វ៉ាត់ ចំរើន៖ ឆ្នាំ ២០១៤ គឺជា ឆ្នាំប្រវត្តិសាស្ត្រ កីឡាកម្ពុជា

2015-02-26 22:26:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ឆ្នាំ ២០១៤ ត្រូវបានចាត់ទុកជាឆ្នាំប្រវត្តិសាស្ត្រដោយប្រទេសកម្ពុជាដណ្ដើមបានមេដាយមាសទ្វីបអាស៊ី ដែល ៦០ ឆ្នាំមកហើយ ខ្មែរទើបទទួលបានមេដាយ។ នេះបើតាមការលើកឡើងពី លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិក។

http://youtu.be/g9CzwVE5VkI

លោក វ៉ាត់ ចំរើន បានប្រាប់គេហទំព័រ Sabay នៅឯមហាសន្និបាតគណៈកម្មាធិការជាតិអូឡាំពិកកម្ពុជា NOCC បូកសរុបការងារឆ្នាំ ២០១៤ និង លើកទិសដៅឆ្នាំ ២០១៥ កាលពីព្រឹកមិញនេះថា ឆ្នាំ ២០១៤ គឺជា ឆ្នាំប្រវត្តិសាស្ត្របំបែកនៅកំណត់ត្រាកីឡាជាតិកម្ពុជា គឺកម្ពុជាដណ្ដើមបានមេដាយមាសទ្វីបអាស៊ីនៅប្រទេសកូរ៉េ នាឆ្នាំ ២០១៤ ដោយ ស៊ន សៀវមី ។

លោក ថោង ខុន រដ្ឋមន្រ្តីក្រសួងទេសចរណ៍ បានមានប្រសាសន៍ដែរថា ព្រឹត្តិការណ៍កីឡាធំៗ បានក្លាយទៅជាផលិតផលទេសចរណ៍ និង ជាផ្នែកមួយនៃការផ្លាស់ប្ដូរវិជ្ជមាននៅក្នុងសង្គមជាតិ ក៏ដូចជា ឯកភាពជាតិ និង ភាពរីកចម្រើននៅក្នុងប្រទេសតាមរយៈកីឡា។

ម្ចាស់មេដាយមាសទ្វីបអាស៊ីនៅប្រទេសកូរ៉េ ឆ្នាំ ២០១៤ កញ្ញា ស៊ន សៀវមី បានបញ្ចេញចំណាប់អារម្មណ៍ថា គណៈកម្មាធិការជាតិអូឡាំពិកបានចាត់ទុកឆ្នាំ ២០១៤ ជាឆ្នាំប្រវត្តិសាស្ត្រ គឺជា ការលើកទឹកចិត្តធំធេងសម្រាប់នាង។ សៀវមី បញ្ជាក់ថា "ខ្ញុំសប្បាយចិត្ត វាជាការលើកទឹកចិត្ត ហើយខ្ញុំនឹងព្យាយាមយកជយជំនះថែមទៀតនៅឆ្នាំ ២០១៦ នាប្រទេសប្រេស៊ីល"។

នី សំណាង ម្ចាស់មេដាយសំរិទ្ធទ្វីបអាស៊ីលើឆ្នេរខ្សាច់ប្រទេសថៃ ២០១៤ បានលើកឡើងដែរថា ការលើកឡើងរបស់ គណៈកម្មាធិការជាតិអូឡាំពិកកម្ពុជា ខាងលើ គឺជា ការលើកស្ទួយស្រ្តីខ្មែរ លើកទឹកចិត្តកីឡាករ កីឡាការិនី និង ឲ្យកីឡាករ ជំនាន់ក្រោយកាន់តែប្រឹងប្រែង និង យកគំរូតាម។

តាមការបញ្ជាក់ពី គណៈកម្មាធិការជាតិអូឡាំពិក បានចាត់ទុកថា ការនាំជូនមេដាយមាសទ្វីបអាស៊ីនៅប្រទេសកូរ៉េ ដោយកញ្ញា ស៊ន សៀមី និង នី សំណាង មេដាយសំរិទ្ធទ្វីបអាស៊ីលើឆ្នេរខ្សាច់ប្រទេសថៃ នាឆ្នាំ ២០១៤ គឺជា ប្រវត្តិសាស្រ្តរបស់កម្ពុជា និង ជាមុខមាត់ប្រទេស ហើយមហាសន្និបាតនៅព្រឹកមិញនេះ គឺមានសារៈសំខាន់នៅក្នុងការរៀបចំផែនការដើម្បីធ្វើយ៉ាងណាឲ្យវិស័យកីឡារបស់ប្រទេសកម្ពុជា កាន់តែរីកចម្រើននៅលើឆាកអន្តរជាតិ៕