កីឡដ្ឋានបាល់ទាត់កម្ពុជាទាំង៧គួរឲ្យចាប់អារម្មណ៍ឆ្នាំនេះ

2015-02-13 21:40:16
ចំនួនមតិ 0 | ចំនួនចែករំលែក 0

ចន្លោះមិនឃើញ

រហូតមកដល់ពេលនេះមានកីឡដ្ឋានបាល់ទាត់ទាំងរដ្ឋ និងឯកជនមួយចំនួនបានកំពុងស្ថាបនា និងជួសជុលគួរឲ្យចាប់អារម្មណ៍ និងបង្ហាញនូវភាពរីកចម្រើននៃហេដ្ឋារចនាសម្ពន្ធសម្រាប់វិស័យបាល់ទាត់កម្ពុជា ជាពិសេសការត្រៀមខ្លួនធ្វើម្ចាស់ផ្ទះនៃការប្រកួតលីកកំពូលកម្ពុជាសម្រាប់រដូវកាលថ្មីឆ្នាំ២០១៥នេះ។

ទី១ កីឡដ្ឋានរបស់ក្លិបភ្នំពេញក្រោន ក្លិបភ្នំពេញក្រោនកំពុងស្ថាបនាកីឡដ្ឋានបាល់ទាត់ផ្ទាល់ខ្លួនយ៉ាងល្អដែលចាត់ទុកថា លេចធ្លោជាងកីឡដ្ឋានរបស់ក្លិបដទៃទៀតដោយមានទីលានធំសម្រាប់ការប្រកួតផ្លូវការ ទីលានហ្វឹកហាត់ និងប្រកួតមិត្តភាព ព្រមទាំងអគារផ្សេងៗសម្រាប់កីឡាករស្នាក់នៅ រៀនសូត្រ ផ្លាស់សំលៀកបំពាក់ និងសម្រាប់មន្ត្រីរៀបចំការប្រកួត។ កីឡដ្ឋានរបស់ភ្នំពេញក្រោនស្ថិតនៅក្រុមទី១៣ ឃុំទួលគោក សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។

ទីលាននៃកីឡដ្ឋានរបស់ក្លិបភ្នំពេញក្រោន (រូបថត ភ្នំពេញក្រោន)

ទី២ កីឡដ្ឋានរបស់ក្លិបស្វាយរៀង កីឡដ្ឋានបាល់ទាត់របស់ខេត្តស្វាយរៀងទើបតែស្ថាបនារួចរាល់កាលពីប៉ុន្មានខែមុននេះទេ ប៉ុន្តែមុនលីកកំពូលកម្ពុជាឈានចូលមកដល់ដើម្បីធ្វើជាម្ចាស់ផ្ទះក្នុងដី ទីលានមួយនេះបានរៀបចំការប្រកួតព្រឹត្តិការណ៍បាល់ទាត់ធំតែម្តងគឺពានរង្វាន់សម្តេច ហ៊ុន សែន ឆ្នាំ២០១៥ និងគ្រោងធ្វើម្ចាស់ផ្ទះលក្ខណៈអន្តរជាតិមួយទៀតដែលក្រុមជម្រើសជាតិកម្ពុជាទទួលភ្ញៀវជម្រើសជាតិម៉ាកាវសម្រាប់ការប្រកួតជើងទីមួយនៃវគ្គជម្រុះ World Cup នៃក្រុមលំដាប់ FIFA Ranking។ កីឡដ្ឋានធម្មជាតិរបស់ស្វាយរៀងស្ថិតនៅក្នុងទីរួមខេត្តតែម្តង។

កីឡដ្ឋានខេត្តស្វាយរៀង

ទី៣ កីឡដ្ឋានរបស់ក្លិបវេស្ទើន ក្លិបសាកលវិទ្យាល័យវេស្ទើនដែលបានប្តូរឈ្មោះ Sparta Cambodia United ក៏អាចត្រៀមខ្លួនសម្រាប់ធ្វើជាម្ចាស់ផ្ទះលីកកំពូលកម្ពុជានៅរដូវកាលថ្មីនេះដែរ។ ក្លិបកំពុងស្ថាបនាកីឡដ្ឋានជិតរួចរាល់ហើយដែលទីលានក្រាលស្មៅសិប្បនិម្មិតនៅផ្លូវ ១៩៦៦ ក្នុងភូមិ ទំនប់ សង្កាត់ ភ្នំពេញថ្មី ខណ្ឌ សែនសុខ រាជធានីភ្នំពេញ។

កីឡដ្ឋានរបស់ក្លិបវេស្ទើនកំពុងស្ថាបនា

ទី៤ កីឡដ្ឋានរបស់ក្លិបក្រសួងការពារជាតិ ក្លិបបាល់ទាត់ក្រសួងការពារជាតិក៏បានត្រៀមកីឡដ្ឋានសម្រាប់ទទួលធ្វើជាម្ចាស់ផ្ទះនៃលីករដូវកាលថ្មីដែរ ខណៈប៉ុន្មានថ្ងៃចុងក្រោយនេះកំពុងចាប់ផ្តើមជួសជុលកីឡដ្ឋានកងយោធពលខេមរភូមិន្ទ(ស្តាតចាស់)។ គ្មានអ្វីដែលជាការលំបាកសម្រាប់ក្លិបមួយនេះដោយសារស្តាតចាស់មានស្រាប់គឺគ្រាន់តែជួសជុល និងកែលម្អជាថ្មីក៏អាចរៀបចំការប្រកួតបានយ៉ាងស្រួល។ ស្តាតចាស់ស្ថិតនៅជិតរង្វង់ស្ពានជ្រោយចង្វារ រាជធានីភ្នំពេញ។

កីឡដ្ឋានស្តាតចាស់

ទី៥ ពហុកីឡដ្ឋានជាតិអូឡាំពិក ពហុកីឡដ្ឋានជាតិអូឡាំពិកដែលជាមជ្ឈមណ្ឌលសម្រាប់រៀបចំព្រឹត្តិការណ៍ធំៗ និងជាកន្លែងប្រមូលប្តុំកីឡាជាតិបានកំពុងជួសជុលទីលានបាល់ទាត់ថ្មីដែលជាការចំណាយរបស់សហព័ន្ធបាល់ទាត់អន្តរជាតិ (FIFA) និងការលម្អរចនាសម្ពន្ធផ្សេងៗជាច្រើនដែលជាការចំណាយរបស់ក្រសួងអប់រំ យុវជន និងកីឡា។

ពហុកីឡដ្ឋានជាតិអូឡាំពិក

ទី៦ ពហុកីឡដ្ឋានជាតិមតកតេជោ ដើម្បីទទួលរៀបចំធ្វើជាម្ចាស់ផ្ទៃនៃព្រឹត្តិការណ៍អាស៊ីអាគ្នេយ៍ (ស៊ីហ្គេម២០២៣) ប្រទេសកម្ពុជាបានកំពុងស្ថាបនាពហុកីឡដ្ឋានថ្មីមួយដែលមានឈ្មោះ ពហុកីឡដ្ឋានជាតិមរតកតេជោ។ ការស្ថាបនាមាន៣ដំណាក់កាលគឺទីមួយអាងហែលទឹក និង Indoor Stadium ដែលមានទីលានបាល់បោះ និងបាល់ទះ ព្រមទាំងកន្លែងស្នាក់នៅរបស់កីឡាករ។ ដំណាក់កាលទីមួយនេះកសាងបានជាង៦០ភាគរយហើយ ខណៈដំណាក់កាលទី២គឺជាទីលានបាល់ទាត់សំខាន់គ្រោងចាប់ផ្តើមសាងសងនៅឆ្នាំ២០១៧ និងបន្ទាប់មកដំណាក់កាលទី៣ដែលជាទីលានបន្ទាប់បន្សំជាច្រើនទៀត។ ពហុកីឡដ្ឋានថ្មីនេះ ស្ថិតនៅក្នុងសង្កាត់ព្រែកតាសេក ខណ្ឌឫស្សីកែវ លើផ្ទៃដីប្រមាណ៨៣ហិកតា។

ទី៧ មជ្ឈមណ្ឌលបាល់ទាត់ជាតិទន្លេបាទី ចំពោះមជ្ឈមណ្ឌលសាលាបាល់ទាត់ជាតិទន្លេបាទីជាកន្លែង និងជាថ្នាលបណ្តុះបណ្តាលវិស័យបាល់ទាត់សុទ្ធតែម្តងដែលគោលដៅសំខាន់គឺបណ្តុះបណ្តាលធនធានកីឡាករបាល់ទាត់សម្រាប់ត្រៀមខ្លួនធ្វើម្ចាស់ផ្ទះស៊ីហ្គេមឆ្នាំ២០២៣។ ទោះជាកន្លែងបណ្តុះបណ្តាលក៏ដោយ ក៏មជ្ឈមណ្ឌលដែលមានទីលានវាល់ស្មៅធម្មជាតិ៤នេះអាចរៀបចំការប្រកួតមិត្តភាពជាតិ អន្តរជាតិ និងព្រឹត្តិការណ៍បាល់ទាត់ផ្សេងទៀតបានដែរ។ មជ្ឈមណ្ឌលបាល់ទាត់ជាតិនេះស្ថិតនៅស្រុកបាទី ខេត្តតាកែវ។

ចំពោះក្លិបបាល់ទាត់ដែលលេងនៅលីកកម្ពុជាផ្សេងជាច្រើនទៀតសុទ្ធតែកំពុងមានឆន្ទៈបង្កើតកីឡដ្ឋានផ្ទាល់ខ្លួនសម្រាប់រៀបចំការប្រកួតក្នុងដី និងក្រៅដីផងដែរ ប៉ុន្តែតំណាងក្លិបមួយចំនួនបាននិយាយថា ពួកគេរង់ចាំមើលសហព័ន្ធកីឡាបាល់ទាត់កម្ពុជាសិនថាតើរៀបចំឲ្យមានការប្រកួត Home/Away បានដល់កម្រិតណាមុនពេលពួកគេចាប់ផ្តើមដែរ៕

អត្ថបទ៖ ជាន ចាន់រ៉ា