កូឌីវ័រកក់កៅអីទៅវគ្គផ្ដាច់ព្រ័ត្រ Africa Cup of Nations មុនគេ

2015-02-05 17:39:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់ជម្រើសជាតិកូឌីវ័រ បានឡើងទៅឈរចាំនៅវគ្គផ្ដាច់ព្រ័ត្រពានរង្វាន់ Africa Cup of Nations មុនគេ បន្ទាប់ពីលត់ក្រុមសាធារណរដ្ឋប្រជាធិបតេយ្យកុងហ្គោ (DR Congo) ដោយលទ្ធផល ៣-១ ក្នុងវគ្គពាក់កណ្ដាលផ្ដាច់ព្រ័ត្រ កាលពីយប់មិញ។

ខ្សែបម្រើឆ្នើមរបស់ក្រុម Manchester City កីឡាករ Yaya Toure ស៊ុតចម្ងាយ២០យ៉ាដ (ជាង១៨ម៉ែត្រ) ទម្លុះសំណាញ់ទីបានសម្រេច ធ្វើឲ្យក្រុមកូឌីវ័រនាំមុខមុននៅនាទី២១ ប៉ុន្តែត្រូវបានកីឡាករ Dieumerci Mbokani ស៊ុតបាល់ពិន័យ១១ម៉ែត្រ ឲ្យក្រុម DR កុងហ្គោ តាមស្មើវិញភ្លាមៗត្រឹមតែ៣នាទី ពោលគឺនៅនាទី២៤។

នៅចុងតង់ទី១ ខ្សែប្រយុទ្ធក្រុមអ៊ីតាលី AS Roma កីឡាករ Gervinho ស៊ុតឲ្យកូឌីវ័រនាំមុខសាជាថ្មីទៀត មុនពេលដែលខ្សែការពារ Wilfried Kanon បន្ថែម១គ្រាប់ទៀត នៅតង់ទី២នាទីទី៦៨។

ដូច្នេះក្រុមកូឌីវ័រត្រូវរង់ចាំការប្រកួតរវាងក្រុមហ្គាណា ប៉ះគ្នាជាមួយក្រុម Equatorial Guinea នៅថ្ងៃស្អែកសិន ដើម្បីដឹងថាតើក្រុមមួយណា នឹងត្រូវប៉ះពួកគេនៅវគ្គផ្ដាច់ព្រ័ត្រជាបន្ត។ រីឯការប្រកួតវគ្គផ្ដាច់ព្រ័ត្រ នឹងត្រូវធ្វើឡើងនៅថ្ងៃច័ន្ទ ទី៩ ខែកុម្ភៈសប្ដាហ៍ក្រោយ៕