Davies Paints ឬ Pate 310 ជាជើងឯកលីកបាល់បោះល្ងាចនេះ?

2014-12-06 12:31:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតលីកបាល់បោះជ្រើសរើសជើងឯកជាតិប្រចាំឆ្នាំ២០១៤ បានឈានចូលដល់វគ្គផ្ដាច់ព្រ័ត្រហើយ បន្ទាប់ពីបានធ្វើការប្រកួយតប្រជែងក្នុងវគ្គកវិលជុំសន្សំពិន្ទុអស់ជាច្រើនសប្ដាហ៍ និងវគ្គពាក់កណ្ដាលផ្ដាច់ព្រ័ត្ររួចមក។ ក្រុមពីរដែលនឹងត្រូវប្រជែងគ្នាយកជើងឯកប្រចាំឆ្នាំ២០១៤នេះគឺជាការជួបគ្នារវាងក្រុម Davies Paints ដែលនឹងត្រូវតតាំងជាមួយនឹងក្រុម Pate 310 លើទីលានវិមានពហុកីឡដ្ឋានជាតិ នារសៀលថ្ងៃសៅរ៍ ទី០៦ ខែធ្នូ ឆ្នាំ២០១៤នេះ វេលាម៉ោង ២រសៀល។

Davies Paints និង Pate 310 កាលពីប្រកួតវគ្គវិលជុំសន្សំពិន្ទុ

កាលពីប្រកួតនៅវគ្គ៤ក្រុមចុងក្រោយ ក្រុម Pate 310 បានបំបាក់ក្រុម Mekong Tigers ទាំងពីរជើង ដោយក្នុងជើងទី១ ក្រុម Mekong Tigers បានបោះបង់ការប្រកួតនៅនាទីចុងក្រោយ ហើយក្រុមនេះនៅបន្តចាញ់នៅប្រកួតទី២ទៀត។ ស្របពេលជាមួយគ្នានោះក្រុម Davies Paints បានយកឈ្នះលើក្រុម Emperors ទាំងលំបាក បន្ទាប់ពីត្រូវប្រយុទ្ធគ្នាចំនួនបីប្រកួតរួចមក ដោយនៅប្រកួតទី១ Davies Paints ជាអ្នកទទួលបានជ័យជម្នះ ប៉ុន្តែនៅប្រកួតទី២ Emperors បានវាយបកយកឈ្នះវិញ មុនពេលដែល Davies Paints បានវាយបកយកឈ្នះដាច់នៅប្រកួតទី៣។

ដោយឡែក ក្រុម Mekong Tigers និងក្រុម Emperors នៅសល់ឱកាសមួយប៉ុណ្ណោះគឺការប្រជែងយកតំណែងលេខបី ហើយក្រុមដែលចាញ់នឹងត្រូវវិលត្រឡប់ទៅផ្ទះតែម្ដង។ គូនេះនឹងត្រូវប្រជែងគ្នានៅវេលាម៉ោង ៩:៣០ នាទី ព្រឹកថ្ងៃសៅរ៍ ចុងសប្ដាហ៍នេះ នៅវិមានពហុកីឡដ្ឋានជាតិដូចគ្នា៕

អត្ថបទ៖ អៀង សូទ្រី