ស្រ្តីមានផ្ទៃពោះកើតជំងឺស្អូច គឺទារកប្រឈមនឹងការរលូត ឬ ប៉ះពាល់ប្រព័ន្ធខួរក្បាល

2015-04-05 15:10:31
ចំនួនមតិ 0 | ចំនួនចែករំលែក 0

ចន្លោះមិនឃើញ

អនុប្រធានសមាគមគ្រូពេទ្យកុមារកម្ពុជា បានប្រាប់ឲ្យដឹងថា ស្រ្តីកើតជំងឺស្អូចនៅក្នុងអំឡុងពេលមានផ្ទៃប្រឈមខ្ពស់នឹងការប៉ះពាល់ដល់សុខភាពរបស់ទារក។ ប្រសិនបើធ្ងន់ធ្ងរទារកអាចរលូត ឬ ត្រូវរំលូតចោលក្រោយពីការតាមដានសុខភាពម្ដាយ និង ទារក ដោយក្រុមគ្រូពេទ្យ ប្រសិនបើស្រាលវិញ ទារកប្រឈមនឹងការប៉ះពាល់សុខភាពផ្នែកខួរក្បាល។

"ខ្ញុំសូមបញ្ជាក់ថា ជំងឺស្អូចវាអាចប៉ះពាល់ដល់ទារក បើធ្ងន់ធ្ងរទារកអាចរលូតតែម្តង ។ ទោះជាមិនធ្ងន់ធ្ងរ ក៏ទារកអាចនៅតែមានការប៉ះពាល់ដល់ប្រព័ន្ធខួរក្បាល ដូចជាខួរក្បាលអន់ខ្សោយ មានប្រព័ន្ធប្រសាទមិនល្អ (ខ្មែរនិយមហៅថាគ្រាសគន្លង)"។ នេះជាការលើកឡើងរបស់ លោក គឹម អាង សាស្ត្រាចារ្យឯកទេសរោគកុមារ នៃមន្ទីរពេទ្យកុមារជាតិ និង ជាសាស្រ្តាចារ្យបង្រៀននៅសាកលវិទ្យាល័យវិទ្យាសាស្ត្រសុខាភិបាល និង ជាអនុប្រធានសមាគមគ្រូពេទ្យកុមារកម្ពុជា។

លោកសាស្រ្តាចារ្យ មានប្រសាសន៍ថា ចំពោះការប្រើវិធីរំលូតកូនបន្ទាប់ពីដឹងថា មានកើតជំងឺស្អូចក្នុងអំឡុងពេលមានផ្ទៃពោះ មិនមែនជាជម្រើសទីមួយ ១០០% ទេ គឺត្រូវតាមដានវិវត្តរបស់ទារកសិន។

លោក សាស្ត្រាចារ្យ បន្តថា ជាទូទៅ គ្រូពេទ្យត្រូវតាមដានយ៉ាងហោចណាស់ឲ្យបាន ៤ ដង ថា តើស្ត្រីមានបានចាក់វ៉ាក់សាំងដែលជាប្រព័ន្ធការពារជំងឺនេះឬយ៉ាងណា។ បន្ទាប់មកត្រូវរកមើលនូវលក្ខណៈមិនធម្មតានៃការលូតលាស់របស់ទារកនៅក្នុងផ្ទៃ។ គ្រូពេទ្យអាចពន្យល់អ្នកជំងឺឬក៏ធ្វើការប្រឹក្សាដើម្បីណែនាំពីលទ្ធភាពដែលកូនអាចមានភាពមិនធម្មតាដើម្បីឲ្យស្ត្រីជាអ្នកម្ដាយសម្រេចចិត្ត។ ប្រសិនបើរកឃើញថា កូននោះពិតជាមិនធម្មតាមែន គឺអាចធ្វើការរំលូតកូន ប៉ុន្តែជាទូទៅត្រូវតាមដានសិន មិនមែនត្រូវតែរំលូតទេ។

លោកសាស្រ្តាចារ្យ គឹម អាង

ចំពោះការការពារវិញ លោកសាស្រ្តាចារ្យ គឹម អាង បញ្ជាក់ថា នៅពេលដឹងថា ខ្លួនមានផ្ទៃពោះ ស្ត្រីគួរចាក់ថ្នាំបង្ការជំងឺនេះ ឬចាក់វ៉ាក់សាំងតាំងពីខ្លួននៅមិនទាន់មានផ្ទៃពោះក៏ជាវិធីល្អ។ មួយវិញទៀត ស្រ្តីដែលមានកូននៅអាយុ៩ខែ ឬ១៨ខែ ក៏អាចនាំកូនមកចាក់វ៉ាក់សាំងដើម្បីបង្ការជំងឺនេះផងដែរ។

បើសិនជាស្រ្តីធ្លាប់កើតជំងឺស្អូចពេលមិនទាន់មានផ្ទៃពោះ ហើយបានចាក់វ៉ាក់សាំងការពារ នោះពុំមានអ្វីជាក្តីបារម្ភឡើយ ។ ដោយឡែក អ្វីដែលបារម្ភគឺស្រ្តីមានជំងឺស្អូចអំឡុងមានផ្ទៃពោះប៉ុណ្ណោះ៕

សូមទស្សនាវីដេអូ៖