បវរកញ្ញាតំណាងប្រទេសចំនួន៤៥ នឹងបង្ហាញវត្ដមាននៅវិមានឯករាជ្យ ដើម្បីបញ្ជាក់ថាកម្ពុជាស្រឡាញ់សន្ដិភាព

2025-09-15 10:30:06
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្ពុជា នឹងធ្វើជាម្ចាស់ផ្ទះរៀបចំការប្រកួតបវរកញ្ញាឯកសាកលវិទ្យាល័យពិភពលោកលើកទី៣២ (WMU) នៅចុងឆ្នាំ២០២៥នេះ។នៅអំឡុងពេល នៃដំណើរការប្រកួតគណៈកម្មការ នឹងអញ្ជើញបវរកញ្ញាចំនួន៤៥ រូប តំណាងពីបណ្ដាប្រទេសផ្សេងៗគ្នា ឲ្យឈរថតរូបនៅវិមានឯករាជរបស់កម្ពុជា និងបង្ហាញសារផ្សេងៗទៅកាន់ពិភពលោក ចំថ្ងៃបុណ្យឯករាជ្យជាតិកម្ពុជា ថ្ងៃ ៩ វិច្ឆិកា។

ប្រធានគណៈកម្មការរៀបចំការប្រកួតWorld Miss University លោកSeung Min Lee បានថ្លែងនៅក្នុងសន្និសីទសារព័ត៌មានមួយអមដោយម្ចាស់ជយលាភីកម្ពុជាឆ្នាំ២០២៤ កញ្ញា ប៊ី សុវណ្ណផន ម្ចាស់ជយលាភីឆ្នាំ ២០១៦ របស់ណេប៉ាល់ កញ្ញា Nagma Shrestha ម្ចាស់ជយលាភីបេឡារ៉ូស ឆ្នាំ២០១៧ កញ្ញា Karolina Chernoshei ថា កម្មវិធីWorld Miss University ត្រូវបានបង្កើតឡើងតាំងពីឆ្នាំ១៩៨១ ស្របពេលដែលអង្គការសហប្រជាជាតិប្រកាសពីសុខសន្ដិភាពពិភពលោក។

លោក Seung Min Lee បញ្ជាក់ថា តាមរយៈកម្មវិធីប្រកួតដ៏អស្ចារ្យនៅឆ្នាំ២០២៥នេះ រូបលោក និងដៃគូសហការមានបំណងបង្ហាញឲ្យពិភពលោកបានដឹងពីប្រទេសកម្ពុជាដ៏ស្រស់ស្អាតតូចមួយនៅតំបន់អាស៊ីដែលស្រឡាញ់សន្ដិភាព។ កម្មវិធី នឹងជំរុញការយល់ដឹងផ្នែកបរិស្ថាន សេដ្ឋកិច្ច និងសន្ដិភាពពិភពលោក ហើយនៅថ្ងៃទី៩ ខែវិច្ឆិកា ខាងមុខនេះ ជាព្រឹត្ដិការណ៍ដ៏អស្ចារ្យបំផុត។

បង្ហាញចំណាប់អារម្មណ៍នៅចំពោះមុខអ្នកសារព័ត៌មានជាច្រើនស្ថាប័ននៅរសៀលថ្ងៃទី១៥ខែកញ្ញាឆ្នាំ២០២៥ម្ចាស់ជយលាភីបវរកញ្ញាឯកសាកលវិទ្យាល័យកម្ពុជាឆ្នាំ២០២៤សណ្ឋាគារកំាបូឌីយ៉ាណាកញ្ញាប៊ីសុវណ្ណផនថាខ្លួនទទួលបានបទពិសោធន៍ជាច្រើនពីកម្មវិធីជុំវិញវិស័យបវរកញ្ញាហើយក៏មានមោទនភាពខ្លាំងណាស់ដែរដែលកញ្ញាទទួលបានឱកាសផ្សព្វផ្សាយសិល្បៈវប្បធម៌ និងប្រពៃណីផូរផង់របស់ខ្មែរទៅកាន់ពិភពលោកក្នុងនាមកញ្ញាជាម្ចាស់ជយលាភីតំណាងឲ្យប្រទេសកម្ពុជា។

កញ្ញាប៊ីសុវណ្ណផន៖ "ខ្ញុំសូមលើកទឹកចិត្ដដល់ប្អូនៗដែលមានរូបសម្រស់សមត្ថភាពហើយកំពុងសិក្សានៅតាមសាកលវិទ្យាល័យនានាចូលរួមក្នុងកម្មវិធីនេះដើម្បីទទួលបានឱកាសដ៏ពិសេសសម្រាប់ខ្លួនឯងនិងសង្គមជាតិ”។

សូមជម្រាបជូនថាកម្មវិធីប្រកួតបវរកញ្ញាសាកលវិទ្យាល័យពិភពលោកលើកទី៣២នៅកម្ពុជាចាប់ផ្ដើមបើកដំណើរការទទួលពាក្យចាប់ពីថ្ងៃទី១៥ខែកញ្ញានេះរហូតដល់ថ្ងៃឈប់ទទួលពាក្យនៅថ្ងៃទី២០ខែវិច្ឆិកា។ការប្រកួតបឋមនឹងធ្វើនៅថ្ងៃទី២៣ខែវិច្ឆិកាហើយប្រកាសលទ្ធផលបេក្ខជនជាប់ឈ្មោះនៅថ្ងៃទី២៥ខែវិច្ឆិកាឆ្នាំ២០២៥។

ក្រោយពីនោះកម្មវិធីនឹងដំណើរការកម្មវិធីតម្រង់ទិសការបោះឆ្នោតតាមអនឡាញការហ្វឹកហាត់និងស្នាក់នៅជុំគ្នារហូតដល់ថ្ងៃប្រកួតវគ្គផ្ដាច់ព្រ័ត្រនៅថ្ងៃទី២៨ខែធ្នូ ឆ្នាំ២០២៥ខាងមុខ៕