Fann Wongបង្ហាញរាងសិចស៊ីជាថ្មី ក្រោយសម្រកទម្ងន់១៦គីឡូក្រាម

2015-01-08 22:38:04
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងសិង្ហបុរី Fann Wong បានបង្ហាញរូបរាងសិចស៊ីរបស់ខ្លួនជាថ្មី ក្នុងកម្មវិធីសន្និសីទកាសែតរបស់ក្រុមហ៊ុនផលិតផលសម្រករាង Marie France Bodyline កាលពីថ្ងៃទី៧ ខែមករា ម្សិលមិញនេះ បន្ទាប់ពីសម្រកទម្ងន់បាន ១៦គីឡូក្រាម ក្រោយសម្រាលកូនប្រុសទីមួយ។

តារាស្រីវ័យ ៤៣ឆ្នាំ និងជាភរិយារបស់តារាសម្ដែង Christopher Lee សម្រាលបានកូនប្រុស Zed កាលពីថ្ងៃទី៩ ខែសីហា ឆ្នាំមុន ដែលក្រោយមកនាងបានសាកល្បងកម្មវិធីសម្រកទម្ងន់ចំនួន ១៤សប្ដាហ៍ របស់ក្រុមហ៊ុន Marie France Bodyline ហើយក៏បានស្រកទម្ងន់ចំនួន ១៦គីឡូក្រាមបន្ទាប់ពីកម្មវិធីនេះ។ ឥលូវនេះ នាងមានទម្ងន់តែ ៥៣គីឡូក្រាមប៉ុណ្ណោះ។

Fann Wong និយាយថា នាងកាន់តែមានជំនឿចិត្តបន្ទាប់ពីមានរូបរាងដូចកាលពីមុន និងបង្ហើបថានាងមិនប្រកែកឡើយបើមានគេទាក់ទងឲ្យថតឈុតប៊ីគីនី។

តារាសម្ដែង Christopher Lee ជាស្វាមី ដែលបានបង្ហាញវត្តមានក្នុងកម្មវិធីនោះដែរ បាននិយាយបែបលេងសើចថា ពួកគេគួរតែគិតគូរយកកូនទីពីរហើយ ព្រោះឥលូវនេះ Fann មានរាងធម្មតាវិញហើយ។

នៅពេលខាងមុខ តារាសម្ដែង Fann Wong មានគម្រោងទៅថតរឿងថ្មីនៅប្រទេសចិន។ បើទោះជាមានការពិបាកក្នុងការឃ្លាតពីកូនប្រុសអាយុ ៥ខែ និងស្វាមីយ៉ាងណា ប៉ុន្តែនាងត្រូវតែជម្នះរឿងនេះឲ្យបាន។

Fann Wong និង Christopher Lee បានរៀបអាពាហ៍ពិពាហ៍ជាមួយគ្នាកាលពីថ្ងៃទី១៦ ខែឧសភា ឆ្នាំ២០០៩ បន្ទាប់ពីសាងចំណងស្នេហ៍ជាមួយគ្នាអស់រយៈពេល ៨ឆ្នាំ។ ពួកគេធ្លាប់សម្ដែងជាដៃគូស្នេហាចំនួន ៦រឿង រួមទាំងរឿង "Return of the Condor Heroes” ជាតួឯក យ៉ាងគួ និងសៀវឡុងនី៕