គួច សុកុម្ភៈ និង ឃឹម បូរី ចុះកិច្ចសន្យា ២ ឆ្នាំនៅ ណាហ្គាវើល

2015-01-16 18:59:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយព័ត៌មានចាកចេញពីក្លិបបាល់ទាត់ភ្នំពេញក្រោន របស់កីឡាករ គួច សុកុម្ភៈ និង ឃឹម បូរី កាលពីម្សិលមិញ ឥឡូវនេះក្លិបណាហ្គាខប បានសម្រេចចុះកិច្ចសន្យា ២ ឆ្នាំជាមួយកីឡាករទាំង ២ ដើម្បីត្រៀមប្រកួតរដូវកាលថ្មីឆ្នាំ ឆ្នាំ ២០១៥។

កីឡាករ ឃឹម បូរី (ឆ្វេង) លោក ឡាំ ទីនី (កណ្ដាល) កីឡាករ គួច សុកុម្កៈ

លោក ឡាំ ទីនី អ្នកចាត់ការទូទៅក្រុមណាហ្គាវើល បានប្រាប់ Sabay មុននេះបន្តិចថា កីឡាករទាំង២ នាក់ចុះហត្ថលេខាធ្វើជាកម្លាំងស្នូលបន្ថែមនៅក្រុមលោកចំនួន ២ ឆ្នាំ ប៉ុន្ដែលោកសោកស្ដាយដែលពួកគេមិនអាចបង្ហាញខ្លួនក្នុងពានរង្វាន់ Hun Sen Cup 2015 បានព្រោះការដោះដូរនេះហួសថ្ងៃកំណត់បើកឱ្យចុះឈ្មោះរបស់សហព័ន្ធកីឡាបាល់ទាត់កម្ពុជា។ ថ្នាក់ដឹកនាំរូបនេះសុំមិនបង្ហើបពីតម្លៃខ្លួននៃការដោះដូររបស់កីឡាករទាំង ២ នោះទេ ព្រោះមានការស្នើសុំពីភាគីពាក់ព័ន្ធ។

កីឡាករ គួច សុកុម្ភៈ ធ្លាប់ជាអតីតកីឡាករជម្រើសខេត្តកំពង់ធំ មុនចេញមកប្រកបអាជីពនៅរាជធានីភ្នំពេញ ជាមួយក្លិបខេមរាកីឡា មុនចាកចេញទៅក្លិបភ្នំពេញក្រោន និងចុងក្រោយមកចូលរួមជាមួយក្រុមណាហ្គាវើល នៅឆ្នាំនេះ។ ចំណែក ឃឹម បូរី ធ្លាប់ជាសមាជិកក្លិបក្រសួងការពារជាតិ ហើយចេញទៅលេងនៅលីកកំពូលថៃ Sisaket FC និង ត្រឡប់មកលេងនៅភ្នំពេញក្រោន វិញ មុនមកដល់ណាហ្គាវើល៕

អត្ថបទ៖ ម៉ឺន រស្មី រូបថត៖ Nagaworld