបញ្ញាសាស្ត្រកម្ពុជា សាខាអូប្ញស្សី តែមួយគត់។

ទំនាក់ទនងសម្រាប់ព័ត៌មានបន្ថែម៖

០១០ ៨៨៤ ២៣១/០៩៦ ៣១៦ ៧១៧១/០៨៧ ៤៦៥ ៤៤៨/០១៥ ៥៤១ ១៩៧

តេឡេក្រាម៖ puciflorussey