តារាស្រីល្បីនៅថៃ ត្រៀមមកកម្ពុជា

2014-12-18 17:43:59
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង តារាភាពយន្ត និង តារាបង្ហាញម៉ូដ ដែលនៅប្រទេសថៃចាត់ទុកជាតារាកំពូលប្រចាំឆ្នាំ ២០១៤ កញ្ញា ខ្វាន់ ឧស្សាហ៍ម៉ានី (Kwan Usamanee Vaithayanon) ត្រៀមមកប្រទេសកម្ពុជា ដើម្បីកសាងទំនាក់ទំនងជាមួយ Fans នៅខ្មែរ និង ទៅទស្សនៈកិច្ចនៅមណ្ឌលកុមារកំព្រាសំរោង។ នេះបើតាមការលើកឡើងរបស់ លោក ប៊ុត ជំនិត អ្នកនាំពាក្យរបស់ ខ្វាន់ ឧស្សាហ៍ម៉ានី ប្រចាំនៅកម្ពុជា។

លោក ប៊ុត ជំនិត បាននិយាយប្រាប់ Sabay ថា ឧស្សាហ៍ម៉ានី គឺជា កំពូលតារាប្រចាំឆ្នាំ ២០១៤ នៅថៃ។ នាងនឹងមកប្រទេសកម្ពុជាពីរថ្ងៃ គិតចាប់ពីថ្ងៃទី ២០-២១ ខែធ្នូ ខាងមុខនេះ។ "គាត់នឹងមកដល់ប្រទេសកម្ពុជាថ្ងៃដំបូងភ្លាម នាងនិងទៅទស្សនកិច្ចនៅមណ្ឌលកុមារកំព្រាសំរោង ហើយនៅយប់ថ្ងៃទី ២០ គាត់ និង ទៅក្លិបកម្សាន្ត RCA ដែលមានទីតាំងនៅទល់មុខស្ថានីយទូរទស្សន៍អប្សរា រាជធានីភ្នំពេញ"។

មណ្ឌលកុមារកំព្រាសំរោង មានទីតាំងនៅភូមិសំរោង សង្កាត់ឃ្មួញ ខណ្ឌសែនសុខ រាជធានីភ្នំពេញ គឺជា កន្លែងមួយផ្ដល់ចំណេះដឹង និង ចំណេះធ្វើដល់ក្មេងកំព្រាជាច្រើន។ នៅក្នុងមណ្ឌលនេះ ក្រៅពីផ្ដល់ជំនាញផ្នែកភាសាខ្មែរ ភាសាអង់គ្លេស កុំព្យូទ័រ នៅទីនេះក៏មានផ្ដល់ជំនាញកសិកម្ម ដោយមិនប្រើប្រាស់ជាតិគីមី ដល់កុមារដែលគេចិញ្ចឹមផងដែរ។ "ឧស្សាហ៍ម៉ានី គាត់ទៅទីនោះដើម្បីយកអំណោយមួយចំនួនទៅចែកជូនដល់ក្មេង និង សំណេះសំណាលជាមួយក្មេង គាត់ប្រាប់ខ្ញុំអញ្ចឹង"។ នេះជាការលើកឡើងរបស់ ប៊ុត ជំនិត។

លោក ប៊ុត ជំនិត បានបញ្ជាក់ទៀតថា ក្រៅពីការងារមនុស្សធម៌ និង ការជួបជុំក្មេងៗ នៅមណ្ឌលកុមារកំព្រាសំរោង តារាស្រីល្បី នៅថៃ កញ្ញា ឧស្សាហ៍មុនី ក៏ត្រៀមទៅចូលរួមកម្មវិធីជប់លៀងមួយនៅក្លិប RCA ដើម្បីបង្កើតទំនាក់ទំនងរវាង Fans មួយចំនួនដែលតែងតែគាំទ្រនៅតាមគណនី Facebook របស់នាង។

ដូច្នេះ លោក ប៊ុត ជំនិត បាននិយាយថា ប្រសិនបើប្រិយមិត្តចង់ជួបកញ្ញា ឧស្សាហ៍ម៉ានី អាចទៅចូលរួមនៅក្លិបកម្សាន្ត RCA នារាត្រីថ្ងៃសៅរិ៍ ទី ២០ ខែធ្នូ ខាងមុខនេះ៕