ព្រាយចូលខ្លួន គ្រូទី១ជួយអត់ឈ្នះ ប៉ះគ្រូទី២មានអី...

2014-12-11 15:49:39
ចំនួនមតិ 0 | ចំនួនចែករំលែក 0

ចន្លោះមិនឃើញ

សួស្ដីបងសប្បាយ! ខ្ញុំឈ្មោះ ថារ៉ា មកពីខេត្តកំពង់ចាម។ តាមរយៈ Sabay ខ្ញុំបានអានរឿងជាច្រើនទាក់ទងនឹងអប្បិយជំនឿ ជាពិសេសគឺបទពិសោធន៍ប្លែកៗដែលទាក់ទងនឹងខ្មោចព្រាយបិសាចជាដើម។ ចំណែកខ្ញុំក៏មានរឿងចង់ចែករំលែកមួយដែរ បើនិយាយថាមិនជឿក៏មិនកើត ព្រោះអីខ្ញុំជួបផ្ទាល់តែម្ដង ហើយកើតលើមីងក្បែរផ្ទះខ្ញុំទៀត។

រូបតំណាង

អ្នកទាំងអស់គ្នា សាកស្រមៃបន្តិចមើលថា ពេលមនុស្សម្នាក់ត្រូវខ្មោចចូល អ្នកនោះមានសភាពបែបណា គឺច្បាស់ជាយំស្រែកជេរគេជេរឯងហើយ។

តាមទម្លាប់ខ្ញុំ ឱ្យតែមានរឿងអីតិច គឺខ្ញុំភ័យញ័រខ្លួន និងឆាប់ស្លុតណាស់។ កាលនោះខ្ញុំរៀននៅថ្នាក់ទី១២ នៅវិទ្យាល័យស្រេងគីម។ ម៉ោងប្រហែល៤ជាង បន្ទាប់មកពីរៀន ខ្ញុំហេវនោះហេវ ហើយក៏បោះកាតាបព្រូស សំដៅឆ្នាំងបាយ។ អីចឹងណ មនុស្សកំពុងឃ្លាន ហូបអីក៏ឆ្ងាញ់ដែរ។ កំពុងតែឆ្ងាញ់ៗផង ស្រាប់តែមីង លី ខាងត្បូងផ្ទះខ្ញុំ ចុកពោះយំស្រែក ជេរគេជេរឯងគ្រប់គ្នា។

ស្រែកយំខ្លាំងរហូតផ្អើលគេឯងដល់ចុងភូមិ ចំណែកកូនៗរបស់គាត់ស្រែកយំហ៊ូ..."អុំជួយម៉ែខ្ញុំផង! បងជួយម៉ែផង!”។ ខ្ញុំឯណេះរត់ឆ្លេឆ្លាសួរ ហើយយាយខ្ញុំថា៖ "យាយ! មីង លី គាត់កើតអី!?” យាយប្រាប់ថា ហ្រហែលខ្មោចចូល! គាត់ថាឱ្យគ្រូឈឹម។ គ្រូឈឹម ជាគ្រូល្បីម្នាក់ប្រចាំភូមិខ្ញុំ។ គាត់ពូកែមើលគេណាស់។

"មិនបាច់ហៅអាណាទេ...អញមិនចាញ់ទេ! អញត្រូវយក មីមួយហ្នឹង" (ខ្មោចនិយាយ)។ អូយ...គ្រាន់ឮចឹង ខ្ញុំភ័យដុកដាក់ ភ្លាម។

ម៉ោរហើយ! គ្រូឈឹមម៉ោរហើយ! មីងៗពូៗ ដែលឈរមើលទាំងភ័យផង ព្រួយផង ស្រែកប្រាប់។ គ្រាន់តែឮថាគ្រូម៉ោរ ខ្មោចនោះ កាន់តែស្រែកជេរខ្លាំងឡើង។ "ចាប់វាឱ្យជាប់!!!" គ្រូបញ្ជា។ បីបួននាក់ចាប់ស្ទើរមិនចង់ឈ្នះ។ គ្រូចាប់ផ្ដើមសូត្រមន្តអាគម បណ្ដេញខ្មោចចេញ... វ៉ៃធូបផងអីផង... យូរដែរ តែធ្វើម៉េចក៏វាអត់ចេញ ហើយគ្រូប្រាប់ថា រាសីគាត់ក្រោមវា គាត់ធ្វើអីវាអត់កើតទេ។

"យីអាខ្មោចនេះ អីក៏ខ្លាំងម៉េស! គ្នាយើងទៅរកអ្នកណាឱ្យជួយកើត?" អុំ អន ស្រែកឡើង។ អ្នកជិតខាងខ្ញុំម្នាក់បន្លឺទាំងភ័យថា អើ! តាដាំ តាដា។ ពូបេ ប្ដីមីង លី បានហៅ អាកៅ មិត្តភ័ក្តិខ្ញុំទៅជាមួយគាត់។ អាកៅក៏ទាញម៉ូតូវឹង ជិះសំដៅទៅផ្ទះគ្រូ ប្រហែល១គីឡូដី។

និយាយពីមនុស្សវិញ ដូចមកមើលល្ខោនចឹង រោមណែន។ ចំណែកអាខ្មោចហ្នឹង ក្បាលរឹងណាស់ អាងតែគេធ្វើអីវាមិនកើត វាបានចិត្តវាស្រែកថា អាណាធ្វើបាបអញ វាយកទាំងអស់ ។ ចំណែកមីង លី នៅដឹងខ្លួន តែសតិអត់សូវល្អទេ គាត់ស្រែកថ្ងូររវើរវាយ អូយ...ឈឺណាស់ ម៉ែអើយជួយផង ចេញពីអញទៅ!។

“អាកញ្ចាស់មកធ្វើអី អញមិនទៅណាទេ ទាល់តែអញបានរូបនេះ ទើបអញទៅ" ។ ខ្មោចស្រែកជេរគ្រូដាំ។ តាដាំមកដល់ល្មម...ឮអីចឹងតាឡើងគ្រែ ចាប់ពោះពោះមីង លី ជាប់អត់ឱ្យរើរួច។ "ង៉ែងម៉ោររកអី? អាណាឱ្យម៉ោរ?” ត្រង់នេះខ្ញុំចាំបានវាជេរតាថា ចេញទៅអាកញ្ចាស់ វាអត់ដឹងទេ... វាអត់ដឹងទេ... អូយ! អូយ!

"បើអត់ដឹងចូលរូបគេធ្វើអី? ប្រាប់ឬមិនប្រាប់? បើមិនប្រាប់ឈឺ ប្រយ័ត្នឈឺជាងហ្នឹងទៀត"។ តាដាំនិយាយបណ្ដើរ សូត្រមន្តអាគមបង្ក្រាបបណ្ដើរ។

"អូយ...អញឈឺ!" ខ្មោចប្រឹងរើចេញពីដៃគ្រូ តែរើមិនរួច។ តាដាំស្រែកវាវិញថា ង៉ែងខ្លាំងហ្អេះ! ង៉ែងខ្លាំងហ្អេះ! អូយ...! "អញឈឺណាស់ ឈប់ធ្វើបាបអញ"។ អើ! បើចង់ឱ្យអញឈប់ ទាល់តែប្រាប់អញថា មកធ្វើបាបរូបគេហ្នឹងធ្វើអី? អ្នកណាឱ្យមក? ឬចង់ស៊ីអីមែន? បើចង់ស៊ីអីប្រាប់គេមក គេរៀបចំឱ្យ ម៉េចចាំបាច់ធ្វើបាបគេធ្វើអី?

ពេលនោះហើយ ទើបខ្ញុំដឹងច្បាស់ថា វាចង់បានអីឱ្យប្រាកដ។ វាថាវាចង់បានរូបហ្នឹង ព្រោះរូបហ្នឹងស្អាត គេឱ្យវាមកយក។ ពេលប្រាប់ហើយ តាដាំនិយាយថា រូបនេះគេមានគ្រួសារហើយ...ឥលូវចេញឬមិនចេញ? ចំណែក មីង លី វិញ យំស្រែកជួយផង! តាជួយផង! ចេញទៅ! តាដាំប្រើប្រេងកូឡាគាត់ផង សូត្រអាគមផង ច្របាច់ពោះវាផង យូរណាស់ទម្រាំ អាខ្មោចក្បាលរឹងនេះចេញ។

មីងខ្ញុំដែលត្រូវខ្មោចចូល មុខឡើងស្លេក។ ពេលគេសួរ មីងខ្ញុំឆ្លើយប្រាប់ថា មានមនុស្សស្រីម្នាក់សក់វែង អង្គុយបែរខ្នង វាអត់គាត់ឃើញមុខទេ វាថាវាចង់បានគាត់។ ចំណែកតាដាំប្រាប់ថា វាមិនមែនខ្មោចទេ គឺព្រាយនៅទិសខាងកើត មានគេឱ្យវាមក។

អូ! ខ្ញុំទើបនឹងឃើញ...និយាយចឹងបងស្រីជីដូនមួយខ្ញុំម្នាក់ ឈ្មោះ ចែឡា ក៏ធ្លាប់ខ្មោចចូលដែរពេលទៅស្ទូងឱ្យគេ។ ពេលនោះប្រហែលគាត់និយាយអីខុសហើយ ព្រោះកន្លែងដែលគាត់ទៅស្ទូងនោះ មានអ្នកតាកាន់។ គាត់និយាយសើច និយាយសើច អស់ពីសើចយំ ទាល់តែយកមកផ្ទះឱ្យតាដាំមើល និងរកនេះរកនោទើបជា។ ចាស់ៗថា គាត់ត្រូវរបស់គេ។

ចុះប្រិយមិត្ត ធ្លាប់ជួបរឿងដូចឬស្រដៀងខ្ញុំអត់?

ស្ត្រីម្នាក់មានដែកគោល២០០០ដើម សង្ស័យថាអាបធ្មប់