​ម្នាក់​ជា​អ្នក​រ៉េប​រស់​នៅ​អាមេរិក ម្នាក់​ជា​តារា​ចម្រៀង​រស់​នៅ​កម្ពុជា ឡេង សុវណ្ណ​តារា ហៅ​ខ្មែរ​១​ជីវិត និង កាន់ ពេជ្រ បាន​ជួប​គ្នា​ក្នុង Original Song មាន​ចំណង​ជើង​ថា "More Than Hurt” តែ​តាម​ពិត​ពួក​គេ​អត់​ដែល​ស្គាល់​គ្នា​សោះ​ពី​មុន​មក។ កាន់ ពេជ្រ និយាយ​ថា ជំនួប​នេះ គឺ​ជា​រឿង​ចៃដន្យ​បំផុត។

“អត់...អត់​ដែល​ស្គាល់​គ្នា​សោះ​បង ខ្ញុំ​ជួប​គាត់​ចៃដន្យ​បំផុត គឺ​ខ្ញុំ​យក​បទ​ចម្រៀង​ខ្ញុំ​ទៅ​ធ្វើ​នៅ​ស្ទូឌីយ៉ូ​មួយ ហើយ​គាត់​ក៏​ទៅ​ធ្វើ​បទ​គាត់​នៅ​ទី​នោះ​ដែរ។ ពេល​នោះ ម្ចាស់​ស្ទូឌីយ៉ូ ក៏​ណែ​នាំ​ថា​គាត់​ជា​អ្នក​ចម្រៀង​រ៉េប​អី​អីចឹង ខ្ញុំ​ចាប់​អារម្មណ៍​ចង់​ដាក់​រ៉េប​ក្នុង​បទ​ខ្ញុំ ក៏​និយាយ​ និង​ព្រម​ព្រៀង​គ្នា!”។

ពេជ្រ ប្រាប់​ទៀត​ថា បន្ទាប់​ពី​ព្រម​ព្រៀង​គ្នា​តែ​ប៉ុន្មាន​ថ្ងៃ​ប៉ុណ្ណោះ ខ្មែរ​មួយ​ជីវិត​បាន​ប្រាប់​មក​ថា រូប​គេ​ធ្វើ​ឃ្លា​រ៉េប​សម្រាប់ "More Than Hurt” រួច​ហើយ។ "ល្អ​ៗ...មែន​ទែន គាត់​រ៉េប​បាន​ល្អ​ណាស់...បន្ទាប់​ពី​ការ​មិន​ស្គាល់​គ្នា​សោះ និង​ក្រោយ​ពី​បាន​ធ្វើ​ការ​ជាមួយ​គ្នា ឥឡូវ​ពួក​យើង​ដូច Best Friend អីចឹង!”។ កាន់ ពេជ្រ បន្ថែម។

បទ​ចម្រៀង Original Song “More Than Hurt” ត្រូវ​បាន​ចំណាយ​ផលិត​រយៈ​ពេល​ប្រមាណ​១​សប្ដាហ៍​ទាំង​ទំនុក​ច្រៀង និង​ទំនុក​ភ្លេង​ដោយ​តារា​ចម្រៀង កាន់ ពេជ្រ ដោយ​បាន​ធ្វើ​ឲ្យ​មាន​ការ​ចាប់​អារម្មណ៍​ខ្លាំង​ពី​ប្រិយមិត្ត​កាល​ពី​ដើម​ខែ​កុម្ភៈ សូម្បី​តែ​ទើប​ចេញ​ជា​ឈុត(Teaser)​ក៏​ដោយ។

តារា​ចម្រៀង​វ័យ ២៥​ឆ្នាំ​រូប​នេះ ថ្លែង​ថា លោក​មោទនភាព​ណាស់ ចំពោះ​អ្វី​ដែល​ប្រិយមិត្ត​បាន​ផ្ដល់​មក​ឲ្យ។ "តាំង​ពី Sabay ចេញ​ព័ត៌មាន​ពី​បទ​ខ្ញុំ​ហ្នឹង​មក ឃើញ​គ្រប់​គ្នា​ចូល​សរសើរ...សប្បាយ​ចិត្ត​រក​អី​និយាយ​មិន​ត្រូវ និយាយ​តាម​ត្រង់​បង ១០​ថ្ងៃ​ហើយ ដើរ​ញញឹម​បិទ​មាត់​អត់​ជិត​ទេ(សើច)!”។

អតីត​តារា​ចម្រៀង​ក្នុង​ផលិតកម្ម "គុជ​សមុទ្រ" បាន​ធ្វើ​ការ​កត់​សម្គាល់​ថា បច្ចុប្បន្ន​ប្រិយមិត្ត ស្រឡាញ់ និង​គាំទ្រ​ច្រើន​ចំពោះ​អ្វី​ដែល​ជា​ស្នាដៃ​ថ្មី ខុស​ឆ្ងាយ​ពី​ពេល​មុន។ "ឃើញ​អីចឹង រឹត​តែ​មាន​កម្លាំង​ចិត្ត ហើយ​ខ្ញុំ​នឹង​បន្ត​ធ្វើ​បទ Original Song បន្តបន្ទាប់​ទៀត ហើយ​ខ្ញុំ​ជឿ​ថា បន្តិច​ទៀត​សិល្បៈ​តន្ត្រី​យើង​នឹង​កាន់​តែ​រីកចម្រើន!"។ ពេជ្រ ថ្លែង។

“More Than Hurt” គឺ​ជា​ស្នាដៃ​ទី​២​បន្ទាប់​ពី​វិល​ចូល​សិល្បៈ​ជា​ថ្មី​ក្រោយ​សម្រាក​មួយ​រយៈ។ បទ​ទី​១​របស់ កាន់ ពេជ្រ គឺ​បទ "Who I Am” ទាំង​ពីរ​ស្ថិត​ក្នុង​អាល់ប៊ុម​របស់ Songkite អង្គភាព​មួយ​ដែល​បាន និង​កំពុង​ធ្វើ​ការ​ដើម្បី​បំផុស​ការ​ផលិត​បទ​ចម្រៀង Original Song ក្នុង​សិល្បៈ​តន្ត្រី​ខ្មែរ។ ពាក់​ព័ន្ធ​នឹង​វីដេអូ​ចម្រៀង​ពេញ​លេញ(Full MV) របស់ "More Than Hurt” អតីត​និស្សិត​ច្បាប់​រូប​នេះ ប្រាប់​ថា គ្រោង​នឹង​ចេញ​នា​ពេល​ខាង​មុខ។ ទោះ​យ៉ាង​នេះ​ក្ដី បទ​ចម្រៀង​មួយ​នេះ​បាន​ចេញ Video Lyric ពេញ​លេញ​ហើយ។

អត្ថបទ៖ ក្រៅ​ពី​ “More Than Hurt” កាន់ ពេជ្រ នៅ​មានOriginal Songឡូយ​មួយ​ទៀត​គឺ “Who I Am”

ស្ដាប់​បទ​ចម្រៀង Original Song ពី​រោះៗ​ផ្សេង​​ទៀត សូម​ចុច​ទី​នេះ!!!

អីចឹង​តោះ...ស្ដាប់​ទាំង​អស់​គ្នា!!!

http://youtu.be/sZXuo19Qsig

អត្ថបទ៖ ទារិកា