មុនចូលវះកាត់របួសដៃ អ្នកចាំទី អ៊ុំ វិចិត្រ របស់ទ័ព បង្ហាញឈ្មោះម្ចាស់ជំនួយ

2015-02-17 16:33:29
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាំទីជម្រើសដំបូង អ៊ុំ វិចិត្រ របស់ក្លិបក្រសួងការពារជាតិ បានបង្ហាញឈ្មោះម្ចាស់ជំនួយនានា តាមគណនី Facebook របស់ខ្លួន ក្នុងការរ៉ៃអង្គាសប្រាក់គ្នាជួយចេញថ្លៃវះកាត់របួសដៃរបស់គេ ដែលនឹងប្រព្រឹត្តិទៅនៅម៉ោង ១: ៣០ នាទី ថ្ងៃទី ១៧ ខែ កុម្ភៈ នេះនៅមន្ទីរពេទ្យឯកជនមួយកន្លែង ក្នុងរាជធានីភ្នំពេញ។

ប្រាក់ទាំងអស់មានចំនួន ១២០៤ ដុល្លារសហរដ្ឋអាមេរិក ដោយក្នុងនោះមានការប្រមូលមកពីអ្នកគាំទ្រ, សហព័ន្ធកីឡាបាល់ទាត់កម្ពុជា។ យោងតាមកីឡាករ អ៊ុំ វិចិត្រ ក្លិបរបស់គេនឹងចេញថ្លៃព្យាបាលក្រោយពេលវះកាត់។

អ៊ុំ វិចិត្រ របួសដៃក្នុងពេលហ្វឹកហាត់សមជាមួយក្រុមជម្រើសជាតិ ក្រោយពេលត្រឡប់មកពីប្រកួតពានរង្វាន់ Hassanal Bolkiah Trophy 2014 នៅប្រទេសប្រ៊ុយណេ ពោលគឺពេលចេញទៅប្រកួតមិត្តភាពអន្តរជាតិនៅ ម៉ាឡេស៊ី និង ឥណ្ឌូណេស៊ី ក្នុងខែ កញ្ញា។

កីឡាករវ័យ ២០ ប្លាយរូបនេះនៅមិនអស់ចិត្តដែលត្រូវចំណាយពេលយូរក្នុងការព្យាបាលក្រោយពេលវះកាត់ ពោលគឺរយៈពេល ៦ ខែ ទើបអាចចូលហ្វឹកហាត់វិញបាន ហើយត្រូវរង់ចាំ ៣ ទៅ ៤ ឆ្នាំ ទើបអាចដកដែកចេញពីដៃបាន។

បញ្ហារបួសផ្នែកឆ្អឹងដៃឆ្វេងរបស់ អ៊ុំ វិចិត្រ ចាំបាច់ត្រូវតែវះកាត់ដៃ ព្យាបាលទើបអាចជាសះស្បើយដូចដើមវិញ ហើយតម្លៃក្នុងការព្យាបាលនេះត្រូវចាយប្រាក់យ៉ាងតិចក៏ ១០០០ ដុល្លារសហរដ្ឋអាមេរិកដែរ។

Sabay សូមជូនពរឱ្យ ការវះកាត់ព្យាបាលរបស់ អ៊ុំ វិចិត្រ ប្រកបដោយរលូន និង ឆាប់ជាសះស្បើយ៕