តារាងបាល់ទាត់ថ្មីមួយ ប្រើដើមទុនច្រើន តែចំណូលក៏មិនធម្មតា

2015-04-24 17:09:21
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាងបាល់ទាត់ថ្មីមួយឈ្មោះ Goal Sport បានចំណាយដើមទុនអស់ជាង២០ម៉ឺនដុល្លារបានលេចចេញជារូបរាងហើយកាលពីពេលថ្មីៗនេះនៅផ្លូវម្ដុំលូប្រាំខាងក្រោយសាលាNorth Bridge ជាប់តារាងបាល់ទាត់ស្មៅធម្មជាតិសាកលវិទ្យាល័យមេគង្គកម្ពុជា។

លោក ព្រំ វណ្ណឌី ម្ចាស់តារាងបាល់ទាត់ Goal Sport បានឲ្យដឹងថា ទីលានបាល់ទាត់សិប្បនិម្មិតរបស់លោកមានចំនួន៧តារាងដែលមួយតារាងទំហំ២០×៤០ម៉ែត្រ ព្រមទាំងមានដំបូល៤ និងអត់មានដំបូល៣។ សម្រាប់ការធ្វើតារាងនេះលោកចំណាយអស់ប្រាក់ខ្ទង់២០ម៉ឺនដុល្លារអាមេរិកដោយមិនរាប់បញ្ចូលតម្លៃដីទេ ពីព្រោះដីលោកជួលគេក្នុងមួយខែ៣ពាន់ដុល្លារអាមេរិក។

បន្ទាប់ពីតារាងដែលទើបធ្វើរួចរាល់ប្រហែលជា៣ខែកន្លងទៅ ប្រសិនបើមានភ្ញៀវចូលលេងច្រើន លោកអាចទទួលបានប្រាក់ចំណូលយ៉ាងហោចណាស់៧ពាន់ដុល្លារអាមេរិកក្នុងមួយខែ ក្រោយពីគិតលើការចំណាយផ្សេងរួចរាល់។

លោកបានបន្ថែមថា តារាងដាំស្មៅសិប្បនិម្មិតនេះ សម្រាប់តម្លៃក្នុងការជួលពីថ្ងៃច័ន្ទដល់ថ្ងៃសុក្រគឺពេល ព្រឹកដល់ល្ងាចមួយម៉ោង តម្លៃ៦ដុល្លារអាមេរិក។ ពេលល្ងាចដល់យប់ តម្លៃ៨ដុល្លារអាមេរិកក្នុងមួយម៉ោង ។ ចំណែកថ្ងៃ សៅរ៍ និង អាទិត្យ ព្រឹកដល់ល្ងាចមួយម៉ោង តម្លៃ៨ដុល្លារអាមេរិក និងល្ងាចដល់យប់ក្នុងមួយម៉ោង តម្លៃ១០ដុល្លារអាមេរិក ។

មូលហេតុក្នុងការបង្កើតតារាងបាល់ទាត់នេះដោយសាលោកយល់ថា បច្ចុប្បន្នយុវវ័យកំពុងចូលចិត្តវិស័យបាល់ទាត់គ្រប់គ្នានិងជាចំណង់ចំណូលចិត្តក្នុងការស្រលាញ់កីឡាបាល់ទាត់របស់លោកផងដែរ ព្រមទាំងចង់បង្កើតឲ្យមានសកម្មភាពបាល់ទាត់កាន់តែច្រើននៅប្រទេសកម្ពុជា៕