តើកីឡាមួយប្រភេទចូលជាវិញ្ញាសា ស៊ីហ្គេម ២០២៣ ដោយរបៀបណា?

2015-01-23 15:53:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសមួយដែលទទួលរៀបចំធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមគឺធ្វើយ៉ាងណាឲ្យប្រជាពលរដ្ឋរបស់ខ្លួនសប្បាយចិត្តនឹងលទ្ធផលនៃការឈ្នះមេដាយតាមលទ្ធផលដែលអាចធ្វើទៅបាន ហើយកត្តានេះអាស្រ័យលើប្រភេទកីឡាដែលម្ចាស់ផ្ទះដាក់បញ្ចូលជាវិញ្ញាសាដើម្បីងាយស្រួលឈ្នះមេដាយ។ នេះជាការលើកឡើងរបស់ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាក្នុងសន្និសីទសារព័ត៌មានកាលពីម្សិលមិញស្តីពីជយលាភីជើងឯករបស់ក្រុមកីឡាអេឡិចត្រូនិកកម្ពុជាពីព្រឹត្តិការណ៍ E-Sports អន្តរជាតិ MATIC 2015 នៅប្រទេសចិន។ បន្ទាប់ពីថ្លែងអបអរសាទរនឹងជយលាភីជើងឯករបស់ក្រុមកីឡា E-Sports កម្ពុជា ឯកឧត្តម វ៉ាត់ ចំរើន បានជំរុញឲ្យក្រុមកីឡា E-Sports កម្ពុជាខិតខំព្យាយាមបន្ថែមទៀតដើម្បីឲ្យទាន់សម័យកាលបច្ចេកវិទ្យាទំនើប និងត្រូវរក្សាភាពខ្លាំងរបស់ខ្លួនសម្រាប់ការប្រកួតលក្ខណៈអន្តរជាតិបន្តទៀត។ ឯកឧត្តមមានប្រសាសន៍ថា ៖«ប្រសិនបើក្រុមកីឡា E-Sports យើងនៅតែរក្សាភាពខ្លាំងរហូត អីចឹង NOCC នឹងដាក់ចូលជាវិញ្ញាសាកីឡាស៊ីហ្គេមឆ្នាំ២០២៣ ដែលកម្ពុជាយើងទទួលរៀបចំធ្វើជាម្ចាស់»។

អាន៖ ជី សិលា៖ ជ័យជម្នះរបស់ Secret ធ្វើឲ្យបរទេសស្គាល់កាន់តែច្បាស់ពីសាមគ្គីភាពរបស់កម្ពុជា

ឯកឧត្ដម វ៉ាត់ ចំរើនពន្យល់ថា ៖ «ក្នុងនាមជាម្ចាស់ផ្ទះរៀបចំការប្រកួត Sea Game គឺយើងត្រូវធ្វើឲ្យប្រជាជនសប្បាយរីករាយតាមរយៈការទទួលមេដាយមាសឲ្យបានច្រើន ដូច្នេះប្រភេទកីឡាមានសក្តានុពល យើងនឹងដាក់ចូលជាវិញ្ញាសាស៊ីហ្គេមឆ្នាំ២០២៣។ យើងមានបុព្វសិទ្ធិក្នុងដាក់វិញ្ញាសាបញ្ចូល ព្រោះយើងជាម្ចាស់ផ្ទះ ដូច្នេះគ្រប់ប្រភេទកីឡាទាំងអស់ មានទាំងកីឡា E-Sports ក៏ដាក់បញ្ចូលជាវិញ្ញាសា Sea Gameដើម្បីឲ្យងាយឈ្នះមេដាយ ហើយប្រជាជនយើងសប្បាយចិត្ត»។

ពាក់ព័ន្ធនឹងករណីដាក់ប្រភេទកីឡាជាវិញ្ញាសាស៊ីហ្គេមនេះ មានសំនួរលើកឡើងថា តើមានវិធីសាស្ត្រយ៉ាងម៉េចដើម្បីដាក់បញ្ចូលកីឡា E-Sports ក៏ដូចជាកីឡាផ្សេងៗទៀតជាវិញ្ញាសាកីឡាស៊ីហ្គេម? ឯកឧត្ដមបានបកស្រាយថា លទ្ធផលប្រកួតនានានៅលើឆាកអន្តរជាតិ មិនថាកីឡា E-Sports ទេគឺគ្រប់ប្រភេទកីឡាទាំងអស់ ប្រសិនបើបង្ហាញនូវភាពខ្លាំង និងឈានដល់វគ្គផ្តាច់ព្រ័ត្ររហូត «យើងនឹងដាក់បញ្ចូលជាវិញ្ញាសាកីឡាស៊ីហ្គេម ពីព្រោះឲ្យតែឈានដល់វគ្គផ្តាច់ព្រ័ត្រគឺទទួលបានមេដាយហើយដូចជាមាស ប្រាក់ និងសំរឹទ្ធ»។

ទោះបីជាយ៉ាងណា ឯកឧត្តមបញ្ជាក់ថា កីឡាតែងមានឈ្នះមានចាញ់ ប៉ុន្តែអ្វីដែលសំខាន់នោះគឺថា ការរក្សាទម្រង់ប្រកួត និងស្មារតីប្រយុទ្ធឲ្យបានខ្លាំងរហូត។ ឯកឧត្ដមថា ៖ «ទោះជាយើងមិនអាចរក្សាតំណែងជើងឯកនេះបាននៅឆ្នាំក្រោយៗ តែព្យាយាមធ្វើយ៉ាងណារក្សាទម្រង់ប្រកួតឲ្យបានល្អ គឺចាញ់ទាំងយើងខ្លាំងអាចថាចាញ់មកពីសំណាងមិនដល់ក៏បាន ព្រោះសំណាងក៏ជាផ្នែកមួយនៃជ័យជម្នះផងដែរ»។

អាន៖ វ៉ាត់ ចំរើន៖ ឯកឧត្តមប្រធាន NOCC សាទរជយលាភីជើងឯក MATIC របស់ក្រុមកម្ពុជា

ឯកឧត្ដមអគ្គលេខាធិការក៏បានជំរុញ និងលើកទឹកចិត្តដល់សហព័ន្ធ រួមទាំងកីឡាករឲ្យខិតខំប្រឹងប្រែងបន្តទៀត ដើម្បីអភិវឌ្ឍវិស័យកីឡា E-Sports កម្ពុជាឲ្យកាន់តែល្បី និងមានភាពរីកចម្រើនផងដែរដោយបានលើកឡើងថា ៖ «សូមឲ្យកីឡាករត្រូវខិតខំប្រឹងប្រែងស្វែងរកអ្វីដែលថ្មីបន្ថែម ទៀតស្របតាមបច្ចេកវិទ្យាទំនើប។ សម័យនេះអ្វីក៏ដោយ គេលែងដើរហើយ គេរត់ បើយើងដើរគឺយើងក្រោយគេហើយ អីចឹងយើងត្រូវរត់ដែរ ជាពិសេស E-Sports ដែលជាកីឡាថ្មីតាមរយៈបច្ចេកវិទ្យាជឿនលឿន យើងត្រូវUpdateដែលធ្វើយ៉ាងណាឲ្យទាន់សម័យកាល និងរក្សាភាពខ្លាំងរបស់ខ្លួនជានិច្ច»។

កាលពីព្រឹកថ្ងៃទី ១៦ ខែមករា ឆ្នាំ ២០១៥ សហព័ន្ធកីឡាអេឡិចត្រូនិកកម្ពុជា (EFC)បានបញ្ជូនកីឡាករអេឡិចត្រូនិករបស់ខ្លួនចំនួន៣ក្រុមរួមមាន Secret, NeverCare និង MD ដែលក្នុង មួយក្រុមមានសមាជិក៥រូបទៅចូលរួមប្រកួតក្នុងព្រឹត្តិការណ៍កីឡា អេឡិចត្រូនិកអន្តរជាតិ MATIC 2015 (Mission Against Terror International Championships)លើកទី៤នៅប្រទេសចិន ពីថ្ងៃទី១៧-១៨ ខែមករា ជាមួយ ១៧ ក្រុមផ្សេងទៀតមកពី ៦ ប្រទេសផ្សេងគ្នា។ ជាលទ្ធផលក្រុមកម្ពុជា Secret ទទួលបានចំណាត់ថ្នាក់ជើងឯក ខណៈក្រុម MD ទទួលបានចំណាត់ថ្នាក់លេខ ៣ ឯសមាជិកក្រុម NeverCare លាង ចាន់រស្មីទទួលបានចំណាត់ថ្នាក់លេខ ១ លើវិញ្ញាសាឯកត្តជន៕

អត្ថបទ៖ ភីឆាយ