សិល្បករសៀក ៥ប្រទេសនឹងមកជួបជុំគ្នាក្នុងព្រឹត្តិការណ៍សៀកដ៏ធំនៅកម្ពុជា

2015-02-26 16:02:21
ចំនួនមតិ 0 | ចំនួនចែករំលែក 0

ចន្លោះមិនឃើញ

សិល្បករមកពី៥ប្រទេសរួមទាំងកម្ពុជាមាន បារាំង ស្វីស កោះតៃវ៉ាន់ និងប្រទេសវៀតណាម គ្រោងនឹងមកជួបជុំគ្នានៅប្រទេសកម្ពុជា ក្នុងព្រឹត្តិការណ៍សិល្បៈសៀកប្រចាំឆ្នាំហៅថា "ទីនេះទីនោះ"។

សិល្បករមកពីប្រទេសទាំងនោះមាន ស្វីស ៨នាក់ បារាំង ៥នាក់ កោះតៃវ៉ាន់ ១០នាក់ វៀតណាម ៥នាក់ ឯកម្ពុជាដែលជាម្ចាស់ផ្ទះ មានច្រើនជាងគេដោយចែកជាផ្នែកៗទៀត គឺសិល្បករមកពីអង្គការពន្លឺសិល្បៈ សិល្បករមកពីសាលាសៀកជាតិ សរុបទៅប្រមាណជា ៦០នាក់ បង្កើតបានជាព្រឹតិ្តការណ៍ដ៏ធំប្រចាំឆ្នាំ។ នេះបើតាម ឯកឧត្តម គង់ កន្តារ៉ា អនុរដ្ឋលេខាធិការក្រសួងវប្បធម៌។

“ទីនេះទីនោះ" គឺជាមហាស្រពសៀកអន្តរជាតិ ដែលរៀបចំឡើងមកដល់ឆ្នាំទី៩ហើយ។ ឆ្នាំដំបូងបំផុតរបស់ "ទីនេះទីនោះ" គឺកើតឡើងនៅឆ្នាំ ២០០៤។ ប៉ុន្តែនៅឆ្នាំ ២០១១ បានផ្អាកមួយរយៈដោយសារបញ្ហាហិរញ្ញវត្ថុ។ រហូតមកដល់ឆ្នាំ ២០១៤ទើប មហោស្រពសៀកប្រចាំឆ្នាំនេះ បានកើតឡើងជាថ្មីក្រោមការឧបត្ថម្ភរបស់ក្រុមហ៊ុន Smart និងធនាគារ ANZ Royal។

មកដល់ឆ្នាំ ២០១៥ “ទីនេះទីនោះ" បានបន្តមកដល់ឆ្នាំទី២បន្ទាប់ពីចាប់ផ្ដើមជាថ្មី។ ឯកឧត្តម គង់ កន្តារ៉ា ប្រាប់ថា មិនថាឆ្នាំមុន ឬឆ្នាំនេះ មហោស្រពសៀកអន្តរជាតិប្រចាំឆ្នាំនេះ មិនដើម្បីប្រឡងបប្រជែងយកចាញ់ឈ្នះគ្នាឡើយ។ "យើងធ្វើឡើងគ្រាន់តែដើម្បីផ្សព្វផ្សាយពីសិល្បៈសៀកខ្មែរឲ្យទូលំទូលាយទី១ និងទី២ គឺដើម្បីបើកឱកាសសិល្បករសៀកយើងបានដកស្រង់បច្ចេកទេសជាមួយសិល្បៈសៀកមកពីប្រទេសនានាប៉ុណ្ណោះ!”។

លោក ហួត តារា នាយកប្រតិបត្តិសហគ្រាសសង្គមហ្វារខេត្តសៀមរាប បន្ថែមថា "ទីនេះទីនោះ" ធ្វើឡើងដើម្បីរឹតចំណងមិត្តភាព សហប្រតិបត្តិការ ការចែករំលែកបទពិសោធន៍គ្នាទៅវិញទៅមក និងបង្កើតការទំនាក់ទំនង។ ឈរលើគោលការណ៍នេះ លោកថា "ទីនេះទីនោះ" ២០១៥ នឹងមកនូវការសម្ដែងពិសេសៗជាច្រើន ដើម្បីចែករំលែកគំនិតច្នៃប្រឌិតជាមួយប្រជាជនកម្ពុជា។

ឆ្លងកាត់ការធ្វើជាច្រើនឆ្នាំកន្លងមកនេះ លោក ឃួន ដេត នាយកប្រតិបត្តិ និងជាស្ថាបនិកអង្គការហ្វារពន្លឺសិល្បៈខេត្តបាត់ដំបងដែលមានទិសដៅបណ្ដុះបណ្ដាលការស្រឡាញ់សិល្បៈវប្បធម៌ លើកកម្ពស់ការងារសង្គមកិច្ច ដោយជួយឲ្យកុមារក្រីក្រ និងកំព្រាមានជំនាញជាដើម បានគូសបញ្ជាក់ថា សិល្បៈសៀកខ្មែរបានកើនឡើងនូវការចាប់អារម្មណ៍ ដោយផ្ដើមពីចំណុចទាបជាងសម្រាប់ការគាំទ្ររបស់បងប្អូនប្រជាពលរដ្ឋក្នុងស្រុក មកទល់បច្ចុប្បន្ន មានសន្ទស្សន៍ប្រហាក់ប្រហែលគ្នានឹងជនបរទេស។

ក្រៅពីនេះ ការចាប់អារម្មណ៍របស់យុវវ័យចំពោះការហាត់រៀនសិល្បៈសៀកក៏មានការកើនឡើងដែរ ក្នុងនោះគ្រាន់តែអង្គការហ្វារពន្លឺសិល្បៈរបស់លោក មានរហូតដល់ទៅ ១២០០នាក់ឯណោះ។

លោកស្រី ភោគ ឌីណា នាយិកាសាលាសៀកជាតិ ដែលបានបង្កើតកិច្ចសហប្រតិបត្តិការជាមួយ អង្គការហ្វារពន្លឺសិល្បៈ និងសហគ្រាសសង្គមហ្វារ បានថ្លែងថា លោកស្រីមានមានក្ដីសោមនស្សរីករាយណាស់ ការឈានមកដល់របស់មហោស្រព "ទីនេះទីនោះ" ឆ្នាំនេះ ហើយលោកស្រីសង្ឃឹមថា សិល្បៈសៀកខ្មែរនឹងកាន់តែមានប្រជាប្រិយភាពបន្ថែមទៀត។

រូបភាព៖ http://www.pharecambodiancircus.org

ជាមួយនឹងការតាំងចិត្តរបស់អ្នករៀបចំថានឹងធ្វើឲ្យធំជាងបណ្ដាឆ្នាំមុនៗ “ទីនេះទីនោះ" ២០១៥ ក៏ ទទួលបានការឧបត្ថម្ភរបស់ក្រុមហ៊ុនធំ និងថ្មីៗជាច្រើន ក្នុងនោះក្រៅពី Smart និងធនាគារ ANZ Royal ដែលជាអ្នកឧបត្ថម្ភចាស់ ក្រុមហ៊ុនតូតាល់ អាកាសយានដ្ឋានកម្ពុជា វិទ្យាស្ថានវប្បធម៌បារាំង ជាដើមក៏បានចូលរួមឧបត្ថម្ភដែរ។

JASSAUD Yves តំណាងក្រុមហ៊ុនតូតាល់ ដែលទើបនឹងចូលឧបត្ថម្ភក្នុងឆ្នាំនេះថ្លែងថា លោកបានទៅទស្សនកិច្ចផ្ទាល់ដល់អង្គការហ្វារ និងបានឃើញថាអ្វីដែលអង្គការនេះ បានធ្វើគឺមានប្រយោជន៍ណាស់ ដោយជួយឲ្យកុមារៗក្រីក្រ និងយុវវ័យកម្ពុជាមានជំនាញពិតប្រាកដជាគ្រឹះសម្រាប់អនាគត។ មើលឃើញចំណុចនេះ ទើបតូតាល់សម្រេចចូលរួមឧបត្ថម្ភ ជួយផ្សព្វផ្សាយសិល្បៈសៀកខ្មែរ។

មហោស្រពសៀកអន្តរជាតិ “ទីនេះទីនោះ" នឹងធ្វើឡើងមានរយៈពេល ៨ថ្ងៃ ដោយមានដង្ហែក្បួនតាមដងផ្លូវ និងសិក្ខាសាលារវាងសិល្បករអន្តរជាតិ នៅតាមខេត្តក្រុងចំនួន៣ គឺភ្នំពេញពីថ្ងៃទី ៧-៩ឧសភា។ សៀមរាបពីថ្ងៃទី ១១-១៣ ឧសភា និងបាត់ដំបងពីថ្ងៃទី ១៥ដល់ថ្ងៃទី ១៦ឧសភា៕

អត្ថបទ៖ ទារិកា