សានរ័ត្ន បញ្ញាសក្តិ ដល់ថ្នាក់ហាមាត់សុំគេច្រៀងហើយ នៅអត់បានផលទៀត

2015-04-10 12:55:54
ចំនួនមតិ 0 | ចំនួនចែករំលែក 0

ចន្លោះមិនឃើញ

"សព្វថ្ងៃនេះខ្ញុំមិនបានច្រៀងឲ្យផលិតកម្មណាទេខ្ញុំបានសុំគេដែរប៉ុន្តែគេមិនត្រូវការ" សានរ័ត្ន បញ្ញាសក្ដិ អតីតតារាចម្រៀងក្នុងផលិតកម្ម Spark Musicថ្លែង ពីការមិនអាចរកផលិតកម្មជ្រកបាន យ៉ាងណាលោកនៅតែមានសង្ឃឹម។

ឆ្លើយតបពីមូលហេតុដែលគេមិនត្រូវការម្ចាស់បទ "សមុទ្រស្ងប់ខ្យល់" សានរ័ត្នបញ្ញាសក្ដិរូបនេះបានប្រាប់ Sabay តាមរយៈទូរស័ព្ទកាលពីព្រឹកមិញថា៖មូលហេតុទី១ គេអត់ឆ្លើយតប ទី២គេត្រូវការតែស្រីៗទី៣គេថាយកអ្នកមានអាយុក្រោម២៥ឆ្នាំ ទី៤គេថារូបលោកចាស់ពេក។

"ពីមុនខ្ញុំគេធ្លាប់ហៅច្រៀង...មិនដែលសុំគេច្រៀងទេ...តែដើម្បីគ្រួសារប្រពន្ធកូនខ្ញុំសុខចិត្តសុំគេច្រៀង...ខ្ញុំសុំគេដល់ទៅបួនផលិតកម្មធំៗប៉ុន្តែគេនៅតែមិនត្រូវការអារម្មណ៍ពេលនោះគឺពិបាកថ្លែងណាស់" បញ្ញាសក្ដិបញ្ជាក់។

បន្ទាប់ពីលោក ជុំ ប៊ុនធឿន អ្នកគ្រប់គ្រងក្នុងផលិតកម្ម Spark Music ទទួលអនិច្ចកម្មទៅម្ចាស់បទ "សមុទ្រស្ងប់ខ្យល់" សានរ័ត្ន បញ្ញាសក្តិ ក៏បានចេញពីផលិតកម្ម Spark Music តាំងពីឆ្នាំ២០០៨មកដែរព្រោះអ្នកគ្រប់គ្រងថ្មីហាក់មិនអើពើនឹងរូបលោកសោះ។នេះបើតាមរូបលោកបញ្ជាក់ប្រាប់។

តារាប្រុសម្នាក់នេះប្រាប់ទៀតថា "មានផលិតកម្មថ្មីចំនួនពីរដែលខ្ញុំបានធ្វើការជាមួយ...តែបើកហើយក៏បិទទៅវិញ...ខ្ញុំហាក់ដូចជាងើបមុខមិនរួចសោះ...សង្ស័យតែគេមិនឲ្យធ្វើជាអ្នកចម្រៀងទេមើលទៅ មុខខ្ញុំធ្វើអ្នកលក់លៀសហាលសមជាង(សើច)”។

ទោះយ៉ាងណាក៏ បញ្ញាសក្តិ បានប្រាប់ថាលោកមិនអស់សង្ឃឹមនោះទេដោយលោកបានយកទ្រឹស្ដីព្រះពុទ្ធមកដាស់អារម្មណ៍ជានិច្ចថាស៊ូៗហើយព្យាយាមធ្វើតែល្អៗទៅ។

សានរ័ត្ន បញ្ញាសក្ដិ និងមិត្តរួមការងារក្នុងក្រុមតន្ត្រីប៉ូលីស

ការតស៊ូក៏មិនធ្វើឲ្យរូបលោកបរាជ័យរហូតនោះដែរដោយលោកបានចូលបម្រើការងារប៉ូលីសផ្នែកតន្ត្រីនេះជិត៣ឆ្នាំ តាមរយៈលោកគ្រូ មិញ សុធីវណ្ណ ហើយឥឡូវមិនទាន់ចូលជាក្របខណ្ឌទេ ចំពោះប្រាក់បំប៉នវិញបានត្រឹមតែ២០ម៉ឺនរៀលប៉ុណ្ណោះ។ យ៉ាងណា បញ្ញាសក្តិ ក៏បានបញ្ជាក់ដែរថា ឆ្នាំនេះប្រហែលជាបានចូលក្នុងក្របខណ្ឌហើយ។

ក្រោយចាកចេញពីផលិតកម្ម ម្ចាស់បទ "គូសំនៀង" ដែលច្រៀងឆ្លងឆ្លើយជាមួយ សុគន្ធ នីសា រូបនេះបានរៀបការរួចហើយក្នុងឆ្នាំ ២០០៨។ ភរិយារបស់លោកឈ្មោះ សួន សុផា ដែលមកទល់សព្វថ្ងៃនេះ លោកទទួលបានបុត្រាពីរនាក់ជាចំណងដៃ។ កូនបងឈ្មោះ សាន សួនពុទ្ធារិទ្ធ និងកូនប្អូនឈ្មោះ សាន សួនមុនីរាជ៕