ជួយ share! យល់ដឹងពី Online Business, Pyramid Scheme, MLM ចៀសវាងចាញ់បោកគេ

2014-12-15 21:41:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តមួយចំនួនហាក់នៅស្រពិចស្រពិលសង្ស័យមិនយល់ពីគំរូ Online Business ប្រភេទបោកប្រាស់ដែល Sabay បានចុះផ្សាយកាលពីសប្ដាហ៍មុន និងរៀបរាប់ពីល្បិចល្បួងចូលវិនិយោគរហូតដល់ចាញ់បោកគេអស់ពីខ្លួន។ អីចឹង អ្វីជា Online Business, Pyramid Scheme និង Multi-Level Marketing (MLM) ឲ្យប្រាកដ?

១. Online Business

រដ្ឋាភិបាលអូស្ត្រាលីបានកំណត់និយមន័យ Online Business ឬ e-business ថា ជាប្រភេទរាល់សកម្មភាពអាជីវកម្មដែលធ្វើឡើងលើអនឡាញ (អ៊ីនធឺណិត)។ ការធ្វើ Online Business អាចរាប់បញ្ចូលទាំងការទិញ-លក់លើអនឡាញ និងការផ្ដល់សេវាកម្មលើអនឡាញ។

* ប្រភេទនៃ Online Business មានដូចជា៖

វិបសាយ
ហាងអនឡាញ ឬទីផ្សារលើអនឡាញ
ប្លុក (blog)
ការបង្កើតគណនីបណ្ដាញសង្គមឲ្យល្បី ហើយលក់។

២. Pyramid Scheme

គណៈកម្មការមូលប័ត្រអាមេរិក U.S. Securities and Exchange Commission (SEC) បានផ្ដល់និយមន័យ "Pyramid Scheme" ថាជាប្រភេទគំរូអាជីវកម្មគ្មានស្ថិរភាពគង់វង្សបានយូរ ដែលពាក់ព័ន្ធនឹងសកម្មភាពកៀងគោហៅមនុស្សចូលរួមវិនិយោគ (participants) ជាជាងសកម្មភាពលក់ផលិតផល ឬផ្ដល់សេវាកម្មពិតប្រាកដ។ នៅក្នុងគំរូ Pyramid Scheme អ្នកចូលរួមព្យាយាមរកចំណូលច្រើន ដោយហៅមនុស្សថ្មីៗចូលរួមក្នុងគម្រោងប្រភេទនេះ ជាមួយនឹងការសន្យាផ្ដល់នូវចំណូល (Passive Income) យ៉ាងច្រើនសន្ធឹកមកវិញ (ជាង ២០០%នៃប្រាក់ដើម) ក្នុងរយៈពេលខ្លី ដោយមិនចាំបាច់ធ្វើអ្វី ឬគ្រាន់តែផ្សាយពាណិជ្ជកម្ម (post ads)។

អ្នកបោកប្រាស់នៅពីក្រោយ Pyramid Scheme នេះ ព្យាយាមក្លែងបន្លំខ្លួនឲ្យដូចនឹងគំរូបណ្ដាញទីផ្សារ Multi-Level Marketing។ ទោះបីក្រុមនេះអះអាងថាមានផលិតផល ឬសេវាកម្មលក់ក៏ដោយ ក៏ក្រុមនេះប្រើប្រាស់លុយដែលបានមកពីអ្នកវិនិយោគថ្មីៗចុងក្រោយមកទូទាត់ឲ្យអ្នកវិនិយោគមុនៗ។ ទីបញ្ចប់ ពីរ៉ាមីតនឹងរលំ ខណៈដែលគេមិនអាចប្រមូលលុយគ្រប់គ្រាន់ពីអ្នកវិនិយោគថ្មីៗមកទូទាត់ឲ្យអ្នកវិនិយោគមុនៗ។ មនុស្សជាច្រើននឹងបាត់បង់ប្រាក់យ៉ាងសន្ធឹក។

គំរូអាជីវកម្មខុសច្បាប់ប្រភេទនេះ កើតមានយ៉ាងហោចណាស់ ១០០ ឆ្នាំមកហើយ។ នេះបើយោងតាម Wikipedia។

អានអត្ថបទ៖ ៣កលល្បិច អ្នកអាចអស់រលីងសល់តែគូទខោពី Online Business ប្រភេទបោក

៣. បណ្ដាញទីផ្សារ Multi-Level Marketing (MLM)

Multi-Level Marketing (MLM) ឬ Pyramid Selling ឬ Network Marketing ឬ Referral Marketing គឺជាយុទ្ធសាស្ត្រទីផ្សារដើម្បីជំរុញកម្លាំងលក់ផលិតផល ខណៈដែលអ្នកលក់មិនត្រឹមតែទទួលបានកម្រៃជើងសាពីការលក់ដោយផ្ទាល់ខ្លួនឯងប៉ុណ្ណោះទេ គឺថែមទាំងទទួលបានកម្រៃជើងសាពីការលក់របស់អ្នកលក់ផ្សេងៗទៀត (downline) ដែលគេបានហៅចូលរួមទៀតផង។ ការទូទាត់កម្រៃជើងសាបែបតៗគ្នាជាច្រើនថ្នាក់កម្រិតបែបនេះ ត្រូវគេហៅថា "multiple levels of compensation"។

ក្រុមហ៊ុនផលិតផលជាច្រើន បានក្លាយជាក្រុមហ៊ុនបណ្ដាញទីផ្សារផលិតផល (Networking Products Companies) ដោយប្រើយុទ្ធសាស្ត្រ MLM មកផ្សព្វផ្សាយ និងជំរុញការលក់ផលិតផលខ្លួន ជាជាងការចំណាយលើការផ្សាយពាណិជ្ជកម្មតាមទូរទស្សន៍ ទស្សនាវដ្ដី វិទ្យុ កាសែត-ល-។

យោងតាមគណៈកម្មការពាណិជ្ជកម្មសហព័ន្ធអាមេរិក (U.S. FTC) បានឲ្យដឹងថា ក្រុមហ៊ុនបណ្ដាញផលិតផលមួយចំនួនកំពុងប្រើប្រាស់យុទ្ធសាស្ត្រ MLM នេះជាខែលទៅបោកសមាជិកបណ្ដាញទីផ្សាររបស់ខ្លួន ខណៈដែលក្រុមហ៊ុនទាំងនោះការពិតកំពុងធ្វើ Pyramid Scheme ខុសច្បាប់សោះ។ ហេតុនេះហើយទើបក្រុមហ៊ុនធ្វើ MLM ជាច្រើន ត្រូវគេចាត់ទុកថាជា Pyramid Scheme បោកប្រាស់។

អានអត្ថបទ៖ Online Business ប្រភេទបោក នៅតែបន្តសម្លាប់ខ្មែរ!

តើក្រុមហ៊ុនផលិតផលធ្វើ MLM សុទ្ធតែបោកប្រាស់ដែរឬទេ? ធ្វើម៉េចទើបដឹងថា ក្រុមហ៊ុនទាំងនោះបោក ឬមិនបោក?

ក្រុមហ៊ុនធ្វើ MLM មានត្រឹមត្រូវ និងបោកប្រាស់ ដូចដែល FTC របស់អាមេរិកបានរាយការណ៍អីចឹង។ ប៉ុន្តែ ក្រុមហ៊ុនគំរូ Pyramid Scheme ខ្លះឆ្លៀតឱកាសក្លែងជា MLM តែការពិតបោកប្រាស់សោះ។

* ផ្អែកតាម SEC របស់អាមេរិក ទាំងនេះជាលក្ខណៈសម្គាល់ខ្លះពីក្រុមហ៊ុនគំរូ Pyramid Scheme បន្លំខ្លួនជា MLM៖

- គ្មានផលិតផល ឬសេវាកម្មច្បាស់លាស់

តម្លៃផលិតផលខ្ពស់កប់ពពកពេក តែគ្មានគុណភាព

- ផ្ដល់កម្រៃភាគលាភយ៉ាងច្រើនក្នុងរយៈពេលខ្លី

ទទួលប្រាក់យ៉ាងងាយស្រួល Easy money ឬ Passive income ដោយធ្វើការងារបន្តិចបន្តួច ដូចជាផ្សាយពាណិជ្ជកម្ម
គ្មានអាជ្ញាប័ណ្ណ និងលិខិតបញ្ជាក់ផលិតផលស្របច្បាប់ត្រឹមត្រូវ
គ្មានមូលដ្ឋានច្បាស់លាស់
គ្មានរបាយការណ៍ហិរញ្ញវត្ថុចេញដោយក្រុមហ៊ុនសវនកម្មស្របច្បាប់ អំពីការលក់
រចនាសម្ព័ន្ធនៃការផ្ដល់កម្រៃជើងសាសាំញ៉ាំច្រើន

- ផ្ដោតលើការហៅអូសទាញមនុស្សចូលរួមច្រើនជាងការលក់។

បញ្ជាក់៖ កន្លងមក Sabay ចុះផ្សាយប្រើពាក្យ "Online Business ប្រភេទបោក" ក្នុងចំណងជើង គឺសំដៅលើក្រុមហ៊ុនគំរូ Pyramid Scheme តែប្រើ MLM ជាខែលមកបិទបាំង និងបោកប្រាស់៕

ប្រភព៖ business.gov.au, sec.gov/answers/pyramid, sec.gov/investor/alerts/ia_pyramid