រឿង"កំណប់ឪខ្ញុំ"សម្ពោធយប់មិញ ផ្អើល Major Cineplex

2015-03-23 17:20:24
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿង "កំណប់ឪខ្ញុំ" បានសម្ពោធចាក់បញ្ចាំងជាផ្លូវការ នៅរោងភាពយន្ត Major Cineplex កាលពីយប់មិញនេះ ក្រោយចំណាយពេលផលិតដោយមានការយកចិត្តទុកដាក់អស់ពេលជិត ១ ឆ្នាំ កន្លងទៅ។

ទស្សនិកជន ១ រូប ឈ្មោះ ស្រីដា ប្រាប់ថា ភាពយន្តនេះជាមនោសញ្ចេតនាស៊ីជម្រៅ ប្រកបដោយគុណភាពរូបភាព និង សំឡេងបានល្អ មើលទៅគួរចាប់អារម្មណ៍។ "ចាប់អារម្មណ៍ទេសភាពស្អាតនៅក្នុងរឿងនេះ ព្រោះជាទិដ្ឋភាពចម្ការដូងប្រេង ដែលយើងមិនងាយបានឃើញទេ"។

យ៉ាងណាមិញ ចរិយា និស្សិតឆ្នាំទី ២ ឯណេះវិញបាននិយាយស្រដៀងគ្នាថា៖ "អឺ!...មានអីបងរឿងគេល្អមើលតើ ព្រោះមើលទៅតួសម្ដែងបានសមមិនឆ្គងទេ ហើយលាយលំដោយកំប្លែង និងមនោសញ្ចេតនាផង"។

"អឺ! បើនិយាយពីតួប្រុសវិញ ខ្ញុំមិនដែលស្គាល់ផង តែសម្ដែងបានល្អគួរទាក់ទាញ ត្រង់ឈុតឆាកវាយតប់គ្នានោះ មើលទៅល្អដូចមែនទែន មើលទៅមិនឆ្គងដូចរឿងផ្សេងមួយចំនួនធ្លាប់មើល"។ នេះជាការលើកឡើងរបស់យុវជន សំបូរ កាលពីល្ងាចមិញ។

ជាមួយគ្នានោះដែរ លោក វ៉ន ប៊ុនស៊ីម ជាផលិតករភាពយន្តខាងលើបានបញ្ជាក់ថា មកកាន់ Sabayថា នេះជាវណ្ណកម្មដំបូងហើយ ដែលបានចំណាយពេលជិត១ឆ្នាំទម្រាំលេចចេញជារូបរាង និងដាក់សម្ពោធចាក់បញ្ចាំងនៅល្ងាចមិញនេះ។ "ខ្ញុំសូមបញ្ជាក់ថា គ្រប់យ៉ាងជាស្នាដៃខ្មែរទាំងអស់ មិនមានការលួចចម្លងចេញពីប្រទេសណាទេ បទពិសោធន៍ទាំងប៉ុន្មានដាក់បញ្ចូលនៅក្នុងរឿងនេះអស់ហើយ"។

ផលិតកររូបនេះ បានបញ្ជាក់ថា ជាគោលការណ៍របស់ផលិតកម្ម គឺផលិតភាពយន្តយ៉ាងហោចឱ្យ២រឿងក្នុង១ឆ្នាំ។ ភាពយន្តទាំងនោះ ត្រូវសម្រិតសម្រាំងយកគុណភាពជាចម្បង ដែលជាផ្នែកមួយនៃការអប់រំ ក្រៅពីការឆ្លុះបញ្ចាំងទាក់ទងទៅនឹងរសជីវិតហើយនោះ។ យ៉ាងណាលោកស្នើឱ្យទស្សនិកជនសាកល្បងទស្សនាទស្សនីយភាពថ្មីរឿង "កំណប់ឪខ្ញុំ" នៅMajor Cineplex៕

សូមចុចអាន៖ រឿងកម្រ ព្រាប សុវត្ថិ ច្រៀងរួមគ្នាជាមួយ ខេមរៈ សិរីមន្ត យប់មិញ

សូមចុចអាន៖ រឿង “៧ថ្ងៃ” ឈរលើគេនៅរោងភាពយន្តទំនើបៗនៅរាជធានី

សូមចុចអាន៖ ដឹងថា តារារូបណាខ្លះ ចូលរួមពិធីមង្គលការមហាសេដ្ឋីស្រុកខ្មែរយប់មិញ?