សហព័ន្ធកីឡាទ្រីយ៉ាត្លុងប្រកាសរកបេក្ខភាពប្រកួតកីឡាអាកាត់ត្លុង

2015-01-23 19:03:50
ចំនួនមតិ 0 | ចំនួនចែករំលែក 0

ចន្លោះមិនឃើញ

សហព័ន្ធកីឡាទ្រីយ៉ាត្លុងកម្ពុជាកំពុងប្រកាសស្វែងរកបេក្ខភាពចូលរួមប្រកួតកីឡាអាកាត់ត្លុង (កីឡាហែលទឹកនិងរត់ប្រណាំង) និងស្នើឲ្យសាធារណជន ក្លិប និង គមនាគមន៍នានាចូលរួមប្រកួតឲ្យបានច្រើនកុះករ។

លោក ងឹន សុបញ្ញា អគ្គលេខាធិការកីឡាសហព័ន្ធទ្រីយ៉ាត្លុងកម្ពុជាបានប្រាប់ថា ការប្រកួតនេះគ្រាន់តែការប្រកួតមិត្តភាពទេ ប៉ុន្តែសហព័ន្ធមានគោលបំណងធំក្នុងការស្វែងរកយុវជនឆ្នើមសម្រាប់បណ្តុះបណ្តាលនាពេលអនាគត។ សហព័ន្ធកីឡាទ្រីយ៉ាត្លុងកម្ពុជាមិនអនុញ្ញាតឲ្យកីឡាករអាជីព ឬ ជម្រើសជាតិណាម្នាក់ចូលរួមប្រកួតឡើយដើម្បីទុកឱកាសឲ្យក្មេងៗ ដែលមានអាយុក្រោម ១៨ ឆ្នាំចូលរួមសាកល្បងសមត្ថភាព។

លោកបានបន្តថា នេះជាលើកទី ៤ ហើយដែលសហព័ន្ធកីឡាទ្រីយ៉ាត្លុងកម្ពុជា រៀបចំព្រឹត្តិការណ៍នេះឡើង ចំពោះប្រាក់រង្វាន់វិញ សហព័ន្ធមិនទាន់បានសម្រេចគ្រោងទុកនៅឡើយទេ ព្រោះពេលនេះនៅរង់ចាំឲ្យអ្នកឧបត្ថម្ភចូលរួមឲ្យអស់សិន។

សម្រាប់ការប្រកួតនេះសហព័ន្ធបែងចែកជា៣វិញ្ញាសាគឺ៖ -១- បុរស-នារី អាយុ ១៣ និង ១៧ ឆ្នាំគឺ វិញ្ញាសាហែលទឹកចម្ងាយ ១៥០ ម៉ែត្រ៤ជុំ និងរត់ចម្ងាយ ៣២០០ ម៉ែត្រ(៤ជុំ)។ -២- បុរស-នារី អាយុ១៨-៣៥ គឺវិញ្ញាសា ហែលទឹកចម្ងាយ៣៥០ម៉ែត្រនិង រត់ចម្ងាយ ៤,៨០០ម៉ែត្រ(៦ជុំ)។ -៣- បុរស អាយុលើ៣៥ឆ្នាំ គឺវីញ្ញាសាហែលទឹកចម្ងាយ២៥០ម៉ែត្រ និងរត់ចម្ងាយ ៤,០០០ម៉ែត្រ។

សម្រាប់ការទទួលពាក្យនឹងចាប់ទទួលពាក្យពីថ្ងៃផ្សាយដំណឹងនេះតទៅនៅទីស្នាក់ការសហព័ន្ធកីឡា ទ្រីយ៉ាត្លុង កម្ពុជា(NOCC) និងនៅCambodian Country Club (CCC) រហូតដល់ថ្ងៃទី១០ ខែកុម្ភៈឆ្នាំ២០១៥។ ការប្រកួតនឹងធ្វើនៅថ្ងៃទី១៥ ខែកុម្ភៈ ឆ្នាំ ២០១៥ វេលាម៉ោង ៧:00នាទីព្រឹក នៅ Cambodian Country Club (CCC)។ លើសពីនេះបើចង់ជ្រាបឲ្យកាន់តែច្បាស់ អាចទំនាក់ទំនង តាមរយៈលេខទូរស័ព្ទលោក ងឹន សុបញ្ញា ផ្ទាល់ដែលមានលេខ ០១២ ៧៩ ៧៩ ៤៤ ៕

អត្ថបទ៖ ស្រី សុវណ្ណដារ៉ា