អ្នកចាំទី អ៊ុំ វិចិត្រ របស់ទ័ព ត្រូវវះកាត់ដៃអស់យ៉ាងតិចក៏ ១០០០ ដុល្លារដែរ

2015-02-10 17:12:36
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករអ្នកចាំទីដៃទី១ អ៊ុំ វិចិត្រ របស់ក្រុមក្រសួងការពារជាតិ (ទ័ព) ដែលមានបញ្ហាផ្នែកឆ្អឹងដៃឆ្វេងចាំបាច់ត្រូវតែវះកាត់ដៃ ព្យាបាលទើបអាចជាសះស្បើយដូចដើមវិញ ប៉ុន្តែការព្យាបាលនេះត្រូវចាយប្រាក់យ៉ាងតិចក៏ ១០០០ ដុល្លារសហរដ្ឋអាមេរិកដែរ។

កីឡាករ អ៊ុំ វិចិត្រ

បើតាមទិន្នន័យទឹកប្រាក់ដែលសាមីខ្លួនទទួលបានគឺជិត ៧០០ ដុល្លារហើយប៉ុន្តែ ទឹកប្រាក់ទាំងអស់នេះជាការរៃអង្គាសគ្នារបស់អ្នកគាំទ្រកីឡាបាល់ទាត់ជាតិ និង មិត្តរួមអាជីពបាល់ទាត់។ ចំណែកខាងសហព័ន្ធកីឡាបាល់ទាត់កម្ពុជាបានផ្ដល់ប្រាក់ដែលនៅសល់បង្គ្រប់នៃថ្លៃព្យាបាល។ ចំពោះក្លិបនឹងគ្រោងជួយមើលថែអ្នកចាំទីរបស់ខ្លួនពេលវះកាត់រួចរាល់ផងដែរ។

អ៊ុំ វិចិត្រ របួសដៃក្នុងពេលហ្វឹកហាត់សមជាមួយក្រុមជម្រើសជាតិ ក្រោយពេលត្រឡប់មកពីប្រកួតពានរង្វាន់ Hassanal Bolkiah Trophy 2014 នៅប្រទេសប្រ៊ុយណេ ពោលគឺពេលចេញទៅប្រកួតមិត្តភាពអន្តរជាតិនៅ ម៉ាឡេស៊ី និង ឥណ្ឌូណេស៊ី ក្នុងខែ កញ្ញា។

កីឡាករវ័យ ២០ ឆ្នាំប្លាយរូបនេះបន្ថែមថា៖ «ខ្ញុំទៅពេទ្យខុស ពិនិត្យ ២ លើក ដោយនៅលើកដំបូងអំឡុងខែ កញ្ញា និង លើកទី២ ក្នុងខែ ធ្នូ ឆ្នាំមុន តែលទ្ធផលថាមិនអីនោះទេ។ រហូតលើកទី៣ កាលពីពេលថ្មីៗ ប្ដូរពេទ្យទើបដឹងថាបែកឆ្អឹងដៃ»។

គ្រូពេទ្យឯកជនដែល អ៊ុំ វិចិត្រ ទៅពិនិត្យ បានប្រាប់ថា ក្រោយពេលវះកាត់រួចដៃរបស់គេត្រូវសម្រាកព្យាបាលយ៉ាងតិចក៏ ៣ ខែទើបអាចត្រឡប់ចូលទីលានហ្វឹកហាត់ ឬ ប្រកួត បានដូចលើកមុន។ ការវះកាត់អាចនឹងចាប់ផ្ដើមចន្លោះពីថ្ងៃទី ១៥ ទៅ ២០ កុម្ភៈ ខាងមុន តាមការណាត់របស់ពេទ្យ។

ឥឡូវនេះលោកគ្រូអ្នកចាំទី សួង ភារម្យ របស់ទ័ពកំពុងតែជួបវិបត្តិអ្នកចាំទី ដោយសារតែកីឡាករជម្រើសទី១ អ៊ុំ វិចិត្រ មានបញ្ហារបួសដៃ ហើយកីឡាករដៃទី ២ អ៊ុំ សេរីរ័ត្ន ដែលជាប្អូនបង្កើតរបស់គេជាប់ឈ្មោះទៅបង្ហាញមុខក្នុងក្រុមជម្រើសជាតិ កាលពីពេលថ្មីៗនេះ៕