តាកែវទីកំណើតនៃអារ្យធម៌ខ្មែរសំបូរ រមណីយដ្ឋានកម្សាន្តទាំងប្រវត្តិសាស្រ្តនិងកែច្នៃ

2015-04-11 20:42:43
ចំនួនមតិ 0 | ចំនួនចែករំលែក 0

ចន្លោះមិនឃើញ

តាកែវជាខេត្តដ៏ចំណាស់មួយជាទីកំណើតនៃអារ្យធម៌ខ្មែរ និងដែលមានប្រវត្តិរឿងរ៉ាវជាច្រើនទាក់ទងការកកើតទឹកដីប្រទេសកម្ពុជា។ ខេត្តនេះស្ថិតនៅមិនឆ្ងាយពីរាជធានីភ្នំពេញ សំបូរតំបន់រមណីយដ្ឋានទាំងប្រវត្តិសាស្ត្រនិងកែច្នៃសម្រាប់ភ្ញៀវទេសចរជាតិនិងអន្តរជាតិមកទស្សនាកម្សាន្ត។

រមណីយដ្ឋានទន្លេបាទី

មានចម្ងាយប្រហែល៣៥គីឡូម៉ែត្រភាគខាងត្បូងទីក្រុងភ្នំពេញ រមណីយដ្ឋានទន្លេបាទីជាទិសដៅទេសចរណ៍ដ៏មានប្រជាប្រិយនាពេលចុងសប្ដាហ៍សម្រាប់ ប្រជាជនក្នុងស្រុក។ ខ្ទមឫស្សីធ្វើជាជួរតាមបណ្ដោយមាត់បឹងធ្វើឲ្យរមណីយដ្ឋានមានស្ទីលបែបសុខដុមជាមួយអាហារ ភេសជ្ជៈ និងកន្លែងដើម្បីលំហែពីការងារដ៏តានតឹង។ ទីនេះក៏ជាកន្លែងស្ទួចត្រីដ៏មានប្រជាប្រិយមួយសម្រាប់អ្នកទេសចរ និងប្រជាជនក្នុងស្រុក។

សួនសត្វភ្នំតាម៉ៅ

ភ្នំតាម៉ៅជាទីរមណីយដ្ឋានកម្សាន្តដ៏ពេញនិយមមួយទៀតរបស់ខេត្តតាកែវ។ វាជាកន្លែងដ៏ល្អសម្រាប់ភ្ញៀវទេសចរទទួលយកបទពិសោធន៍ក្នុងការទស្សនាសត្វព្រៃគ្រប់ប្រភេទនិងកម្រនៃប្រទេសកម្ពុជា។

ភ្នំជីសូរ

មានទីតាំងស្ថិតនៅក្នុងឃុំរវាង ស្រុកសំរោង ចម្ងាយ២គីឡូម៉ែត្រហួសប្រាសាទនាងខ្មៅហើយបត់ឆ្វេង។ ភ្នំជីសូរ ជារមណីដ្ឋានប្រវត្តិសាស្ត្រដែលមានប្រាសាទបុរាណខ្មែរដ៏ល្អឯកពីដើមសតវត្សទី១១តាំងទីនៅលើកំពូលភ្នំ។ ទីនោះភ្ញៀវទេសចរអាចទស្សនាភូមិកររបស់អ្នកស្រុក ទេសភាពវាលស្រែមើលដាច់កន្ទុយនិងស្រូបយកខ្យល់អាកាសដ៏បរិសុទ្ធ ដែលជួយបង្កើតអារម្មណ៍រីករាយបន្ថែមទៀត។

ផ្ទះតាម៉ុក

នៅកណ្តាលបឹង ទឹកសាបនៃខេត្តតាកែវ ជាផ្ទះដែលសាងសង់ឡើងដោយតាម៉ុក។ ផ្ទះនេះត្រូវបានសាងសង់ ឡើងក្នុងឆ្នាំ១៩៧៧ ដើម្បីធ្វើជាទីលំនៅផ្ទាល់ខ្លួនរបស់គាត់ ក្នុងសម័យប៉ុលពតចន្លោះឆ្នាំ១៩៧៥-១៩៧៩។ ផ្ទះនេះស្ថិត នៅលើទួល អាចមើលទេសភាពជុំវិញបាន ៣៦០ដឺក្រេ។ ពីផ្លូវលំទៅកាន់ផ្ទះតាម៉ុក គេត្រូវដើរឆ្លងកាត់ ស្ពានធ្វើពីស៊ីម៉ង់មួយ ដែលមានប្រវែងប៉ុន្មានម៉ែត្រប៉ុណ្ណោះ។

សារមន្ទីរតាកែវ និងអង្គរបុរី

មានសារមន្ទីរពីរត្រូវបានបង្កើតឡើង នៅក្នុងខេត្តតាកែវ មួយនៅស្រុកអង្គរបុរី ជិតប្រាសាទភ្នំដា និងមួយទៀត នៅកណ្តាលទីរួមខេត្តតាកែវតែម្តង។ សារមន្ទីរខេត្តនេះ គឺជាកន្លែងដែលមានក្បូរក្បាច់រចនាគួរឲ្យចាប់អារម្មណ៍ ដែលបានយករចនាប័ទ្មទៅតាមក្បាច់ស្ថាបត្យកម្មរបស់ប្រាសាទភ្នំដា។

ភ្នំខ្លែង

វត្តភ្នំខ្លែង គឺជាវត្តមួយតាំងពីសតវត្សទី១៨ និងត្រូវបានសាងសង់ក្នុងទសវត្សឆ្នាំ១៩៥០ ដោយព្រះសង្ឃដ៏ល្បីម្នាក់។ វត្តនេះបានក្លាយទៅជាកន្លែងដែលអ្នកស្រុកនិងអ្នកមកពីកន្លែងដទៃទៀតនិយមមកកម្សាន្តនៅថ្ងៃចុងសប្តាហ៍ ដើម្បីបន់ស្រន់សុំសេចក្តីសុខ និងសំណាងល្អ។

ប្រាសាទតាញាណ

មានចម្ងាយប្រមាណ៣ គ.ម ពីប្រាសាទបាយ៉ងកោ គឺប្រាសាទតាញៀន ដែលបានសាងសង់ ឡើងក្នុងរជ្ជកាលព្រះបាទភវរ្ម័នទី១ ដើម្បីឧទ្ទិសដល់ព្រះសិវៈ ក្នុងព្រហ្មញ្ញសាសនា។ ប្រាសាទធ្វើពីឥដ្ឋ ថ្មបាយក្រៀម និងថ្មភក់ ហើយមានរចនាប័ទ្មខុសប្លែកពីប្រាសាទបុរាណល្បីៗដទៃទៀត ដែលនៅចន្លោះរចនាប័ទ្មព្រៃក្មេង និងសំបូរព្រៃ គុហ៍។

ប្រាសាទភ្នំបាយ៉ងកោ

មានចម្ងាយ៤០គម ពីទីរួមខេត្តតាកែវ មានក្រុមប្រាសាទចាស់ៗពីរ ដែលបានសាងសង់តាំងពីសម័យ មុនអង្គរ។ នៅកន្លែងទាំងនេះ ប្រាសាទបាយ៉ងកោជាក្រុមធំ និងប្រាសាទតាញាណជាក្រុមតូច។

ភ្នំដា និងភ្នំបុរី

កន្លែងនេះ ត្រូវបានគេជឿថា ជាកន្លែងចាប់ផ្តើមនៃអារ្យធម៌ខ្មែរ។ ប្រជាជននៅសម័យហ្វ៊ូណន បានកសាង ប្រាសាទនេះឡើង តាំងពីពួកគេនៅកាន់កាប់ទឹកដីវៀតណាមខាងត្បូង និងកម្ពុជានាពេលបច្ចុប្បន្ន មកម្ល៉េះ។ ប្រាសាទនេះ ធ្វើពីឥដ្ឋ ថ្មភក់ និងថ្មបាយក្រៀម តាំងពីចន្លោះសតវត្សទី៤ និងទី៦។ ប្រាសាទភ្នំដា ស្ថិតនៅលើកូនភ្នំមួយកម្ពស់៥០ម៉ែត្រ មានជណ្តើរឡើងនៅជ្រុងខាងជើងឆៀងខាងកើត។

ទស្សនាភូមិផលិតក្រមា និងសូត្រ

កសិករខ្មែរធ្វើ សូត្រប្រពៃណី សម្រាប់ព្រះរាជាណាចក្រទាំងមូល ប៉ុន្តែសម្រាប់ការធ្វើដំណើរនៅពេលថ្ងៃ វាមាន ភាពងាយស្រួលក្នុងការទស្សនាកន្លែងដែលគួរឲ្យចាប់អារម្មណ៍ជាច្រើន ដូចជា ឃុំពារាម និងត្នោត ក្នុងស្រុកបាទី និងភូមិតាំងយ៉ាប ក្នុងស្រុកសំរោង។

នាងខ្មៅ

ជាប្រាសាទធ្វើពី ឥដ្ឋ និងថ្មភក់ មានលក្ខណៈទ្រុឌទ្រោម និងមានចម្ងាយប្រហែល១០គម ពីសួនសត្វភ្នំតាម៉ៅ តាមផ្លូវជាតិលេខ២។ ប្រាសាទនេះត្រូវបានសាងសង់ក្នុងសតវត្សទី៩ និងមានទីតាំងនៅក្នុងឃុំរវាង ស្រុកសំរោង ហើយប្រាសាទនេះត្រូវបានគេ និយាយនៅក្នុងរឿងព្រេងថែមទៀតផង។ វាមានចម្ងាយប្រហែល ៥៨គ.ម ពីរាជធានីភ្នំពេញ។

ប្រិយមិត្តនិងមិត្តអ្នកអានណាខ្លះជាអ្នកខេត្តតាកែវ មានស្គាល់រមណីយដ្ឋាននិងតំបន់ប្រវត្តិសាស្រ្តទាំងនេះទេ ហើយចាប់អារម្មណ៍យ៉ាងណាដែរ?

អត្ថបទ៖ ប៊ុណ្ណារ៉ា ឯកសារយោង៖ Tourism Cambodia