កូនកំលោះវាយកូនក្រមុំយប់ផ្សំដំណេក ព្រោះដោះរ៉ូបមិនរួច

2015-02-17 17:14:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃរៀបអាពាហ៍ពិពាហ៍ គូស្នេហ៍ទាំងឡាយហាក់រីករាយយ៉ាងខ្លាំង ព្រោះជាពេលមានន័យបំផុតក្នុងជីវិត។ ឈានចូលដល់រាត្រីទឹកឃ្មុំទៀតសោត វេលាផ្អែមល្ហែមមិនអាចបំភ្លេចបាន ប៉ុន្តែពេលខ្លះ រាត្រីទឹកឃ្មុំប្រែជាទឹកខ្មេះ ព្រោះបញ្ហាផ្សេងៗកើតឡើងដោយចៃដន្យ។ ជាក់ស្ដែង កូនក្រមុំម្នាក់នៅប្រទេសអង់គ្លេស ត្រូវស្វាមីថ្មីថ្មោងរបស់ខ្លួន វាយដំរងរបួសជាទម្ងន់ក្នុងយប់រៀបអាពាហ៍ពិពាហ៍ ព្រោះមិនអាចដោះរ៉ូបនាងរួច។

កូនក្រមុំវ័យ ២២ឆ្នាំ Amy Dawson ត្រូវកូនកំលោះវ័យ ២៩ឆ្នាំ Gavin Golightly ដែលខឹងរឿងដោះរ៉ូបមិនចេញ ចាប់បោកឲ្យដួល រួចឡើងជិះពីលើ និងវាយដំជាច្រើនដង។ ហេតុការណ៍នេះ បានកើតឡើងក្រោយពិធីជប់លៀងទទួលភ្ញៀវកិត្តិយសដែលជាមិត្តភ័ក្ដិ និងក្រុមគ្រួសារពិសាភោជនីយាហារនៅសណ្ឋាគារមួយ។ បន្ទាប់ពីទទួលរងអំពើហិង្សា កូនក្រមុំបានរត់ចេញពីបន្ទប់សណ្ឋាគារជាមួយស្នាមដាច់រលាត់លើចិញ្ចើម និងស្នាមជាំលើមុខ ព្រមទាំងទ្រូងផងដែរ។ ក្រោយពីបង្កអំពើហិង្សារួច កូនកំលោះហេងស៊យនោះ បានចាកចេញទៅបាត់ ឯកូនក្រមុំត្រូវអ្នកជញ្ជូនឥវ៉ាន់ជួយហៅទូរសព្ទទៅប៉ូលិស។

កូនកំលោះ Golightly បានអះអាងថា លោកប្រើគ្រឿងញៀនមុនពេលផ្ទុះអំពើហិង្សានេះឡើង ហើយមិនបានចាំថាខ្លួនឯងធ្វើអ្វីខ្លះនោះទេ។ យ៉ាងណាក្ដី ក្រោយមកលោកបានទទួលស្គាល់កំហុសរបស់ខ្លួនក្នុងការបង្ករបួសស្នាមទៅលើរូបរាងកាយកូនក្រមុំ នៅតុលាការ Peterlee Magistrates ចក្រភពអង់គ្លេស។ លោក Golightly ត្រូវបង្គាប់ដាក់ឲ្យស្ថិតនៅក្រោមការត្រួតពិនិត្យរយៈពេល ២ឆ្នាំ និងហាមឃាត់មិនឲ្យជួបប្រពន្ធ នាង Dawson ដែលលែងលះរួច ព្រមទាំងសងសំណងមួយចំនួនផងដែរ។

នាង Dawson បានបញ្ជាក់ថា ទណ្ឌកម្មនេះពិតជាស្រាលខ្លាំងណាស់។ កូនក្រមុំដែលជានិស្សិតផ្នែកគណនេយ្យ បាននិយាយបន្ទាប់ពីសវនាការថា "ខ្ញុំគិតថាប្រហែលមិនរស់ទេពេលនោះ... មើលទៅគាត់ ដូចជាចង់សម្លាប់ខ្ញុំ"។

តាមពិតទៅ គូស្វាមីភរិយាថ្មីថ្មោងនិងទើបលែងលះគ្នាវិញនេះ បានរស់នៅជាមួយគ្នាតាំងពីមុនអាពាហ៍ពិពាហ៍ម្ល៉េះ និងធ្លាប់មានកូនម្នាក់ជាមួយគ្នាទៀតផង ប៉ុន្តែបែរជាផ្ទុះអំពើហិង្សាឡើងរហូតដល់បែកគ្នាក្នុងថ្ងៃរៀបការទៅវិញ៕