វ៉េត រតនា មានទ្រព្យស្ដុកស្ដម្ភហើយ នៅតែមិនភ្លេចសិល្បៈ

2015-02-06 18:32:59
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតតារាសម្ដែង អ្នកនាង វ៉េត រតនា ដែលបានប្ដីជាអាណិកជនខ្មែររស់នៅសហរដ្ឋអាមេរិក ថ្មីៗនេះបាននាំក្រុមគ្រួសារមកលេងស្រុកកំណើត ទោះបីជាក្លាយជាថៅកែស្រីមានទ្រព្យស្ដុកស្ដម្ភហើយក្ដី តារាស្រីម្នាក់នេះនៅតែឆ្លៀតប្រលូកក្នុងសិល្បៈទៀត។

ទោះបីជាមានកូន២ហើយ ក្ដី វ៉េត រតនា នៅតែមានសម្រស់ស្រស់ស្អាត ជួបជាមួយSabay ថ្មីៗនេះ គ្រាដែលនាងមកចូលរួមថតMV ឲ្យផលិតកម្ម រ៉ៃមាស តារាស្រីម្នាក់នេះប្រាប់ថា នាងបានមកពីអាមេរិកជាង២សប្ដាហ៍ហើយ ដែលដំណើរមកលេងស្រុកកំណើតជាលើកទី៣បន្ទាប់ពីចេញទៅរស់នៅសហរដ្ឋអាមេរិកនេះ នាងបាននាំងទាំងប្ដីទាំងកូនមកជាមួយទាំងអស់ ដោយមករយៈពេល៣ខែ ទើបត្រឡប់ទៅវិញ។

រតនាបានបន្តថា គ្រាន់ដែលមកដល់ស្រុកខ្មែរភ្លាមមានអ្នកដឹកនាំសម្ដែងទាក់ទងជាច្រើន ក្នុងនោះមានទាំង តាមបណ្ដាស្ថានីយទូរទស្សន៍ ថតMV ក៏ដូច ថតខ្សែភាពយន្តជាដើម។ បច្ចុប្បន្នបានឡើងច្រើននៅតាមស្ថានីយទូរទស្សន៍មួយចំនួនហើយ នៅពាក់កណ្ដាលខែ កុម្ភៈ ខាងមុខនេះ នាងត្រៀមថតខ្មែរភាពយន្តមួយរឿងទៀត ប៉ុន្តែមិនទាន់អាចប្រាប់លំអិតបានឡើយ ។

វ៉េត រតនា បានប្រលូកសិល្បៈនៅឆ្នាំ២០០៣ នាងជាអតីតតារាសម្ដែងល្បីឈ្មោះម្នាក់ ដោយនាងធ្លាប់បានថតរឿងជាង២០ មកហើយ រឿងដែលល្បីជាងគេ គឺរឿង "អាសូរអូនផង" និង "ឃុនឆាងឃុនផែន" ជាដើម។ តារាស្រីម្នាក់នេះបានចូលរោងការជាមួយលោក តឹក វណ្ឌី ជាអាណិកជនខ្មែររស់នៅរដ្ឋញីវយ៉ក សហរដ្ឋអាមេរិកកាលពីអំឡុងឆ្នាំ២០០៦ គ្រាដែលប្រជាប្រិយភាពរបស់នាងល្បីខ្លាំង ។ បច្ចុប្បន្នទទួលបានកូន២នាក់ ប្រុស១ ស្រី១ ហើយជាចំណងដៃ។

អ្នកនាងវ៉េត រតនា ត្រូវបានគេដឹងថាជាតារាស្រីម្នាក់មានសំណាង និងមានទ្រព្យច្រើន ព្រោះនាងជាម្ចាស់សណ្ឋាគារធំមួយនៅទីរួមខេត្ត បាត់ដំបង ដែលមានឈ្មោះថា "វិមានសុវណ្ណភូមិ" ដោយសណ្ឋាគារមួយនោះ នាងប្រគល់ឲ្យបងស្រី ជាអ្នកមើលខុសត្រូវ។ ចំណែកនៅសហរដ្ឋអាមេរិកវិញ នាងគឺជា ថៅកែម៉ាតធំមួយមានឈ្មោះថា "បាត់ដំបងផ្សារខ្មែរ" ដែលខ្មែរជាច្រើន រស់នៅទីនោះស្គាល់ហាងនាងច្បាស់។

តារាស្រីម្នាក់នេះ ប្រាប់ថា ហាងរបស់នាងនៅសហរដ្ឋអាមេរិក ក្រៅពីលក់គ្រឿងទេសជាច្រើនមុខ ក៏មានលក់ CD VCD និង DVD ចម្រៀងរបស់ខ្មែរផងដែរ ដោយនៅក្នុងបទចម្រៀង ស្ទើរគ្រប់ផលិតកម្មនៅក្នុងប្រទេសកម្ពុជា ត្រូវបាននាង យកទៅលក់នៅហាងរបស់នាងទាំងអស់។