ពេជ្រ សេរីរត្ន័ ចូលរៀនមហាវិទ្យាល័យឡើងវិញត្រៀមកាន់កម្មវិធីខ្នាតធំ

2015-01-05 12:30:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិធីការិនី ពេជ្រ សេរីរត្ន័ បានឲ្យ Sabay ដឹងថា នាងទើបតែសម្រេចចិត្តចូលរៀនមហាវិទ្យាល័យជាថ្មីឡើងវិញ ដើម្បីបំពេញចំណេះដឹងបន្ថែមទៀតត្រៀមកាន់កម្មវិធីខ្នាតធំ ។

ពេជ្រ សេរីរត្ន័ ប្រាប់ថា នឹងចូលរៀនជំនាញគ្រប់គ្រង ដោយបច្ចុប្បន្ននាងបានជ្រើសរើសម៉ោងរៀននៅពេលយប់នៅ សាកលវិទ្យាល័យន័រតុន។ កាលមុន ពេជ្រ សេរីរត្ន័ធ្លាប់បានចូលរៀននៅសាកលវិទ្យាល័យមួយជំនាញអក្សរសាស្ត្រភាសាអង់គ្លេស ដល់ឆ្នាំទី២ ហើយ ត្រូវបោះបង់ចោល ក្រោមហេតុផងការងារសិល្បៈច្រើនពេក។ អតីតសង្សាររបស់លោក គង់ វិសាល ម្នាក់នេះបានបញ្ជក់ថា មូលហេតុដែលនាំឲ្យនាងសម្រេចចិត្តចូលរៀនឡើងវិញក៏ ព្រោះតែនាងចង់ពង្រីកចំណេះដឹងបន្ថែម ត្បិតការងារមានរាល់ថ្ងៃ គឺទាមទារសមត្ថភាពខ្ពស់ ហើយម្យ៉ាងទៀតទៅថ្ងៃអនាគត មិនអាចធ្វើជាអ្នកសិល្បៈរហូតឡើយ។ នាងចង់បើកមុខរបររកស៊ីវិញ ដូចនេះប្រសិនបើចេះជំនាញ គ្រប់គ្រងនឹងជួយនាងបានច្រើន។ បងស្រីកញ្ញាជីជី បានឲ្យដឹងបន្ថែមទៀតថា បច្ចុប្បន្ននាងខំប្រឹងឆ្លៀតទៅរៀនខ្លាំងណាស់ មិនហ៊ានអវត្តមានឡើយ ព្រោះការសម្រេចចិត្តរៀនឡើងវិញនេះ គឺនាងបានប្ដេជ្ញាហើយថា ត្រូវតែរៀនឲ្យចប់ចុងចប់ដើម យកសញ្ញាប័ត្រឲ្យបាន មិនបោះបង់ចោលជាលើកទី២ដាច់ខាត។

ដោយសារតែ ពេជ្រ សេរីរត្ន័ មានបទពិសោធន៍ការងារប្រចាំថ្ងៃស្រាប់ បើទោះបីជាវ័យច្រើនបន្តិចក្ដី ការរៀនរបស់នាងមិនមានចោទជាបញ្ហាឡើយ។ ពិធីការិនីម្នាក់នេះបានលើកឡើងថា អត់ពិបាកទេ ទ្រឹស្ដីក្នុងមេរៀនក៏ដូចជាសាស្ត្រាចារ្យបានបង្ហាញងាយចាប់បានច្រើន ព្រោះដូចនឹងការងារដែលនាងធ្លាប់អនុវត្តន៍កន្លងមកក៏ដូចជាបច្ចុប្បន្ន។

ពេជ្រ សេរីរត្ន័ បានបោះចោលអាជីពជាពិធីការិនីជាង២ឆ្នាំមកហើយ បន្ទាប់ពីបានចែកផ្លូវជាមួយ លោក គង់ វិសាល អ្នកចាត់ការទូទៅកម្មវិធីតន្ត្រីយុវវ័យ របស់ ស្ថានីយទូរទស្សន៍បាយ័ន។ អតីតថៅកែហាងស្ប៉ា ម្នាក់នេះទើបតែមកបោះជំហានចូលធ្វើជាពិធីការិនីនៅ CTN និង MyTV កាលពីខែតុលា ឆ្នាំ ២០១៤ កន្លងទៅនេះ។ បច្ចុប្បន្នកំពុងតែកាន់កម្មវិធី២ធំ ក្នុងនោះមាន "វិបត្តិខ្ញុំ" នៅ MyTV និង "តុបំភ្លឺ" នៅ CTN ។ តារាស្រី ដដែលបង្ហើបប្រាប់ថា ការត្រឡប់មកសិក្សាសាជាថ្មីនេះ ក៏ជាសញ្ញាណមួយរបស់នាង ត្រៀមចំណេះដើម្បីទៅកាន់កម្មវិធីខ្នាតអន្តរជាតិថ្មីមួយទៀតក្នុងពេលឆាប់ៗខាងមុខនេះ ប៉ុន្តែនាងសូមលាក់សិន៕